បែក​ធ្លាយ​នគរបាល​ចរាចរណ៍​រវល់​មក​រារាំង​អ្នក​ការសែត ទុក​ឲ្យ​ជន​ល្មើស​«រត់​បាត់» (vdo)

ជាព្រឹត្តិការណ៍ គិតស្មានមិនដល់។ បន្ទាប់ពីបានឃាត់ម៉ូតូ ដែលមានពាក់ស្លាកលេខវៀតណាមរួច នគរបាល​ចរាចរណ៍​សាធារណៈ បែរជាមិនខ្វល់នឹងការងារតួនាទីរបស់ខ្លួនទេ តែបានមករវល់រារាំងអ្នកសារព័ត៌មាន បណ្ដាល​ឲ្យ​ម្ចាស់​ម៉ូតូ​ស្លាក​វៀតណាម រត់ទៅបាត់ស្រមោល ទុកឲ្យឯនគរបាល សើចមិនសើច យំមិនយំ ក្នុង​ព្រឹត្តិការណ៍​នេះ។
ទាញម៉ូតូស្លាកវៀតណាមមកចិញ្ចើមថ្នល់ តែរវល់មកឃាត់អ្នកការសែត ម្ចាស់ម៉ូតូជិះគេចខ្លួនបាត់។ (រូបថត monoROOM.info/ H. Vuthy)
Loading...
  • ដោយ: អ៊ុម វ៉ារី អត្ថបទ៖ អ៊ុម វ៉ារី ([email protected]) - យកការណ៍៖ ហេង វុទ្ធី - ភ្នំពេញ ថ្ងៃទី១៥ ធ្នូ ២០១៤
  • កែប្រែចុងក្រោយ: December 18, 2014
  • ប្រធានបទ: ជ្រុងមួយ
  • អត្ថបទ: មានបញ្ហា?
  • មតិ-យោបល់

បើដឹង​ត្រឹម​តែ​ច្បាប់​ចរាចរណ៍​មួយ វា​មិន​គ្រប់​គ្រាន់ នឹង​ដើម្បី​ក្លាយ​ជា​មន្ត្រី​អនុវត្តន៍​ច្បាប់​របស់​អាជ្ញាធរ​ឡើយ បើ​ទោះ​ជា​មន្ត្រី​រូប​នោះ មាន​តួនាទី​ត្រឹម​ជា​តម្រួត​ចរាចរណ៍​ក៏​ដោយ។ នេះ​ជា​ហេតុការណ៍​មួយ ដែល​បាន​កើត​ឡើង​នៅ​ទី​សាធារណៈ ត្រង់​ចំណុច​កែង ភ្លើង​ស្តុប​អូ​បែក​ក្អម មុខ​ក្រុមហ៊ុន​ណូគៀ កាល​ពី​ថ្ងៃ​ទី១៧ ខែ​ធ្នូ ម្សិល​ម៉ិញ​នេះ ដើម្បី​បញ្ជាក់​ថា ការ​ស្វែង​យល់​ពី​ច្បាប់​និង​សិទ្ធិ​ផ្សេងៗ សម្រាប់​មន្ត្រី​អាជ្ញាធរ មាន​សារៈសំខាន់​ប៉ុណ្ណា។

មន្ត្រីនគរបាល នៅ​ប្រចាំ​គោល​ដៅ​នោះ បាន​ឃាត់​ម៉ូតូ​មួយ​គ្រឿង ដែល​បើក​បរ​លើ​បណ្តោយ​ផ្លូវ​២០០៤ ក្នុង​ទិសដៅ​ពី​លិច​ទៅ​កើត ដោយ​បត់​ស្តាំ​តាម​ផ្លូវ​២៧១។ ពេល​មក​ដល់​ត្រង់​ចំណុច​កែង ម៉ូតូ​មួយ​គ្រឿង​នេះ​ដែល​ជិះ​តែ​ម្នាក់​ឯង និង​ដឹក​អីវ៉ាន់​ពី​ក្រោយ​ផង​នោះ ត្រូវ​បាន​មន្ត្រី​សមត្ថកិច្ច​ប្រចាំ​គោល​ដៅ ធ្វើការ​«ឃាត់»​ជា​បន្ទាន់​ក្នុង​គោល​បំណង​សួរ​នាំ។ ម៉ូតូ​នោះ​មាន​យីហោ យ៉ាមាហា (Yamaha) ពាក់​ស្លាក​លេខ 70-K1 155.60 បើក​បរ​ដោយ​ជន​មិន​ស្គាល់​អត្តសញ្ញាណ។ បើ​តាម​មើល​ស្លាក​លេខ​នេះ គេ​បាន​ដឹង​ថា ម៉ូតូ​នេះ​ជិះ​ចូល​ពី​ប្រទេស​វៀតណាម មក​ក្នុង​ប្រទេស​កម្ពុជា ដែល​កន្លង​មក​រង​ការ​រិះ​គន់​ថា មាន​ភាព​សេរី​ហួស និង​គ្មាន​ការ​អើពើ​ពី​មន្ត្រី​អាជ្ញាធរ​ណា​ឡើយ។

