ការ​បោះ​ឆ្នោត​ឡើង​វិញ៖ «តែ​មួយពព្រិច​ភ្នែក វាទៅ​រួច​ទាំង​អស់!»

បើទោះជារបៀបវារៈនៃការបោះឆ្នោតឡើងវិញ មិនត្រូវបានគណៈកម្មការចម្រុះរបស់គណបក្សប្រជាជនកម្ពុជា និង​គណបក្សសង្រ្គោះជាតិ លើកយកមកជជែកគ្នាក៏ដោយ ក៏ការបោះឆ្នោតឡើងវិញ ត្រូវបានគេមើលឃើញថា អាច​នឹងកើតឡើង តាមរយៈការសម្រេចចិត្តតែមួយពព្រិចភ្នែក របស់ថ្នាក់ដឹកនាំកំពូល នៃគណបក្សទាំងពីរ ក្រោយ​ការ​កែទម្រង់ការបោះឆ្នោតត្រូវបានបញ្ចប់។
Loading...
  • ដោយ: អ៊ុំ បូរី
  • កែប្រែចុងក្រោយ: March 17, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

បើទោះជារបៀបវារៈនៃការបោះឆ្នោតឡើងវិញ មិនត្រូវបានគណៈកម្មការចម្រុះរបស់គណបក្សប្រជាជនកម្ពុជា និង​គណបក្សសង្រ្គោះជាតិ លើកយកមកជជែកគ្នាក៏ដោយ ក៏ការបោះឆ្នោតឡើងវិញ ត្រូវបានគេមើលឃើញថា អាច​នឹងកើតឡើង តាមរយៈការសម្រេចចិត្តតែមួយពព្រិចភ្នែក របស់ថ្នាក់ដឹកនាំកំពូល នៃគណបក្សទាំងពីរ ក្រោយ​ការ​កែទម្រង់ការបោះឆ្នោតត្រូវបានបញ្ចប់។


ខាងមុខ៖ លោក ប៊ិន ឈិន (ខាងឆ្វេង) និងលោក ជាម យៀប មន្ត្រីជាន់ខ្ពស់គណបក្សប្រជាជនកម្ពុជា នៅមន្ទីរ​ព្រឹទ្ធសភា ថ្ងៃទី១០ ខែមីនា ឆ្នាំ២០១៤។ (រូបថត MONOROOM.info/ S. Tith)

នយោបាយកម្ពុជា - ប្រធានក្រុមការងារបច្ចេកទេសខាងគណបក្សប្រជាជនកម្ពុជា លោក ប៊ិន ឈិន បានថ្លែងប្រាប់​អ្នកការសែត​នៅថ្ងៃ​ទី១៧ មីនា នៅវិមានព្រឹទ្ធសភាថា ការបោះឆ្នោតឡើងវិញមិនមានទេ បើមានក៏ត្រូវចាំដល់​ឆ្នាំ​២០១៨ដែរ ព្រោះ​ឥឡូវ​នេះ ជិតកន្លះឆ្នាំទៅហើយដែលរដ្ឋសភាបានធ្វើការ ហើយមាត្រា៧៨ នៃរដ្ឋធម្មនុញ្ញក៏បាន​បញ្ជាក់ដែរថា ការបោះ​ឆ្នោត​ឡើងវិញ គឺមិនអាចកើតឡើងបានទេ ដរាបណារដ្ឋាភិបាលមិនត្រូវបានគេទម្លាក់ពីរដង ក្នុងរយៈពេល១២ ខែ។

តែលោក ប៊ិន ឈិន បានព្រលយឲ្យអ្នកការសែតដឹងថា៖ «បើថ្នាក់ដឹកនាំលោកត្រូវគ្នា តែមួយពព្រិចភ្នែកទេ ហើយ​យើងក៏នៅតែសង្ឃឹមដែរ ព្រោះឯកឧត្តម សុន ឆ័យ លើកឡើងថាទាមទារអ៊ីចេះ ទាមទារអ៊ីចោះ ទីចុងបំផុតទៅ តែ​មួយ​​ប្រិចទៅ វាទៅរួចទាំងអស់ ហើយចាំដល់ពេលហ្នឹង ចាំសួរខ្ញុំទៀត ថាហេតុមិចបានទៅញ្ចឹង»។

