លោក ម៉ម សូណង់ដូ ប្រធានវិទ្យសំបុកឃ្មុំ បានអះអាងអោយដឹងថា បើទោះបាតុកម្មនៅថ្ងៃទី៣១ មិនាខាងមុខ លោកមិនដឹកនាំ ក៏នៅមានប្រពលរដ្ឋជាច្រើនទៀត ដែលគេនឹងធ្វើ។ ការប្រមូលគ្នាធ្វើបាតុកម្មរបស់ពលរដ្ឋ ដែល​ទំនងជាមិនអាចអាក់ខានបានឡើយ បើទោះជាអាជ្ញាធរមិនអនុញ្ញាតឲ្យធ្វើក៏ដោយ។

លោក ម៉ម សូណង់ដូ ក្នុងសន្និសិទសាព័ត៌មាន នៅទីស្នាក់ការរបស់វិទ្យិសំបុកឃុំ កាលពីថ្ងៃទី២៤ ខែមិនា ឆ្នាំ២០១៤។ (រូបថត MONOROOM.info/ S.Tith)

សិទ្ធិ - បាតុកម្ម ថ្ងៃទី៣១ ខែមិនា ឆ្នាំ២០១៤ ទាមទារក្នុងការស្នើសុំតម្លើងកំលាំងផ្សាយនៅតាមបណ្តាខេត្ត និង​សុំ​ប្រេកង់បង្កើតទូរទស្សន៍ របស់ប្រធានវិទ្យុសំបុកឃ្មុំ លោក ម៉ម សូណង់ដូ នឹងនៅតែបន្តតាមការគ្រោងទុក បើទោះបី​ជាសាលារាជធានីភ្នំពេញមិនអនុញ្ញាតអោយធ្វើក៏ដោយ។

ប៉ុន្តែការធ្វើបាតុកម្មក្នុងពេលខាងមុខនេះ នឹងមិនដឹកនាំដោយលោក ម៉ម សូណង់ដូ នោះទេ ដោយសារមិនមាន​ការ​អនុញ្ញាតពីសាលាក្រុងភ្នំពេញ តែជាបាតុកម្មរបស់ប្រជាពលរដ្ឋនៅតាមបណ្តាខេត្ត ដែលចង់បានកម្លាំងផ្សាយ​របស់​វិទ្យុ​របស់​លោក ផ្សាយទៅដល់។ លោក ម៉ម សូណង់ដូបានដឹងថា លោកនឹងចូលរួមក្នុងថ្ងៃបាតុកម្មនោះ ប៉ុន្តែមិនមែន​ជាអ្នក​ដឹកនាំបាតុកម្មទេ គ្រាន់ក្នុងនាមជាប្រជាពលរដ្ឋម្នាក់ ដែលទាមទារសិទ្ធិសេរីភាពក្នុងការបញ្ចេញមតិ និងទទួល​ព័ត៌មាន។

ការថ្លែងរបស់របស់ប្រធានវិទ្យុសំបុកឃ្មុំរូបនេះ ធ្វើឡើងក្នុងសន្និសិទសាព័ត៌មាន នៅទីស្នាក់ការរបស់វិទ្យិសំបុកឃុំ កាលពីថ្ងៃទី២៤ ខែមិនា ឆ្នាំ២០១៤ម្សិលមិញនេះ។ លោកបានបញ្ជាក់ទៀតថា «ខ្ញុំជាអ្នកគោរពច្បាប់ បើខ្ញុំសរសេរ​ច្បាប់សំណូមពរទៅសាលាក្រុងភ្នំពេញ ប្រសិនបើសាលាក្រុងមិនអនុញ្ញាត ខ្ញុំមិនអាចធ្វើបានទេ ហើយខ្ញុំក៏មិនទទួល​ខុសត្រូវអំពីបាតុកម្មហ្នឹងដែរ ដូច្នេះប្រសិនបើខ្ញុំអត់ធ្វើ វាជារឿងរបស់រដ្ឋាភិបាល និងប្រជាពលរដ្ឋក្នុងការ​ទាមទារ​សិទ្ធសេរីភាព ក្នុងការបញ្ចេញមតិ និងទទួលព័ត៌មានទៅវិញទេ។ ប៉ុន្តែក្នុងនាមខ្ញុំជាប្រជាពលរដ្ឋ ខ្ញុំមានសិទ្ធក្នុង​ការ​ទាមទារសិទ្ធសេរីភាព ក្នុងការបញ្ចេញមតិនិងទទួលព័ត៌មានផងដែរ។»

