ការបង្កើតគណបក្ស«ថ្មី» របស់ព្រះអង្គម្ចាស់ នរោត្ដម រណឬទ្ធិ បានរងនូវប្រតិកម្មលើកឡើងថា ពិតមែនជាបក្ស«ថ្មី» នៅតែជាតួអង្គ«ចាស់»។ ដូច្នេះរាល់ការសម្តែង ក៏នឹងមិនឃ្លាតឆ្ងាយពី«ទម្លាប់»ចាស់ដដែលៗនោះឡើយ។ សម្រាប់​លោក ញឹក ប៊ុនឆៃ អគ្គលេខាធិការគណបក្សរាជានិយម ហ៊្វុនស៊ិនប៉ិច និងជាអតីតគូរសត្រូវក្នុងគណបក្សនេះ កាលពី​ព្រះអង្គធ្លាប់ជាប្រធាននោះ បាននិយាយថា ព្រះអង្គមិនមានលទ្ធភាពក្នុងការដឹកនាំ ដោយការបង្រួបបង្រួម​សមាជិក​ក្នុងបក្សទេ។

ព្រះអង្គម្ចាស់នរោត្តម រណឫទ្ធិយាងទៅបោះឆ្នោតកាលពីថ្ងៃ៣មិថុនឆ្នាំ២០១២កន្លងទៅ ក្នុងវត្តមួយនៃ​រាជធានី​ភ្នំពេញ។ (រូបថត ឯកសារ)

នយោបាយកម្ពុជា - ព្រឹត្តិការណ៍ថ្មីមួយ ដែលបានចូលមកបន្ថែមសាច់រឿង ឲ្យនយោបាយកម្ពុជា​ដែលកំពុង​មាន​ភាពតានតឹងស្រាប់ រាប់តាំងពីក្រោយការបោះឆ្នោត ថ្ងៃទី២៨ ខែកក្កដា ឆ្នាំ២០១៣ រហូតមកដល់ពេលនេះ នោះគឺ​អតីតអ្នកនយោបាយទស្សវត្សឆ្នាំ៩០ ព្រះអង្គម្ចាស់នរោត្ដម រណឫទ្ធិ ដែលធ្លាប់ធ្វើសច្ចារថា ទ្រង់នឹងនៅការពារអង្គ​ព្រះមហាក្សត្រ និងមហាក្សត្រីយានី ដោយមិនប្រឡូកក្នុងឆាយនយោបាយនោះ បានត្រឡប់មកបង្កើត​គណបក្សថ្មី​មួយ ឈ្នោះថា«គណបក្ស សង្គមរាស្ត្ររាជាធិបតេយ្យ»។

ការវិលត្រឡប់មករួមក្នុងឆាកនយោបាយរបស់ព្រះអង្គ ត្រូវបានគេមើលឃើញថា ជាសិទ្ធិផ្ទាល់របស់ព្រះអង្គក្នុង​វិស័យ​នយោបាយ ស្របតាមច្បាប់កម្ពុជា និងក្នុងនាមព្រះអង្គជាពលរដ្ឋកម្ពុជាមួយរូប។

តែសម្រាប់អតីតគូបដិបក្ខរបស់ព្រះអង្គក្នុងគណបក្សរាជានិយម ហ៊្វុនស៊ិនប៉ិច និងជាអគ្គលេខាធិការនៃគណបក្សនេះ លោក ញឹក ប៊ុនឆៃ មិនមានជំនឿថា ព្រះអង្គនឹងទទួលបានការគាំទ្រច្រើន ពីប្រជាពលរដ្ឋនោះទេ។ មូលហេតុសំខាន់ ដោយសារតែអតីតកាលរបស់ព្រះអង្គ មិនមានលទ្ធភាពក្នុងការដឹកនាំ ដោយការបង្រួបបង្រួមសមាជិកក្នុងបក្សទេ មានតែការ​បែក​បាក់គ្នា ដែលទាំងនេះហើយជាការបង្ហាញនូវ«ភាពខ្សោយ»របស់ទ្រង់ ដែលអាចធ្វើឲ្យ​ប្រជាពលរដ្ឋ និងសមាជិកសមាជិការរបស់ព្រះអង្គ អស់ជំនឿនិងការទុកចិត្តនោះ។

លោក ញឹក ប៊ុនឆៃ បានថ្លែងក្នុងកិច្ចសម្ភាសជាមួយទស្សនាវដ្តីមនោរម្យ.អាំងហ្វូ  នៅថ្ងៃទី២៦ ខែកុម្ភៈ ឆ្នាំ២០១៤នេះ​ថា លោកមិនមានការព្រួយបារម្ភ ចំពោះការបង្កើតគណបក្សរាជានិយមថ្មីនេះនោះទេ ព្រោះកាលពី​ព្រះអង្គបង្កើត​គណបក្ស នរោត្តម រណឫទ្ធិ ភាគ​ច្រើនអ្នកដែលមិនជឿព្រះអង្គ ក៏មិនបានចាកចេញពីហ្វុនស៊ីនប៉ិចដែរ តែបើមាន​នោះក៏ចំនួនតូចដែរ ដែលនឹងមិន​អាចជៀសផុត។ អគ្គលេខាធិការបក្សរាជានិយមដ៏មានឥទ្ធិពល បានថ្លែងថា «ប្រជា​ពលរដ្ឋសព្វថ្ងៃដែលកំពុងប្រឈម នឹងបញ្ហាដីធ្លី ភាពអយុត្តិធម៌ អំពើពុករលួយ ចង់រកអ្នកណាដែលអាចជួយ​ដោះ​ស្រាយ នូវបញ្ហាប្រឈមនេះបាន។ ទ្រង់រណឫទ្ធិ ប្រជាពលរដ្ឋបានយល់ពីព្រះអង្គ តាំងពីអាណត្តិទីមួយឆ្នាំ១៩៩៣​មក និងអាណត្តិទីពីរឆ្នាំ១៩៩៨មក បានបោះឆ្នោតគាំទ្រ តែមិនឃើញមានការជួយដោះស្រាយអ្វីពីព្រះអង្គទេ។»

