នៅក្នុងជំនួបតាមទូរស័ព្ទ រវាងរដ្ឋមន្ត្រីក្រសួងសន្តិសុខសាធារណៈ រ​បស់ប្រទេសទាំងពីរ ចិននិងវៀតណាម កាលពី​ល្ងាចថ្ងៃសៅរ៍ សមភាគីចិនលោករដ្ឋមន្ត្រីចិន ហ្គាវ សេងគុន (Guo Shengkun) បានជំនួសមុខឲ្យក្រសួងលោក សម្ដែងការមិនសប្បាយចិត្តខ្លាំងក្លា ដាក់ប្រទេសវៀតណាម នៅចំពោះអំពើហិង្សាដែលបានកើតឡើង ក្នុងសប្ដាហ៍​កន្លងមក។ សម្រាប់សមភាគីវៀតណាមវិញ លោករដ្ឋមន្ត្រី ត្រាំង ដៃក្វាង (Tran Dai Quang) បានឆ្លើយតបវិញថា រដ្ឋាភិបាលរបស់លោក បានចាត់វិធានការសមស្រប និងយ៉ាងមានប្រសិទ្ធិភាពរួចហើយ ដើម្បីទប់ស្កាត់នឹងអំពើជ្រុល​និយមទាំងនោះ។

រោងចក្រមួយកន្លែងបានរងការដុតបំផ្លាញ គ្នុងផ្នែកខាងត្បូងនៃប្រទេសវៀតណាម។ (រូបថត AFP)

-----------------------------------
ដោយ កេសរកូល (ទំនាក់ទំនង៖ [email protected]) - ភ្នំពេញ ថ្ងៃទី១៨ ឧសភា ២០១៤
-----------------------------------

ជម្លោះដែនទឹក - «ក្រសួងសន្តិសុខសាធារណៈរបស់ប្រទេសចិន មានសេចក្ដីតក់ស្លុត និងការខកចិត្តយ៉ាងខ្លាំង នៅចំពោះអំពើហិង្សាទាំងនេះ» នេះជាការថ្លែងរបស់លោក ហ្គាវ សេងគុន រដ្ឋមន្ត្រីចិន នៅក្នុងជំនួបតាមទូរស័ព្ទ កាល​ពីថ្ងៃសៅរ៍ទី១៧ ខែឧសភា ជាមួយនឹងសមភាគីវៀតណាមលោក ត្រាំង ដៃក្វាង ដែលជារដ្ឋមន្ត្រីក្រសួង​សន្តិសុខ​សាធារណៈ របស់ប្រទេសវៀតណាម។

មន្ត្រីជាន់ខ្ពស់ចិន បានថ្លែងលើកឡើងថា អំពើហិង្សាប្រឆាំងនឹងអ្នកវិនិយោគទុនបរទេស ដែលបានកើតឡើងកាល​ពីពេលថ្មីៗនេះ ក្នុងប្រទេសវៀតណាម មានទម្រង់ជាការវាយបំផ្លិចបំផ្លាញ លួចឆក់ប្លន់ និងដុតកំទេច បង្កឲ្យមាន​ការ​បាត់បង់ជីវិតមនុស្ស ក្នុងនោះមានជនជាតិចិន និងធ្វើឲ្យខូតខាតធ្ងន់ធ្ងរទៅដល់ក្រុមហ៊ុនរកទទួលទានចិន។ លោក​បានបញ្ជាក់ដោយសម្ដីធ្ងន់ៗទៀតថា វៀតណាមមិនបានធ្វើប្រតិកម្មឲ្យបានគ្រប់គ្រាន់ ដើម្បីទប់ស្កាត់ឲ្យមាន​ប្រសិទ្ធិភាព ទៅនឹងអំពើទាំងប៉ុន្មានខាងលើទេ។

លោក ហ្គាវ សេងគុន បានរំលឹកពីករណីកិច្ចទៅកាន់សមភាគីវៀតណាមថា ប្រទេសវៀតណាមជាអ្នកទទួលខុសត្រូវ​ទាំងស្រុង ទៅលើការគ្រប់គ្រងស្ថានការណ៍ទាំងអស់នេះ ហើយត្រូវធ្វើយ៉ាងណាត្រូវការពារឲ្យបាន នូវបណ្ដាជន​ចំណាកស្រុក និងក្រុមហ៊ុនចិន ជាពិសេសត្រូវដាក់ពិន័យឲ្យបានធ្ងន់ធ្ងរ លើឧក្រិដ្ឋជន និងស្វែងរកអ្នកបាត់ខ្លួន។

