ក្រុម​សន្តិសុខ​ខណ្ឌ​ទួល​គោក៖ «ម៉េច ហ្អែង​ចង់​ខ្លាំង​ហ្អេស?!»

ជម្លោះពាក្យសម្ដីមួយ បានកើតឡើងខ្លាំងក្លាយ សឹងតែបានក្លាយជាការវាយតប់ រវាងអ្នកសារព័ត៌មានមួយរូប ជា​មួយនឹងមន្រ្តីរៀបចំសណ្តាប់ធ្នាប់ ផ្សារដើមគរ នៅលើកំណាត់ផ្លូវលេខ៣៣៦។ លោក ហេង វុធ អ្នកសារព័ត៌មានឲ្យ​ស្ថាប័នការសែត ក្មេងវត្តស្ថាបនា បានអះអាងដូច្នេះ ព្រោះលោកបាននិយាយពីច្បាប់ទម្លាប់ ស្រាប់តែមានកង​សន្តិសុខ​ម្នាក់នៅក្នុងឡាន ដែលជាអ្នកបើកបរនោះ ស្ទុះមកបំរុងនឹងវាយលោក ជាមួយនិងពាក្យគំហកថា «ម៉េចឯង​ចង់ខ្លាំងហ្អេស !»។
Loading...
  • ដោយ: អ៊ុម វ៉ារី
  • កែប្រែចុងក្រោយ: May 01, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

ជម្លោះពាក្យសម្ដីមួយ បានកើតឡើងខ្លាំងក្លា សឹងតែបានក្លាយជាការវាយតប់ រវាងអ្នកសារព័ត៌មានមួយរូប ជា​មួយ​នឹងមន្រ្តីរៀបចំសណ្តាប់ធ្នាប់ ផ្សារដើមគរ នៅលើកំណាត់ផ្លូវលេខ៣៣៦។ លោក ហេង វុធ អ្នកសារព័ត៌មានឲ្យ​ស្ថាប័ន​ការសែត ក្មេងវត្តស្ថាបនា បានអះអាងដូច្នេះ ព្រោះលោកបាននិយាយពីច្បាប់ទម្លាប់ ស្រាប់តែមានកង​សន្តិសុខ​ម្នាក់នៅក្នុងឡាន ដែលជាអ្នកបើកបរនោះ ស្ទុះមកបំរុងនឹងវាយលោក ជាមួយនិងពាក្យគំហកថា «ម៉េច​ហ្អែង​ចង់ខ្លាំងហ្អេស !»។


កំណាត់ផ្លូវលេខ៣៣៦ ដែលបច្ចុប្បន្ននេះត្រូវបាន​ខាងសង្កាត់ និងខ័ណ្ឌ ពុះចិញ្ច្រាំ ទៅឲ្យអាជីវករលក់ដូរ។ (រូបថត MONOROOM.info/ O. Vary)

សន្ដិសុខ - អ្នកសារព័ត៌មានរបស់ស្ថាប័នរួមអាជីព ហៅថា «ក្មេងវត្តស្ថាបនា» លោក ហេង វុធ បានបញ្ជាក់ប្រាប់​ទស្សនាវដ្តីមនោរម្យ.អាំងហ្វូ ថា ក្នុងព្រឹកថ្ងៃទី៣០ ខែមេសា នេះថា លោកបានសម្រាកពីការងារ និងបានបើក​ម៉ូតូ​កង់បី ទៅដឹកអីវ៉ាន់នៅផ្ទះប្អូនស្រីរបស់លោក ដែលមានទីតាំងលើកំណាត់ផ្លូវលេខ៣៣៦ ដែលបច្ចុប្បន្ននេះត្រូវបាន​ខាងសង្កាត់ និងខ័ណ្ឌ ពុះចិញ្ច្រាំ ទៅឲ្យអាជីវករលក់ដូរមួយចំនូន ស្ទើរតែអស់រកកន្លែងដើរគ្មាន។ លោកបានរៀប​រាប់​ទៀតថា គ្រាន់តែលោកឈប់មួយភ្លែត ដើម្បីជញ្ជូនអីវ៉ាន់ដាក់លើម៉ូតូកង់បីនោះ ក្រុមសណ្តាប់ធ្នាប់ទាំងនោះ ក៏បាន​មកដល់ល្មម ហើយបានបង្ខំឲ្យលោកយកម៉ូតូកង់បីនោះ ចេញជាបន្ទាន់ ដើម្បីគេធ្វើសណ្តាប់ធ្នាប់តាមដងផ្លូវ ឲ្យមាន​របៀបរៀបរយ។