ជុំវិញការត្រឡប់មកវិញរបស់ព្រះអង្គម្ចាស់ នរោត្ដម រណឬទ្ធិ នេះដែរ អនុប្រធានផ្នែកដីធ្លី និងធនធានធម្មជាតិ នៃ​សមាគមការពារសិទ្ធិមនុស្ស អាដហុក លោក ចាន់ សុវ៉េត បានវាយតម្លៃថា នោះជាសម្តីអ្នកនយោបាយ​ដែលមិន​ទៀងទាត់ ម្តងឆ្វេង ម្តងស្តាំ កេងចំណេញលើផ្នែកនយោបាយប៉ុណ្ណោះ។

លោក ចាន់ សុវ៉េត បានថ្លែងបញ្ជាក់ថា អ្នកនយោបាយ«ចាញ់ មិនព្រមចាញ់» ជាមួយនឹងការលាប«ពណ៌»​ឲ្យគ្នា​ទៅវិញ ទៅមក។ កុំលាប«ពណ៌»ឲ្យរាស្រ្ត ប្រយុទ្ធប្រឆាំងគ្នា ហើយខ្លួនជាអ្នកនយោបាយអង្គុយមើល អង្គុយសើច។ លោកចង់ឲ្យអ្នកនយោបាយប្រកួតប្រជែងគ្នា តាមបែប«កីឡា» ចាញ់ត្រូវសុខចិត្តចេញ។ ឈរលើហេតុផល​មួយ​ការពារជាតិ ការពារប្រជាជន។ ទុកជាតិជាធំ ប្រជាពលរដ្ឋជាម្ចាស់អំណាច។

ចំពោះការគាំទ្រពីពលរដ្ឋ សម្រាប់ការបង្កើតគណបក្សថ្មីរបស់ព្រះអង្គនេះ ត្រូវបានលោក អំ សំអាត ប្រធានផ្នែក​បច្ចេកទេសស៊ើបអង្កេត របស់អង្គការការពារសិទ្ធិមនុស្ស លីកាដូ ពន្យល់ថា ជាបញ្ហាសំខាន់បំផុត ដើម្បីឲ្យជីវិត​នយោបាយអាចដើរទៅបានវែងឆ្ងាយបាន។ លោក បានថ្លែងដូច្នេះថា «ការបង្កើតគណបក្សនយោបាយ​ពេលណា​ក៏បាន តែបញ្ហាសំខាន់គឺការគាំទ្រពីប្រជាពលរដ្ឋ»។

មកទល់នឹងពេលនេះ ទស្សនាវដ្ដីមនោរម្យ.អាំងហ្វូ បានស្វែងរកប្រតិកម្មពីព្រះអង្គម្ចាស់ នរោត្ដម រណឬទ្ធិ និងអ្នក​ដែលស្និតនឹងព្រះអង្គ តែនៅមិនទាន់មានការឆ្លើយតបនៅឡើយ។

សូមរម្លឹកផងដែរថា ជាងម្ភៃឆ្នាំមុន ទ្រង់ធ្លាប់ជានាយករដ្ឋមន្ត្រីទីមួយ នៃសហនាយករដ្ឋមន្រ្តីក្នុង​ប្រទេសកម្ពុជាឆ្នាំ​១៩៩៣។ នៅក្នុងដំណើរនយោបាយរបស់ទ្រង់ បន្ទាប់ពីត្រូវបានទម្លាក់ចេញពីតំណែង ជាប្រធាន«ប្រវត្តិសាស្ត្រ»​នៃគណបក្សហ៊្វុនស៊ិនប៉ិច ព្រះអង្គម្ចាស់ នរោត្ដម រណឬទ្ធិ បានចេញទៅបង្កើតគណបក្សមួយទៀត ឈ្មោះគណបក្ស​នរោត្ដម រណឫទ្ធិ។ សម្រាប់គណបក្សសង្គមរាស្ត្ររាជាធិបតេយ្យ ដែលជាគណបក្សថ្មីនេះ ចាប់ពីឆ្នាំ២០១៤នេះតទៅ ព្រះអង្គបានថ្លែងបញ្ជាក់ថា មានបំណងចង់ចូលរួមប្រកួតប្រជែង ក្នុងការបោះឆ្នោតក្រុមប្រឹក្សារាជធានី- ខេត្ត-ក្រុង ឃុំ-សង្កាត់នាថ្ងៃទី១៨ ខែឧសភា ឆ្នាំ២០១៤ ខាងមុខ៕

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី២៦ ខែកុម្ភៈ ឆ្នាំ២០១៤