គណបក្សប្រជាជនកម្ពុជា ដែលជាគណបក្សគ្រប់គ្រងអំណាច គ្រោងនឹងចំណាយប្រាក់ជាង១លានដុល្លារអាមេរិក សម្រាប់សកម្មជននយោបាយជាង៨ពាន់នាក់ របស់គណបក្សខ្លួន។ ការផ្តល់ប្រាក់យ៉ាងច្រើនសន្ធឹកសន្ធាប់​ ពី​គណបក្សទៅសកម្មជនថ្នាក់ក្រោម ត្រូវបានលោក គល់ បញ្ញា នាយកប្រតិបត្តិឲ្យអង្គការមួយហៅថា គណៈកម្មាធិការ​ដើម្បី​ការបោះឆ្នោតដោយសេរី និងយុត្តិធម៌នៅកម្ពុជា (Comfrel) លើកឡើងថា បើការចំណាយនេះ ធ្វើឡើងក្នុង​ពេលវេលាមិនសមរម្យ គឺមានន័យថា ជាការទិញសន្លឹកឆ្នោត ឬជាអំពើពុករលួយ ក្នុងដំណើរការបោះឆ្នោត។

សកម្មភាពឃោសនារកសម្លេងឆ្នោត របស់យុវជនគណបក្សប្រជាជនកម្ពុជា កាលពីខែកក្កដា ឆ្នាំ២០១៣។ (រូបថត MONOROOM.info/ O. Vary)

នយោបាយកម្ពុជា - លោក គល់ បញ្ញា នាយកប្រតិបត្តិ (Comfrel) បានបញ្ជាក់ប្រាប់ទស្សនាវដ្តីមនោរម្យ.អាំងហ្វូ នៅថ្ងៃទី២០ ខែកុម្ភៈ នេះថា៖ «បើផ្តល់ប្រាក់ ក្នុងពេលឃោសនា បោះឆ្នោត ឬពេលបោះឆ្នោត គឺត្រូវបានគេចាត់ទុកថា ទិញសន្លឹកឆ្នោត តែបើសម្រេចថាផ្តល់ និងផ្តល់ ឲ្យមុនពេលឃោសនា គឺមិនមានបញ្ហាអ្វីនោះទេ។ បើឲ្យមុនគេ មិន​ចាត់ទុកថា ទិញសន្លឹកឆ្នោតទេ តែក៏នូវតែមានបញ្ហា ដែរ កាលដែលឲ្យលុយ ជិតដល់ពេលបោះឆ្នោត គ្រាន់តែច្បាប់ មិនអាចចោទប្រកាន់បាន។»

នាយកប្រតិបត្តិ (Comfrel) ដដែលនេះ បានអត្ថាធិប្បាយទៀតថា នៅប្រទេសប្រជាធិបតេយ្យ និងមានការ​អភិវឌ្ឍន៍​ខ្លាំង គឺសកម្មជន ឬអ្នកគាំទ្រជាអ្នកផ្តល់ប្រាក់ ក្នុងការទ្រទ្រង់ ដំណើរការរបស់គណបក្ស។ តែនៅកម្ពុជា គណបក្ស ឬមន្រ្តីជាន់ខ្ពស់របស់គណបក្ស ជាអ្នកផ្តល់ប្រាក់ដល់សកម្មជន និងអ្នកគាំទ្រនៅរដូវបោះឆ្នោតទៅវិញ នោះប្រហែល​ជាគណបក្សនយោបាយនៅកម្ពុជា «មាន»ជាងប្រជាពលរដ្ឋ ឬអ្នកគាំទ្រ។

ជុំវិញករណីនេះ ទស្សនាវដ្តីមនោរម្យ.អាំងហ្វូ មិនអាចទាក់ទងមន្រ្តីជាន់ខ្ពស់របស់គណបក្សប្រជាជកម្ពុជា ដើម្បីធ្វើការ​អត្ថាធិប្បាយ បាននៅឡើយទេ។ តែបើយោងលើ លោក សាយ ឈុំ ប្រធានគណៈកម្មាធិការកណ្តាល​គណបក្ស​ប្រជាជនកម្ពុជា ក្នុងពេលចុងក្រោយនេះ បានចេញសេចក្តីជូនដំណឹងមួយ ដែលតម្រូវឲ្យប្រធានគណៈកម្មាធិការ​គណបក្ស រាជធានី-ខេត្ត ឧបត្ថម្ភ ដល់ សមាជិកក្រុមប្រឹក្សាឃុំ-សង្កាត់ របស់គណបក្សប្រជាជនកម្ពុជា ក្នុងម្នាក់ៗ ចំនួន៥០ម៉ឺនរៀល ឬ១២៥ដុល្លារ ។

សេចក្តីជូនដំណឹងដដែលនោះ ឲ្យដឹងទៀតថា ថវិកានោះនឹងត្រូវផ្តល់ឲ្យសមាជិកក្រុមប្រឹក្សាឃុំ-សង្កាត់ របស់ គណបក្សប្រជាជនកម្ពុជាដែលមានសមាជិកក្រុមប្រឹក្សាឃុំ-សង្កាត់ចំនួន៨.២៩២នាក់ ដែលសរុបទៅខ្ទង់​ចំណាយ​ប្រហែលជា ជាង១លានដុល្លារ នៅមុនថ្ងៃបុណ្យចូលឆ្នាំខ្មែរ។ គួរកត់សម្គាល់ថា ការបោះឆ្នោតក្រុមប្រឹក្សា​រាជធានី​-ខេត្ត និងក្រុង-ស្រុក-ខណ្ឌ នឹងប្រព្រឹត្តទៅ នៅថ្ងៃទី១៨ ខែឧសភា ខាងមុខនេះ ពោល គឺប្រហែលជា មានរយៈពេល​ជិត១ខែ ក្រោយការផ្តល់ប្រាក់របស់គណបក្សប្រជាជនកម្ពុជា ទៅដល់សកម្មជននយោបាយរបស់ខ្លួន៕

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី២០ ខែកុម្ភៈ ឆ្នាំ២០១៤