លោក ហេង វុធ បានបញ្ជាក់ដូច្នេះថា៖ «បើដេញទាំងអស់គ្នានោះ មិនថាអីទេ តែនៅលើផ្លូវនេះមានឡានឈប់ យ៉ាង​អនាធិបតេយ្យ តែបែរជាមិនទៅដេញទេ ដេញអីតែខ្ញុំនោះ។ (...) ឯអ្នកលក់ដូរមួយចំនួនលើផ្លូវនេះ ខ្លួនបានលក់​ចិញ្ចើម​ផ្លូវយកលុយ តែគេអាចចតបាន និងមិនដេញទៅវិញ។»

លោកបានបន្តថា និយាយបានត្រឹមនេះ ក្រុមសន្តិសុខទាំងនោះ ក៏ចាប់ផ្តើមជេរយកតែម្តង។ ពេលនោះលោកបញ្ជាក់​ប្រាប់ថា យ៉ាងហោចណាស់ គួណាស់យោគយល់គ្នាទៅ កុំជេប្រមាថបែបនេះមិនសមរមទេ ដោយនិយាយថា លោក​ជាអ្នកសារព័ត៌មានមួយរូបផង។ លោកបន្តថា ពេលនោះមានម្នាក់ទៀតបានបន្ថែមដូច្នេះថា៖ «កាសែតពួកឯងហ្នឹង កាសែតពួកអាប្រឆាំងហ្នឹង។ ម៉េចឯងចង់ម៉េច? ឯងចង់ខ្លាំងជាមួយអញ កង់បីឯងហ្នឹង អញយកទៅខណ្ឌ។» ស្រប​ពេលនោះ លោកក៏ចាក់បណ្តោយតាមថា «យកក៏យកទៅ»។ តែបន្តិចក្រោយមក ក្រុមសន្តិសុខខណ្ឌទាំងនោះ ក៏នាំ​គ្នាចាកចេញពីទីនោះទៅ មិនបាននៅតបតអ្វីវែងឆ្ងាយទេ។

ស្រ្តីម្នាក់បានឃើញហេតុការណ៍នេះ បានរៀបរាប់ថា ក្រុមទាំងនោះមានអ្នកធ្វើការចាស់ និងអ្នកទើបមកធ្វើការថ្មី។ អ្នកដែលខ្លាំងដៃជាងគេ នោះជាអ្នកមកថ្មី។ ឯលោក ឈួរ ដែលជាមេក្រុមដឹកនាំនោះ ក៏មានមុខនៅពេលកើត​ហេតុ​ដែរ តែអង្គុយក្នុងឡានធ្វើមិនដឹង ទុកឲ្យកូនចៅចាត់ការតាមទំហឹង។ «បើអ្នកចាស់នោះ មិនសូវដេញទេ តែសុទ្ធ​តែ​ជាអ្នកថ្មី។ អ្នកកាសែតគេចេះច្បាប់ គេមិនបំពានច្បាប់ទេ។ (...) តែអស់លោកវិញ បំពានច្បាប់យ៉ាងខ្លាំង។»

