ប្រជាពលរដ្ឋប្រមាណជាងមួយរយនាក់មកពីពីរភូមិ ក្នុងខេត្តរតនាគីរី បានជួបជុំគ្នា នៅមុខតុលាការខេត្តទាមទារ ឲ្យ​តុលាការនេះដោះលែងតំណាងសហគមន៍ជនជាតិដើមភាគតិចនៅភូមិម៉ាស់ ស្រុកអូរជុំ លោក ហាំង នឿ ដោយ​គ្មាន​លក្ខខ័ណ្ឌ និងការដាក់ពាក្យប្តឹងអ្នកស្រីលី សុខងីម ពីបទរំលោភយកដីចំការ និងដីព្រៃបម្រុងទុក។

ពលរដ្ឋនៅមុខសាលាដំបូងខេត្តរតនគីរី ថ្ងៃទី១៧ ខែមីនា ឆ្នាំ២០១៤។ (រូបថត សមាគមអាដហុក)

ប្រព័ន្ធយុត្តិធម៌ - លោក ហាំង នឿ តំណាងសហគមន៍ជនជាតិដើមភាគតិច និងតំណាងបីរូបផ្សេងទៀត ត្រូវបាន​សមត្ថកិច្ចឃុំម៉ាសហៅទៅសាកសួរ និងបន្តសាកសួរ រហូតដល់អធិការដ្ឋានស្រុកអូរជុំ។ នៅពេលសាកសួរនោះ តំណាងសហគមន៍រូបនេះ ត្រូវបានបញ្ជូនទៅដាក់ពន្ធនាគារតែម្តង ពាក់ព័ន្ធរឿងបំផ្លាញទ្រព្យសម្បត្តិអ្នកដទៃ។ ការ​ឃុំខ្លួនដែលត្រូវបានបរិហាររិះគន់ ដោយមន្ត្រីឃ្លាំមើលសិទ្ធិមនុស្ស ដោយបានចាត់ទុកថា ជាចេតនាបំបាក់ស្មារតី​ប្រជាពលរដ្ឋណា ដែលហ៊ានចេញមុខធ្វើជាតំណាងសហគមន៍។

លោកឆាយ ធី មន្រ្តីឃ្លាំមើលសិទ្ធិ​មនុស្ស​អាដហុកប្រចាំខេត្តរតនគីរី បានថ្លែងបញ្ជាក់ថា ប្រធានសហគមន៍ជនជាតិ​ដើម​ភាគតិចនៅភូមិម៉ាស់ ស្រុកអូរជុំ នេះត្រូវបានតុលាការខេត្តរតនគិរីឃុំខ្លួន យ៉ាងប្រញាប់កាលពី​ម៉ោង១០ព្រឹក​ថ្ងៃទី១៥ ខែមីនា ឆ្នាំ២០១៤នេះ ក្នុងរឿងទំានាស់ដីធ្លី៤០០ហិកតា(ដីចំការ និងដីព្រៃសហគមន៍) ស្មើនឹង៦៦គ្រួសារ និងភូមិតងក្រពូល៣៤ហិកតា (ដីចំការស្វាយចន្ទី) ស្មើនឹង១៨គ្រួសារ។

អ្នកស្រី ជន សាជី ភិរិយាលោក ហាំង នឿ ដែលចេះនិយាយភាសាខ្មែរតិចតួច បានស្រែកទ្រហោរយំ នៅមុខសាលា​ដំបូងនាព្រឹកថ្ងៃទី១៧ ខែមីនា ដោយរៀបរាប់ថា «សូមដោះលែងប្តីខ្ញុំទៅ ដោះលេងទៅ។ (…) អត់មានមនុស្ស​ធ្វើការ​ឲ្យខ្ញុំ ខ្ញុំអាណិតប្តីខ្ញុំណាស់ ដោះលែងទៅ ដោះលែងក្នុងថ្ងៃនេះហើយ។»

លោក បាំង ង៉ាន តំណាងប្រជាសហគន៍ដែលបានចូលរូមនោះបញ្ជាក់ថា ការចាប់ខ្លួនលោក ហាំង នឿ នេះ កើត​ចេញពីទំនាស់ ដីធ្លីចំនួន៤០០ហិកតា បន្ទាប់ពីតុលាការ ចេញសេចក្តីសម្រេចអឹបអូសដី ពីកូនបំណុលឈ្មោះសេង វិសិដ្ឋ មកឲ្យអ្នកស្រី លី សុខងីម។