លោក សុន ឆ័យ ប្រធានក្រុមការងារបច្ចេកទេសខាងគណបក្សសង្រ្គោះជាតិ ក៏បានឲ្យអ្នកការសែតដឹង ក្នុងឱកាស​ដដែលនោះថា៖ «អ្វីដែលឯកឧត្តម ប៊ិន ឈិន លើកឡើងមាន២ចំណុច គឺទី១. បើយោងលើច្បាប់គឺការបោះឆ្នោត​ឡើងវិញមិនអាចធ្វើបាន ហើយទី២. បើមានការយល់ព្រមផ្នែកនយោបាយពីថ្នាក់ដឹកនាំកំពូល អាហ្នឹងអាចធ្វើបាន»។

ប្រធានក្រុមការងារបច្ចេកទេស ខាងគណបក្សសង្រ្គោះជាតិដដែលនេះ បន្ថែមថា បើមានការព្រមព្រៀង​ផ្នែក​នយោបាយ ផ្នែកច្បាប់ក៏អាចនឹងកែប្រែទៅតាមនឹងដែរ ហើយប្រទេសណាក៏គេត្រូវឆ្លងកាត់ករណីដូចគ្នានឹងដែរ។ លោក សុន ឆ័យ បញ្ជាក់ថា៖ «គណបក្សសង្រ្គោះជាតិត្រូវចូលសភាឬយ៉ាងណានោះ គឺត្រូវចាប់ផ្តើមពីការកែទម្រង់​ការបោះឆ្នោត ដោយរាប់ទាំងការដាក់ស្ថាប័នបោះឆ្នោតទៅជាស្ថាប័នធម្មនុញ្ញជាដើម»។

លោក សម រង្ស៊ី ប្រធានគណបក្សសង្រ្គោះជាតិ កន្លងមកបានអះអាងថា ការចរចាជាមួយគណបក្សប្រជាជនកម្ពុជា គឺជាផ្នែកមួយសំខាន់ឈានទៅទម្លាយភាពជាប់គាំងផ្នែកនយោបាយក្រោយការបោះឆ្នោត ហើយការចរចាលើក​ការ​កែទម្រង់ការបោះឆ្នោតនេះ នឹងនាំឲ្យមានការបោះឆ្នោតឡើងវិញមុនបញ្ចប់អាណត្តិ។

រហូតមកដល់ពេលនេះ គណបក្សប្រជាជនកម្ពុជា មិនបានបង្ហាញការឯកភាពឲ្យ​មានការបោះឆ្នោះឡើងវិញ​នៅ​ឡើយទេ ដោយអះអាងថាការទាមទារបោះឆ្នោតឡើងវិញ មុនបញ្ចប់អាណត្តិ គឺជាទង្វើខុសច្បាប់។ តែអ្នកអ្នក​វិភាគ​នយោបាយឯករាជ្យកម្ពុជាបានលើកឡើងថា មធ្យោបាយល្អបំផុតសម្រាប់ទម្លាយភាពជាប់គាំងនយោបាយកម្ពុជា គឺមានតែគណបក្សសង្រ្គោះជាតិត្រូវចូលប្រជុំសភា ហើយគណបក្សប្រជាជនកម្ពុជាត្រូវយល់ព្រមបោះឆ្នោតមុន បញ្ចប់អាណត្តិ ក្រោយការកែទម្រង់ការបោះឆ្នោតមួយ ដែលគួរឲ្យជឿជាក់ពីគណបក្សទាំងពីរ៕

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី១៧ មីនា ២០១៤

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...