ទស្សនាវដ្តីមនោរម្យ.អាំងហ្វូ មិនអាចសុំការបំភ្លឺពីលោក ឈួរ ដែលដឹកនាំក្រុមសន្តិសុខនោះបានទេ ក្នុងថ្ងៃ​នេះ។ តែ​លោក ឯក ឈុនដឿន អភិបាលខណ្ឌទួលគោក ក្នុងកិច្ចសម្ភាសជាមួយទស្សនាវដ្តីមនោរម្យ.អាំងហ្វូ បានបញ្ជាក់ថា ក្រុមសណ្តាប់ធ្នាប់របស់លោក តែងតែដើធ្វើសណ្តាប់ធ្នាប់ជាប្រចាំ ដើម្បីបញ្ជៀសការកកស្ទះចរាចរណ៍។ លោក​បន្ថែមថា តែអ្នកការសែតរូបនោះ បានប្រកបរបរថ្មីមួយទៀតជាអ្នករត់ម៉ូតូកង់បី ហើយឈប់លើផ្លូវសាធារណៈ ដូច្នេះ​ក្រុមរបស់លោកមិនស្គាល់ថា អ្នកកាសែត ឬមិនកាសែតទេ ត្រូវតែគោរពច្បាប់ទាំងអស់គ្នា។

ប៉ុន្តែនៅពេលទស្សនាវដ្ដី សាកសួរថា តើនរណាខុសនរណាត្រូវ លោកអភិបាលខណ្ឌទួលគោក បានឆ្លើយបង្វែង ដោយនិយាយថា លោកក៏មិនស្ថិតនៅក្នុងហេតុការណ៍នោះដែរ។ តែលោកបាននិយាយថា៖ «បើគេសុំរៀបចំ​សណ្តាប់ធ្នាប់អី សុំចូលរួមសហការផង។ កុំអាងសារព័ត៌មាន យកលេសធ្វើខុសច្បាប់។ (...) ពេលខ្លះត្រូវចេះ​យោគ​យល់គ្នា ទៅវិញទៅមក និងគោរពច្បាប់ទាំងអស់គ្នា។ (...) គេចុះធ្វើការ ឯងចតសម្កាំងលើផ្លូវ អ្នកណាមិនខឹង បែក​ញើសជោគ។ (...) អាងតែអ្នកសារព័ត៌មាន គេប្រាប់ម្តងពីរដងមិនស្តាប់ នៅតែឌឺដង!»

លោកអភិបាលខណ្ឌទួលគោក បានលើកជាឧទាហរណ៍មកបញ្ជាក់ដូច្នេះថា «បងសុំអញ្ជើញទៅមុខបន្តិចទៅ! អើ​គាត់ទៅ ទំរាំគាត់ទៅជាងកន្លះម៉ោង គេនិយាយដប់ដងបានទៅ អ្នកណាមិនខឹង!។ (...) ស្អីអា អញឈប់ចាំម៉ូយបន្តិច មិនបានដែរហ្អា ! តម៉ាត់អញ្ចឹងអ្នកណាទទួលយកបាន?»

សាក្សីម្នាក់ទៀតក្នុងហេតុការណ៍ទាំងនោះ ដែលជាអ្នកលក់បន្លែ ផ្លែឈើ បានលើកឡើងដោយសុំមិន​បញ្ចេញឈ្មោះ​ថា ក្រុមសន្តិសុខខណ្ឌទួលគោកទាំងនោះ មានគ្នាជិតដប់នាក់ តែងតែដើរមកចាត់ចែងតំបន់លក់ដូរ ទៅឲ្យក្រុម​អាជីវករ ដោយយកជាប្រាក់ប្រចាំខែយ៉ាងច្រើន។ ឯអាជីវករវិញ គ្មានអ្នកណាម្នាក់ គេពេញចិត្តនឹងក្រុមទាំងនេះទេ។ អ្នកមីងពន្យ់ថា បើអ្នកណាឲ្យលុយទើបអនុញ្ញាតិឲ្យលក់ បើអ្នកណាគ្មានប្រាក់បង់ទេ មិនអនុញាតិឲ្យលក់ឡើយ។ តែបើហានរឹងទទឹង នឹងចាប់យកទៅខណ្ឌ ខានលក់ជាមិនខាន៕


កំណាត់ផ្លូវលេខ៣៣៦ ដែលបច្ចុប្បន្ននេះត្រូវបាន​ខាងសង្កាត់ និងខ័ណ្ឌ ពុះចិញ្ច្រាំ ទៅឲ្យអាជីវករលក់ដូរ។ (រូបថត MONOROOM.info/ O. Vary)

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី៣០ មេសា ២០១៤

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...