ដោយសារតែករណីនេះជាបញ្ហាក្ដៅ ហើយទស្សនាវដ្ដីមនោរម្យ.អាំងហ្វូ ចង់បានការពិត ពីការអនុវត្ត​ច្បាប់​របស់​មន្ត្រីនគរបាល ដើម្បីជាការបំភ្លឺនូវរាលការចោទប្រកាន់នោះផង អ្នកសារព័ត៌មានរបស់ទស្សនាវដ្ដី បាន​ចូល​ទៅ​ក្បែរដើម្បីស្វែងរកព័ត៌មាន និងផ្តិតយករូបភាព។ ប៉ុន្តែរឿងដ៏គួរឲ្យហួសចិត្ត បានកើតឡើង​ភ្លាម​នៅ​ពេល​នោះ ព្រោះមន្ត្រីនគរបាល ឈប់រវល់នឹងម៉ូតូស្លាកលេខវៀតណាមនោះទៀត តែបានដើរ​មក​ធ្វើការ​ហាម​ឃាត់​អ្នក​សារព័ត៌មាន មិនឲ្យធ្វើការងាររបស់ខ្លួនទៅវិញ។ មន្ត្រីនគរបាល បាននិយាយមកកាន់​អ្នក​សារព័ត៌មាន​ថា «បងឯងគ្មានសិទ្ធិអ្វី មកថតទេ។ បានហើយ កុំថត។ ទោះអ្នកសារពត៌មានក៏ដោយ បើគ្មាន​ការ​អនុញ្ញាត​ទេ មិនអាចថតបានទេ។»

តើមានច្បាប់ណា ដែលចែងឡើង ដើម្បីហាមឃាត់ការយកព័ត៌មាន នៅលើទីសាធារណៈ ពីមន្ត្រី​សាធារណៈ ដែលកំពុងអនុវត្តច្បាប់ ដែលជាច្បាប់សាធារណៈដែរនោះ? ឬមួយមន្ត្រីនគរបាល ដែលទំនងជាចេះ​ច្បាប់​«ច្រើន​ពេក»រូបនោះ មានការលាក់បាំងអ្វីមួយ ជាមួយនឹងសាធារណៈជន? តែបើទោះជាចង់មាន​«អាថ៌កំបាំង»​អ្វី ជាមួយនឹងម្ចាស់ម៉ូតូស្លាកវៀតណាម ក៏វាហួសពេលដែរ ព្រោះខណៈពេល​ដែល​លោក​«ប៉ូលីស» បានយក​បាតដៃរបស់ខ្លួន មកបាំងមុខកាមេរ៉ាដែលកំពុងថតនោះ ម៉ូតូយ៉ាម៉ាហាស្លាកលេខ​វៀតណាម ដែលមិនទាន់​ទាំង​បានពន្លត់ម៉ាស៊ីនផង បានជិះរត់គេចបាត់ស្រមោលទៅហោង។

ងាកមកក្រោយ ឃើញម្ចាស់ម៉ូតូដែលខ្លួនឃាត់ ជិះគេចខ្លួនទៅបាត់ និងទំនងជាក្ដៅក្រហាយ ព្រោះខានបាន​«អាថ៌កំបាំង»​ជាមួយម្ចាស់ម៉ូតូ មន្ត្រីចរាចរណ៍ពិសេសយើង បានត្រឡប់មកបន្ទោស និងចោទប្រកាន់អ្នក​សារព័ត៌មានថា បើកុំតែអ្នកសារព័ត៌មានមកថត ហើយគាត់រវល់តែឃាត់មិនឲ្យថតនោះ កុំអីម៉ូតូនោះក៏មិន​អាច​រត់​បាត់ចឹងដែរ។

លោក ភឿន សារ៉ុន ដែលទទួលបន្ទុកដឹកនាំការប្រចាំការ នៅគោលដៅនោះ បានទទួលស្គាល់ថា នេះជាកង្វះ​ខាត​របស់កូនចៅរបស់លោក ដែលបានមកហាមឃាត់អ្នកសារព័ត៌មាន ក្នុងហេតុការណ៍សាធារណៈនេះ។ លោកបានថ្លែងប្រាប់ទស្សនាវដ្ដីថា៖ «ខ្ញុំនឹងកែមិនឲ្យមានបញ្ហាអញ្ចឹង ជាលើកទីពីរទៀតទេ។ ខ្ញុំនឹងអប់រំបន្ត​ទៀត។» តែលោក ភឿន សារ៉ុន នៅតែចង់ទម្លាក់កំហុសមកលើអ្នកសារព័ត៌មានរបស់ទស្សនាវដ្ដី ថាមក​ពីការ​សួរនាំរបស់អ្នកសារព័ត៌មាន ទើបមានមានការរត់គេច របស់ម៉ូតូស្លាកលេខវៀតណាមនោះ។ អ្នកសារ​ព័ត៌មាន​បានបញ្ជាក់ជូនលោក ភឿន សារ៉ុន ឲ្យដឹងវិញថា លោកគ្រាន់តែតាមប្រម៉ាញ់យករូបភាពប៉ុណ្ណោះ ហើយ​មិន​​ទាន់​បានសួរនាំអ្វី រំខានដល់ការងារឃាត់ម៉ូតូនោះសូម្បីបន្តិចឡើយ៕

សូមទស្សនាវីដេអូ ពីព្រឹត្តិការណ៍នេះទាំងអស់គ្នា៖

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...