ហេតុការណ៍ បានបង្កភាពតក់ស្លុត ខ្លាំងក្លាណាស់។ រថយន្ដក្រុង ដែលធ្វើដំណើរ មកពីក្រុង ប៊ីបាវ (Bilbao ភាគខាងជើង នៃប្រទេសអេស្ប៉ាញ) បានជ្រមុចខ្លួន ទៅមិនផុត នៅខាងក្រោមស្ពានមួយ កាលពីព្រឹកថ្ងៃ​អាទិត្យ នៅភាគខាងជើង នៃប្រទេសបារាំង។ រថយន្ដក្រុង ដែលមានកំពស់ ខ្ពស់ជាងកំពស់ ពីផ្លូវទៅស្ពាន​នោះ បានដឹកក្រុមយុវជនជាតិអេស្ប៉ាញ អាយុពី១៨ ទៅ២៩ឆ្នាំ ចំនួន៥៦នាក់ ដើម្បីធ្វើដំណើរ ឆ្ពោះទៅកាន់​រាជធានី អាំស្ទែដាម ប្រទេសហូឡង់។ នេះបើតាមរបាយការណ៍មួយ របស់សារព័ត៌មានបារាំង «La Voix du Nord»។

ដំបូលរថយន្ដក្រុង ត្រូវបានគាស់របើក ដោយហេតុបានទើសនឹងស្ពាន បង្កឲ្យយុវជន៦នាក់ បានរបួស​យ៉ាង​ធ្ងន់ធ្ងរ ត្រូវបញ្ជូនទៅសង្គ្រោះបន្ទាន់ នៅមន្ទីរពេទ្យបារាំងនៅក្រុង លីល ក្បែរនោះ។ ពីក្នុងចំណោមនោះ យុវជន​ពីរនាក់ មានស្ថានភាពធ្ងន់ធ្ងរ ដែលអាចប៉ះពាល់ដល់ជីវិត។ រីឯយុវជន៣៤នាក់ទៀត បានរង​របួស​ស្រាល ហើយ​កំពុងស្នាក់នៅ ក្នុងមជ្ឈមណ្ឌលទទួលភ្ញៀវមួយ។

មនុស្សជាច្រើននាក់ បានដេកលក់!

បើតាមយុវជន ដែលបានរួចរស់ និងមិនមានរបួសនោះ បានថ្លែងប្រាប់ទីភ្នាក់ងារ ព័ត៌មានបារាំង អាអេហ្វប៉េ (AFP) ថា ជនរងគ្រោះ ដែលមានស្ថានភាព របួសធ្ងន់ធ្ងរជាងគេ សុទ្ធសឹងជាអ្នក ដែលអង្គុយនៅផ្នែកខាង​ក្រោយ នៃរថយន្ដ កន្លែងដែលបំណែក នៃដំបូលរថយន្ដ បានរបើកទៅទាំងផ្ទាំង។ យុវតីម្នាក់ បានថ្លែងឲ្យ​ដឹង​ថា៖ «មនុស្សជាច្រើននាក់ បានដេកលក់។ ខ្ញុំទើបនឹងជជែកគ្នាលេង ជាមួយមិត្តខ្ញុំនៅជិតនេះ ក៏ស្រាប់តែមាន​រឿង កើតឡើងតែម្ដង។ យើងអត់ដឹងថា មានរឿងអ្វីកើតឡើងទេ។»

រហូតមកដល់ពេលនេះ ការស៊ើបអង្កេត កំពុងបន្តធ្វើនៅឡើយ ដើម្បីឲ្យដឹងពីមូលហេតុ នៃការបើករថយន្ដ​ក្រុង​ កំពស់ជិត៣ម៉ែត្រ ជ្រមុជទៅក្រោយស្ពាន ដែលខ្ពស់ពីដី ត្រឹមតែ ២,៦០ម៉ែត្រ។ កំពស់នេះ ត្រូវបាន​អនុញ្ញាត ឲ្យតែរថយន្ដតូចៗប៉ុណ្ណោះ អាចធ្វើដំណើរឆ្លងកាត់បាន ហើយម្យ៉ាងទៀត ផ្លូវនេះក៏មិនមែនជាផ្លូវ ដែលរថយន្ដ​ក្រុង ត្រូវឆ្លងកាត់ដែរ។ អាជ្ញាធរភាគខាងជើង នៃប្រទេសបារាំង កំពុងធ្វើការសាកសួរ អ្នកបើកបររថយន្ដក្រុង ទាំងពីរនាក់ (ដំណើរផ្លូវឆ្ងាយ ចាំបាច់ត្រូវមាន អ្នកបើកពីរនាក់) ពីបញ្ហានេះ ហើយនៅមិនទាន់ទម្លាយ មកឲ្យ​អ្នក​សារព័ត៌មានដឹង នៅឡើយ៕