កិច្ចចរចានយោបាយជាថ្មី រវាងគណបក្សសង្រ្គោះជាតិ និងគណបក្សប្រជាជនកម្ពុជានៅថ្ងៃទី១៨ ខែកុម្ភៈ គឺជា​ជំហានថ្មីមួយ នៃភាពជាប់គាំងនយោបាយនៅកម្ពុជា ដែលប្រជាពលរដ្ឋទូទៅចង់ឃើញ។ តែសម្រាប់អ្នក​វិភាគ​នយោបាយឯករាជ្យ បានលើកឡើងថា ការចរចាពីការកែទម្រង់គណៈកម្មាធិការជាតិ រៀបចំការបោះឆ្នោត (គ.ជ.ប) និង ការបែងចែកអំណាចនៅរដ្ឋសភា គឺជាសញ្ញាល្អមួយ ចំពោះវិបត្តិនយោបាយ តែវាមិនបានផ្តល់​ប្រយោជន៍​ពិត​ប្រាកដ និងយូរអង្វែងដល់ប្រជាពលរដ្ឋនោះទេ។

បណ្ឌិតកែម ឡី អ្នកវិភាគនយោបាយកម្ពុជាឯករាជ្យ នៅក្នុងសន្និសីទការសែតថ្ងៃទី១៣ ខែមករា ឆ្នាំ២០១៤ នៅសណ្ឋាគារ​អ៊ីមភើរៀល។ (រូបថត MONOROOM.info/ O. Vary)

នយោបាយកម្ពុជា - លោក កែម ឡី អ្នកស្រាវជា្រវបញ្ហាសង្គម និងជាអ្នកវិភាគនយោបាយឯករាជ្យកម្ពុជា បាន​អត្ថាធិប្បាយប្រាប់ទស្សនាវដ្តីមនោរម្យ.អាំងហ្វូ នៅថ្ងៃទី១៧ ខែកុម្ភៈ នេះថា បើគ្រាន់តែចរចាពិនិត្យ​មើលលើមុខ​តំណែងនៅរដ្ឋសភា នៅរដ្ឋាភិបាល និងការកែទម្រង់(គ.ជ.ប) ហើយបណ្តោយឲ្យការកែទម្រង់ពិតប្រាកដ ចំពោះ​បញ្ហាស្នូលជាច្រើន អត់ទៅមុខ នោះគឺជាការព្រួយបារម្ភ សម្រាប់ប្រជាពលរដ្ឋ។

ការលើកឡើងរបស់លោក កែម ឡី បន្ទាប់ពីគណបក្ស​ជាប់ឆ្នោតទាំង​ពីរ គ្រោងនឹងបើកការចរចានយោបាយជាថ្មី នៅថ្ងៃទី១៨ ខែកុម្ភៈ ឆ្នាំ២០១៤ នេះ ដើម្បីទម្លាយភាព​ជាប់គាំងផ្នែកនយោបាយ ក្រោយការបោះឆ្នោតខែកក្កដា​ដ៏​ប្រទាំង​ប្រទើស​។ គណបក្សទាំងពីរបានប្រកាន់ជំហររៀងៗខ្លួន មិនត្រឹមតែទាក់ទងនឹងលទ្ធផលនៃការបោះឆ្នោត ​ប៉ុណ្នោះទេ តែបានជ្រើសរើសវិធីដោះស្រាយ យកឈ្នះតែរៀងៗខ្លួន ទាំងនៅតាមដងផ្លូវ និងនៅលើតុចរចា បង្កឲ្យ​មានភាពជាប់គាំងខាងនយោបាយ រហូតមកទល់ពេលនេះ មានរយៈពេលជាង៦ខែហើយ។

អ្នកស្រាវជា្រវបញ្ហាសង្គម និងជាអ្នកវិភាគនយោបាយឯករាជ្យកម្ពុជា ដដែលនេះបន្តថា ក្រោយការចរចា បើទោះ​ជាគណៈបក្សសង្រ្គោះជាតិ មិនព្រមចូលរដ្ឋសភា ឬមិនមានការឯកភាពបោះឆ្នោតមុនអាណត្តិឡើងវិញក៏ដោយ ក៏​ការចរចារបស់គណបក្សទាំងពីរជាថ្មីនេះ មិនបរាជ័យទាំងស្រុងនោះទេ យ៉ាងហោចណាស់ក៏គណបក្សទាំងពីរនេះ បានផ្លាស់ប្តូរចំណុចនយោបាយគ្នាទៅវិញទៅមក និងឈានទៅមួយជំហានទៀត គឺការព្រមព្រៀងគ្នា លើការកែ​ទម្រង់​យន្តការបោះឆ្នោតជាដើម។

តែលោក កែម ឡី បញ្ជាក់ថា៖ «ការចរចាគួរផ្តោតសំខាន់ទៅលើ កំណែទម្រង់ និងយន្តការជាតិសំខាន់ៗ មានក្រុម​ប្រឹក្សាធម្មនុញ្ញ អង្គភាពប្រឆាំងអំពើពុករលួយ ឧត្តមក្រុមប្រឹក្សាអង្គចៅក្រម ឧត្តមក្រុមប្រឹក្សាការពារជាតិ អាជ្ញាធរ​សាវនកម្មជាតិ បញ្ហាព្រំដែន ជនអន្តោប្រវេសន៍ យុវជនអត់ការងារធ្វើ កាត់បន្ថយភាពក្រីក្រ(...)។ ចរចាលើមាត្រា៧៨ នៃរដ្ឋធម្មនុញ្ញ ឲ្យមានការបោះឆ្នោតមុនអាណត្តិ។ ចរចាលើចំណុចអស់ហ្នឹង និងត្រួតពិនិត្យការអនុវត្ត ជា​មួយ​គ្រប់​ភាគីដោយតម្លាភាព។ បញ្ហាអស់ហ្នឹងសំខាន់ សម្រាប់ប្រជាជន៕»

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី១៧ ខែកុម្ភៈ ឆ្នាំ២០១៤