ការកំណត់ប្រាក់ឈ្នួលអប្បបរមា ជាប្រធានបទមួយដ៏សំខាន់ ដែលបានបង្កក្នុងពេលកន្លងមក ឲ្យមានផ្ទុះបាតុកម្ម របស់កម្មករ ស្ទើពេញផ្ទៃប្រទេស។ កត្តាទាំងនេះ ត្រូវបានវាគ្មិនដែលចូលរួមក្នុងសិក្ខាសាលាថ្នាក់ជាតិ រៀបចំដោយ​ក្រសួងការងារ និងអង្គការថ្នាក់ជាតិ ថ្លែងបញ្ជាក់ថា វាបណ្តាលមកពីមិនមានការសិក្សា និងស្រុះគ្នារវាងនិយោជក និងនិយោជិក។

លោក អាត់ ធន់ ប្រធានសហជីពកម្មករមួយរូប ថ្លែងនៅក្នុងសិក្ខាសាលាថ្ងៃទី២៤ ខែមេសា ឆ្នាំ២០១៤។ (រូបថត MONOROOM.info/ C. Nita)

ប្រាក់ឈ្នួលអប្បបរមា - រដ្ឋមន្ត្រីក្រសួងការងារ លោកអ៊ិត សំហេង បានថ្លែងក្នុងកម្មវិធីសិក្ខាសាលា ពិគ្រោះ​យោបល់​ត្រីភាគីថ្នាក់ជាតិ នៅថ្ងៃទី២៤ ខែ មេសានេះថា ការកំណត់ប្រាក់ឈ្នួលអប្បបរមារឿងសំខាន់មួយ ដែលទាំង​រដ្ឋាភិបាល ទាំងនិយោជិក និងភាគីពាក់ព័ន្ធចង់បាន ប៉ុន្តែវាក៏យោងទៅតាមលទ្ធភាពសង្គមជាក់ស្តែងដែរ។

លោកសង្ឃឹមថា សិក្ខាសាលាថ្ងៃនេះនឹងធ្វើការសិក្សារួមគ្នា ឈានទៅរកការបញ្ចប់បញ្ហាដ៏ចម្រូងចម្រាស់ និងសិក្សា​ថា តើមានហានិភ័យអ្វីខ្លះ នៅពេលដែលមានការកំណត់ប្រាក់ឈ្នួលតិចពេក និងមានហានិភ័យអ្វីខ្លះ នៅពេលមាន​ការកំណត់ប្រាក់ឈ្នួលខ្ពស់ពេក។ លោកថ្លែងថា៖ «អញ្ចឹងទេ យើងត្រូវតែរកចំនុចកណ្តាលមួយ ដែលសមស្រប» ។

លោក ទួន សុភ័ណ អ្នកសម្របសម្រួលថ្នាក់ជាតិអង្គការ ILO ប្រចាំកម្ពុជា បានអោយដឹងដែរថា៖ «សិក្ខាសាលា​រយៈពេលមួយថ្ងៃកន្លះនេះ អាចនឹងជំរុញឱ្យយើងធ្វើការរួមគ្នា និងសំដៅធ្វើម៉េចឱ្យអាចបង្កើតបាន នូវដំណើរការ​កំណត់ប្រាក់ឈ្នួល ដែលមានលក្ខណៈរឹងមាំ និងផ្អែកលើផលនៃការស្រាវជ្រាវ ជាលក្ខណៈវិទ្យាសាស្រ្ត សម្រាប់​ធ្វើការកែសម្រួលប្រឈ្នួលអប្បបរមា នៅក្នុងប្រទេសកម្ពុជា នៅក្នុងពេលអនាគត តាមរយៈគណកម្មណប្រឹក្សា​ការងារ។

លោក អាត់ ធន់ ប្រធានសហជីពប្រជាធិបតេយ្យកម្មករកាត់ដេរកម្ពុជា ថ្លែងថាកន្លងមកមានចំនុចមួយចំនួន ដែល​មានភាពខ្វះខាតក្នុងការកំណត់ប្រាក់ឈ្នួល ដែលធ្វើឱ្យមានបញ្ហាចម្រូងចម្រាស់ មិនចេះចប់មិនចេះហើយ ដូចជា មិនមានការសិក្សាស្រាវជ្រាវឱ្យបានច្បាស់លាស់ មិនបានពិនិត្យពិភាក្សាគ្នាអោយបានត្រឹមត្រូវ និងមិនមានពេល​គ្រប់គ្រាន់ ក្នុងកំណត់ប្រាក់ឈ្នួលដោយគណកម្មការប្រឹក្សាការងារ ក៏ដូចជាមានយន្តការកំណត់​ប្រាក់ឈ្នួលមួយ​ច្បាស់លាស់ នៅក្នុងប្រទេសកម្ពុជា។ លោកថា «យើងបានធ្វើការកំណត់ប្រាក់ឈ្នួលនេះ៩ដង ហើយតែវានៅ​តែមិន​ឆ្លើយតប ទៅនឹងកម្មករចង់បាន»។

លោកបានអះអាងថា ដើម្បីបញ្ចប់បញ្ហាចម្រូងចម្រាស់ លើកំណត់ប្រាក់ឈ្នួលអប្បមានេះ គួរតែទី១.មានការជជែក​ដោយមានការរួមគ្នា រវាងនិយោជក កម្មករនិយោជិក និងខាងរដ្ឋាភិបាលឱ្យមានការរួមគ្នា កំណត់យន្តការនៃការ​សិក្សា​ឱ្យបានច្បាស់លាស់ ទី២.ត្រូវពិនិត្យមើលយោងទៅតាមមូលដ្ឋានសង្គម និងសេដ្ឋកិច្ច និងទី៣.អោយមាន​ការ​សិក្សាឱ្យស្របទៅតម្រូវការក្រុមប្រឹក្សាការងារ។

លោក អាត់ ធន់ អះអាងទៀតថា បញ្ហាមួយចំនួនដែលសហជីពយល់ថា មិនទាន់ត្រូវបានដោះស្រាយ ដូចជាបញ្ហា​កម្មករ២១នាក់ ដែលបានចាប់ខ្លួនក្នុងពេលតវ៉ា និងបញ្ហាមួយទៀត ក៏ជាដើមចមនៃជម្លោះនេះផងដែរ។

សូមបញ្ជាក់ថានៅក្នុងសិក្ខាសាលានេះដែរ មានគោលបំណង៣សំខាន់៖ ទី១. ឱ្យភាគីទាំង៣ឯកភាពគ្នា ទៅលើ​គោលការណ៍ដែលត្រូវកំណត់ ប្រាក់ឈ្នួលអប្បមា ដោយមានជំនឿថា បើសិនជាកំណត់បាននឹងលែងមានជម្លោះ ហើយចាប់ពីឆ្នាំក្រោយទៅ អាចអនុវត្តបាននូវកិច្ចព្រមព្រៀងនេះ - ទី២. ការកំណត់ប្រាក់ឈ្នួលអប្បមានេះ ត្រូវឆ្លើយ​តបទៅនឹងតម្រូវការសង្គម និងតម្រូវការនៃសេដ្ឋកិច្ច កុំឱ្យយោងទៅតាមការនឹកឃើញ និងគ្មានការវិភាគច្បាស់លាស់ និងទី៣. ទាំង៣ភាគីនេះនឹងចូលតុចរចា ដោយមិនមានការគម្រាមកំហែង និងមានភាពស្មើសិទ្ធិគ្នា៕

----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី២៤ មេសា ២០១៤