ចំណែកឯរដ្ឋមន្ត្រីវៀតណាម លោក ត្រាំង ដៃក្វាង បានប្រកាសតបទៅវិញថា រដ្ឋាភិបាលនិងកងកម្លាំង​អាជ្ញាធរ​វៀតណាម បានចាត់នូវវិធានការដែលមានប្រសិទ្ធិភាព និងបានដាក់ពង្រាយនូវកងកម្លាំងនគរបាល យ៉ាងច្រើន​សន្ធឹកសន្ធាប់ នៅក្នុងតំបន់ដែលរងការប៉ះពាល់។ លោក ត្រាំង បានបញ្ជាក់ទៀតថា ជនដៃដល់ឬជន​សង្ស័យជា​ច្រើននាក់ ត្រូវបានឃាត់ខ្លួន ហើយការស៊ើបអង្កេតទៅលើករណីទាំងនេះ ត្រូវបានបើកធ្វើរួចហើយ។

ជំនួបតាមទូរស័ព្ទរបស់មន្ត្រីជាន់ខ្ពស់ទាំងពីរ បានធ្វើឡើងមួយថ្ងៃមុន ការអំពាវនាវរបស់ក្រុមអង្គការ​សង្កមស៊ីវិល​វៀតណាម ឲ្យធ្វើបាតុកម្មជាលើកទីបីទៀត នៅថ្ងៃអាទិត្យនេះប្រឆាំងនឹងគម្រោងចម្រាញ់ប្រេង​នៅជិតប្រជុំកោះ​ប៉ារ៉ាសែល (Paracels) ក្នុងសមុទ្រចិនខាងត្បូង។ បើទោះជាការអំពាវនាវជាថ្មី ឲ្យធ្វើបាតុកម្មនេះ ត្រូវបានបញ្ជាក់​ហើយបញ្ជាក់ទៀត ពីបាតុកម្មតាមបែបសន្តិវិធីនោះក៏ដោយ តែអ្នកទទួលខុសត្រូវបាតុកម្មមួយរូប បានទទួលស្គាល់​ថា៖ «ហេតុការណ៍ហិង្សានៅប៉ុន្មានថ្ងៃចុងក្រោយនេះ បានធ្វើឲ្យខូចរូបភាពនៃបាតុកម្មជាតិនិយម និងប្រជាជន​វៀតណាម»។

ក្នុងរសៀលថ្ងៃសៅរ៍នេះដដែល បណ្ដាជនចិនជាង៣០០០នាក់ ត្រូវបានជម្លៀស ឲ្យវិលត្រឡប់ទៅប្រទេសចិនវិញ ខណៈពេល​ដែលបណ្ដាជនចិនជាង១០០០នាក់ផ្សេងទៀត បានភៀសខ្លួនចូលមកជ្រកកោននៅក្នុងប្រទេសកម្ពុជា តាមច្រកបាវិត។ បើ​តាមរបាយការណ៍ផ្លូវការ ចេញផ្សាយដោយរដ្ឋាភិបាលចិន បានឲ្យដឹងថា អំពើហិង្សាកាលពី​សប្ដាហ៍កន្លងទៅនេះ បានធ្វើឲ្យជនជាតិចិនយ៉ាងហោច ២នាក់ស្លាប់ និងជាង១០០នាក់ រងរបួស ព្រមទាំងរោងចក្រ​សហគ្រាសរាប់​សិប​ផ្សេងទៀត បានរងនូវការបំផ្លិចបំផ្លាញ ឬដុតក្លាយជាផេះ។ ក្រសួងពាណិជ្ជកម្មតៃវ៉ាន់ បានឲ្យដឹង​ដែរថា រោងចក្រ​ដែលមានថៅកែជាជនជាតិតៃវ៉ាន់ នៅក្នុងប្រទេសវៀតណាម ប្រមាណាជាជាង៥០០កន្លែង បានរង​ការខូតខាត៕