លោក កើត ឆែ នាយករដ្ឋបាលសាលារាជធានីភ្នំពេញ បានបញ្ជាក់នៅក្នុងកិច្ចប្រជុំ ស្តីពីសំណើរសុំធ្វើបាតុកម្ម​របស់​លោក ម៉ម សូណង់ដូ កាលពីព្រឹកថ្ងៃទី២៤ ខែមិនា ថា បញ្ហាស្នើ Relay ការផ្សាយនេះ ជាបញ្ហាមួយដែលស្មុកស្មាញ ព្រោះមានសំណើរជាច្រើន ដែលក្រសួងព័ត៌មានមិនអាចផ្តល់អោយ។ បើផ្តល់ Relay អោយលោក ម៉ម សូណង់ដូ តែមានអ្នកផ្សេងទៀត ដែលគេសុំដែរតែមិនទាន់បាន នោះគេនឹងមិនសុខចិត្ត។

ចំពោះសំណើរសុំធ្វើបាតុកម្ម នៅទីលានប្រជាធិបតេយ្យនៅថ្ងៃទី៣១ ខែមិនា របស់ប្រធានវិទ្យុសំបុកឃ្មុំលោក កើត ឆែ លើកឡើងថា សាលារាជធានីភ្នំពេញមិនអាចអនុញ្ញាតអោយធ្វើបានទេ ដោយសារទុកពេលធ្វើការ​ស៊ើបអង្កេត​បន្ថែមទៀត។ ប្រសិនបើការស្នើសុំពុំទាន់បានអនុញ្ញាត អ្នកស្នើសុំនាំគ្នាធ្វើបាតុកម្មទាមទារ បញ្ហានេះនឹងបណ្តាល​អោយជាទម្លាប់អាក្រក់នៅពេល ដែលស្នើសុំអ្វីមួយមិនបាន នាំគ្នាធ្វើបាតុកម្ម។

ការបដិសេធមិនឲ្យធ្វើបាតុកម្មរបស់សាលក្រុងភ្នំពេញ តែងរងការរិះគន់ពីសំណាក់អ្នកឃ្លាំមើលសិទ្ធិមនុស្ស ដោយ​បានចាត់ទុកថា ជាសេចក្ដីសម្រេចដែលរំលោភលើសិទ្ធជាមូលដ្ឋាន មានចែងក្នុងរដ្ឋធម្មនុញ្ញរបស់ប្រទេស។ ជុំវិញ​ការបដិសេធរបស់ក្រសួងព័ត៌មាន ទាក់ទងនឹងការផ្ដល់ហ្វ្រេកង់បន្ថែម និងកម្លាំងផ្សាយបន្ថែមទៅដល់ខេត្តផ្សេងៗ​នោះ ក្រុមអ្នកតាមដានស្ថានការណ៍នេះ ក៏បានបរិហារការសម្រេចចិត្តនេះដែរ ដោយបានចោទក្រសួងព័ត៌មាន មាន​ការរើសអ៊ើង និងប្រកាន់និន្នាការនយោបាយ ព្រោះតែវិទ្យុសម្បុកឃ្មុំផ្ដល់នូវព័ត៌មានឯករាជ្យ មិនគាំទ្ររដ្ឋាភិបាល និងនយោបាយរបស់គណបក្សកាន់អំណាច។

ការលើកឡើងរបស់ ក្រុមអ្នករិះគន់ ត្រូវបានលោក ឃុន សំខាន់ ប្រធានមន្ទីរព័ត៌មានរាជធានីភ្នំពេញ បកស្រាយថា «ក្រួងព័ត៌មាន អត់មានគាបសង្កត់ ពីបញ្ហាការផ្សាយព័ត៌មានរបស់គាត់ទេ។ រីឯបញ្ហាសុំតម្លើងប្រេកង់ ខ្ញុំគិតថា​បើ​តាម​លក្ខណៈបច្ចទេស ប្រហែលជាវាអត់មានមែន ព្រោះមកទល់ថ្ងៃនេះ មានអ្នកដែលសុំបើកស្ថាននីយ៍វិទ្យុច្រើនណាស់ បានទៅសុំក្រសួង តែសំខាន់វាអត់មានប្រេកង់។ យើងឃើញហើយ វិទ្យុមួយចំនួននៅទីក្រុងភ្នំពេញ ស្តាប់មិនសូវបាន ដោយសារវាឆ្លងប្រេកង់គ្នា។»៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី ២៥ មីនា ២០១៤