ដីសហគមន៍ចំនួន ៤០០ ហិកតានេះ ត្រូវបានប្រជាសហគមន៍ប្រគល់ទៅឲ្យ លោក សេង វិសុទ្ធិ ជាថ្នូរនឹងការ​សន្យា​ជួយឧបត្ថម្ភប្រាក់ពីរម៉ឺនដុល្លារ សាងសង់ស្ពាន ផ្លូវសាលារៀនជាដើមសម្រាប់អ្នកភូមិ។ តែប្រជាសហគមន៍​បាន​លើក​ឡើងថា ក្រោយការផ្តិតមេដៃលើក្រដាសសរ ឲ្យលោក សេង វិសិដ្ឋ បំពេញឯកសារក្នុងការប្រគល់ដីរូចរាល់ មក​ទល់​និងពេលនេះលោក សេង វិសិទ្ធិ មិនបានអនុវត្តតាមកិច្ចសន្យារបស់ខ្លួនជាមួយអ្នកភូមិទេ។ ដច្នេះហើយ ទើបអ្នក​ប្រជា​សហគមន៍តវ៉ា ក្នុងការមិនឲ្យមានការកាប់បំផ្លាញព្រៃ និងការដកហូតនូវដីនោះមកវិញ។

តំណាងប្រជាសហគន៍លោក បាំង ង៉ាន រូបនេះបានបន្តថា ក្រោយមកអ្នកស្រី លី សុខងីម បានជួលកម្មករកាប់ឆ្កា​រានព្រៃយកដីចំការ និងដីព្រៃបម្រុងទុករបស់សហគមន៍។ ដោយតំណាងសហគមន៍ទាំងនោះ បាននាំគ្នាទៅហាម​ឃាត់​ជាច្រើនលើកច្រើនសារ មិនស្តាប់ និងក៏មិនព្រមឈប់កាប់ ជាមួយគ្នានេះ ខាងអាជ្ញាធរមូលដ្ឋានភូមិ-ឃុំ ក៏មិន​អើពើទៀតនោះ ទើបពួកគាត់ជាតំណាងសហគន៍ មានគ្នាប្រមាណជាង៤០នាក់ ចូលការពារជាប្រយោជន៍រួម​នៃ​សហគមន៍ មិនឲ្យបន្តការកាប់ និងក៏បានដុតកូនឈើដែលបានគរទុកចោលត្រូវថ្ងៃ ត្រូវភ្លៀង និងកូនឈើសំរាប់​សង់​ខ្ទមចំការ ដែលស្ទើរផុយរលួយទាំងនោះចោលទៅ។

ទស្សនាវដ្តីមនោរម្យ.អាំងហ្វូ មិនអាចសុំការបញ្ជាក់ពីលោកព្រះរាជអាជ្ញារង អមតុលាការខេត្តរតនគិរី លោក ម៉ម វណ្ណដា បានទេក្នុងថ្ងៃទី១៧ ខែមីនានេះ។ តែលោកធ្លាប់បានបញ្ជាក់យ៉ាងខ្លី ក្នុងថ្ងៃទី១៥ ខែមីនា បន្ទាប់ពីបានចោទ​ប្រកាន់ និងសម្រេចឃុំខ្លួនលោក ហាំង នឿនោះថា សាមីខ្លួនបានទទួលស្គាល់ក្នុងការដុតឈើ និងរោងរបស់អ្នកស្រី លី សុខងីម។

បើយោងតាមមន្រ្តីឃ្លាំមើលសិទ្ធិ​មនុស្ស លោក ឆាយ ធី មានការខិតខំខ្នះខ្នែងពីសំណាក់ពលរដ្ឋ និងតំណាង​សហគមន៍ ស្វែងរកការអន្តរាគន៍តាមផ្លូវច្បាប់ តាំងពីថ្នាក់អាជ្ញាធរ រហូតដល់ថ្នាក់ខុទ្ទកាល័យ លោកនាយករដ្ឋមន្រ្តី ហ៊ុន សែន ឲ្យជួយអន្តរាគមន៍តាំងពីខែកុម្ភៈ ឆ្នាំ២០១៤នេះមក តែគ្មានលទ្ធផលអ្វីឡើយ បើទោះជាខុទ្ធកាល័យនេះ បានចេញលិខិតអន្តរាគមមកខេត្តក៏ដោយ៕

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី១៧ ខែមីនា ឆ្នាំ២០១៤