ហេតុការណ៍នេះ បានបង្កការភ្ញាក់ផ្អើល កាលពីវេលាម៉ោង៧ព្រឹក ថ្ងៃទី ០៤ ខែមេសា ឆ្នាំ២០១៥ នៅតាមបណ្តោយ​ផ្លូវ​ជាតិ​លេខ៥ ត្រង់ចំណុចការដ្ឋាន សាងសង់ផ្លូវមួយ របស់ក្រុមហ៊ុនចិន ឈ្មោះ«សៀងហៃ» ស្ថិតក្នុងភូមិគ្រោះ សង្កាត់សំរោង ខណ្ឌ​ព្រែកព្នៅ រាជធានីភ្នំពេញ បានបណ្តាលឲ្យក្មេងប្រុសម្នាក់ រងរបួសជើងធ្លុះប្រអប់ជើងស្តាំ ដោយសារម៉ាស៊ិនរុញដី ថយ​មក​កិន​ពីលើ ទាំងម៉ូតូទាំងម្ចាស់។

កុមារារងគ្រោះឈ្មោះ កង ករុណា អាយុ៨ឆ្នាំសព្វថ្ងៃរស់នៅ ភូមិឃុំកើតហេតុខាងលើ ជាមួយគ្រួសារ។ ករុណា បានប្រាប់​ទស្សនាវដ្តីមនោរម្យ.អាំងហ្វូទាំងទឹកភ្នែកថា ខ្លួនគេបានជិះម៉ូតូចាស់មួយ ចេញពីផ្ទះទៅមើលសត្វពពែ នៅស្រែ ដែល​មាន​ចំងាយ ប្រមាណ៥០០ម៉ែត្រពីផ្ទះ លុះមកដល់ចំណុចកើតហេតុ ដែលជាការដ្ឋានមានឡានធំ បើកមកពេញទាំងផ្លូវ គ្មាន​ជម្រើស អ្នកឌុប ករុណា បានបើកចូលផ្លូវ ដែលកំពុងសាងសង់ ដើម្បីគេចឡាន។

នៅពេល ដែលចូលមកចំហៀងផ្លូវ ដែលកំពុងសាងសង់ អ្នកទាំងពីរ បានលើកដៃ សុំឲ្យអ្នកបញ្ជា រឺឡូ រុញដីឲ្យឈប់ ព្រោះ​ខ្លួននៅពីក្រោយ។ តែអ្នកបញ្ជារឺឡូរុញដី គ្មានកញ្ចក់ក្រោយ និងទំនងជាស្ដាប់មិនឮ ក៏បានកិនពីលើតែម្តង។

រឿងនេះ ត្រូវបានអ្នកបកប្រែ នៅក្នុងក្រុមហ៊ុន«សៀងហៃ» លោក គីម ហុយ ឲ្យដឹងថា ម្ចាស់ក្រុមហ៊ុនបានបដិសេធន៍ថា អ្នក​បញ្ជាគ្រឿងចក្ររបស់ខ្លូន មិនខុសទេ ព្រោះក្មេងនោះ បានជិះម៉ូតូចូលមកក្នុងការដ្ឋាន ដោយខ្លួនឯង។ បន្ទាប់ពីការ​បដិសេធន៍ តំណាងក្រុមហ៊ុនបានឲ្យ ក្រុមគ្រួសារជនរងគ្រោះ បញ្ជូនកុមារារទៅមន្ទីពេទ្យ ដោយមិនប្រើឡានសង្គ្រោះ របស់​ការដ្ឋាន​ឡើយ។

អ្នកបកប្រែបានបន្តថា លោកគ្រាន់តែជាអ្នកក្រៅប៉ុណ្ណោះ ចំពោះការដោះស្រាយយ៉ាងណា អាស្រ័យលើអ្នកតំណាង​ក្រុមហ៊ុន។

ដោយឡែកអធិការង ស្រុកពញ្ញាឮ លោក ហេង សុផល ដែលមានវត្តមាន នៅក្នុងហេតុការណ៍នេះ បានឲ្យបដិសេធថា ករណីនេះ វាមិនមែនជាដែនសមត្ថកិច្ច របស់លោកទេ។ តែលោកបានបភ្លឺថា មិនមែនឲ្យតែបើកចូល មកក្នុងការដ្ឋាន សុទ្ធ​តែជាអ្នកខុសនោះទេ។ លោកបន្តថា ក្នុងនាមជាម្ចាស់ក្រុមហ៊ុន ដែលបើកការដ្ឋានសាងសង់ ដ៏ធំមួយ ហេតុអ្វីក៏មិនមាន ដាក់ផ្លាកសញ្ញា«ហាមចូល»? ម្យ៉ាងទៀត នៅពេលមានអ្នករបួស នៅក្នុងការដ្ឋាន ម្ចាស់ក្រុមហ៊ុន ត្រួវតែជួយសង្គ្រោះ ចំពោះ​ការដោះស្រាយ យ៉ាងណានោះ គឺជាភារៈកិច្ចបន្ទាប់ ដែលក្រុមហ៊ុនត្រូវតែទទួលខុសត្រូវ។

ក្រុមគ្រួសារជនរងគ្រោះបានប្រាប់ថា នៅមិនទាន់បានដោះស្រាយនោះទេ តែពេលនេះ គាត់បានបញ្ជូនកូនប្រុស ករុណា ទៅកាន់មន្ទីពេទ្យ នៅភ្នំពេញហើយ ព្រោះបារម្ភពីកូន។ សូមញ្ជាក់ថា ជើងស្តាំរបស់កុមារារងគ្រោះ បានធ្លុះចំប្រអប់ជើង ដោយ​កំលាំងម៉ាស៊ិនរុញដីពេញទំហឹង៕