មេធាវី​ការពារ​ក្ដី កឹម សុខា ថ្លែង​ពី​នីតិវិធី​«កាត់​ក្បាល​តម្រូវ​មួក»​របស់​តុលាការ

ចំណាត់ការរបស់តុលាការកម្ពុជា ប្រឆាំងមេដឹកនាំគណបក្សសង្គ្រោះជាតិ ហាក់មានសន្ទុះ «លឿន​ជាង​ផ្លេក​បន្ទោរ» ទៅ​ទៀត។ មិន​ត្រឹម​តែ​ប៉ុណ្ណឹង​ទេ តែមេធាវី​ការពារ​ក្ដីឲ្យលោក កឹម សុខា អនុប្រធាន (សព្វថ្ងៃ​ជា​ប្រធាន​ស្ដីទី) គណបក្ស​ប្រឆាំង បាន​បរិហារ​ចំណាត់​ការ​ខ្លះ របស់​តុលាការ ថា​មិន​ស្រប​តាម​នីតិវិធី ដែល​មាន​ចែង​នៅ​ក្នុង​មាត្រា​៤៦៦ នៃ​ក្រម​ព្រហ្មទណ្ឌ​នោះ​ឡើយ។
មេធាវី​ការពារ​ក្ដី កឹម សុខា ថ្លែង​ពី​នីតិវិធី​«កាត់​ក្បាល​តម្រូវ​មួក»​របស់​តុលាការ
លោក កឹម សុខា អនុប្រធាន (សព្វថ្ងៃជាប្រធានស្ដីទី) គណបក្សសង្គ្រោះជាតិ។ (រូបថត MONOROOM.info/ O. Vary)
Loading...
  • ដោយ: ដារា រិទ្ធ អត្ថបទ និងយកការណ៍៖ ដារា រិទ្ធ ([email protected]) - ភ្នំពេញ ថ្ងៃទី៣១ សីហា ២០១៦
  • កែប្រែចុងក្រោយ: August 31, 2016
  • ប្រធានបទ: នយោបាយ-យុត្តិធម៌
  • អត្ថបទ: មានបញ្ហា?
  • មតិ-យោបល់

«តើនេះជានីតិវិធី កាត់ក្បាលតម្រូវមួក ឬយ៉ាងណា?» នេះជាចំងល់របស់អ្នកស្រី ម៉េង សុភាវី មេធាវីការពារក្ដី​ឲ្យ​លោក កឹម សុខា ដែលកំពុងឃុំខ្លួនឯង នៅក្នុងទីស្នាក់ការ​គណបក្សរបស់ខ្លួន ទាក់ទងនឹងចំណាត់ការ របស់​តុលាការ​កម្ពុជា​គ្រប់ជាន់ថ្នាក់។

លោក កឹម សុខា អនុប្រធាន (សព្វថ្ងៃជាប្រធានស្ដីទី) គណបក្សសង្គ្រោះជាតិ តាមរយៈមេធាវីរបស់លោក បាន​ប្ដឹង​សាទុក្ខ ទៅដល់តុលាការកំពូល ដើម្បីសុំឲ្យស្ថាប័នយុត្តិធម៌​ចុងក្រោយ និងធំជាងគេរបស់ប្រទេសកម្ពុជា ពិនិត្យ​មើលនីតិវិធី​របស់សាលាឧទ្ធរណ៍ ទាក់ទងនឹងការចោទប្រកាន់ ដែលមេដឹកនាំគណបក្សប្រឆាំងរូបនេះ មិន​បាន​​មក​បង្ហាញខ្លួន តាមការកោះហៅរបស់ចៅក្រមស៊ើបអង្កេត នៅ​តុលាការ​សាលាដំបូងរាជធានី។

នៅក្នុងដីកាកោះមួយ ចុះថ្ងៃទី ២៩ ខែសីហា ឆ្នាំ២០១៦ លោក អ៊ុក គីមសិទ្ធិ អគ្គព្រះរាជអាជ្ញារង នៃ​មហា​អយ្យការ​អមតុលាការកំពូល បានសម្រេចកោះហៅលោក កឹម សុខា ក្នុងនាមជាដើមបណ្ដឹងសាទុក្ខ ដើម្បីឲ្យ​ចូល​មក​សវនាការ ក្នុងតុលាការកំពូល នៅថ្ងៃទី០២ ខែកញ្ញា ខាងមុខនេះ។ ដីការនោះ មានសរសេរបញ្ជាក់ពី​សមាស​ភាព នៃក្រុមប្រឹក្សាជំនុំជម្រះ ដែលរួមមាន លោក ឃឹម ប៉ុណ្ណ ជាប្រធាន - លោក យស់ សូឌឿន - លោក សាលី ធារ៉ា - លោក សេង នាង និងលោក គង់ តារា​ឆាត ជាចៅក្រមប្រឹក្សា នៃក្រុមប្រឹក្សាជំនុំជម្រះ។

សម្រាប់មេធាវីលោក កឹម សុខា គឺអ្នកស្រី ម៉េង សុភាវី បានពន្យល់ថា រវាងពីថ្ងៃចេញដីកា (ទី២៩ ខែសីហា) មក​ដល់ថ្ងៃបើកសវនាការ (ទី២ ខែកញ្ញា) មានរយៈពេលត្រឹមតែ៤ថ្ងៃគត់ ខណៈដីកាកោះខាងលើ ទើបនឹងត្រូវ​បាន​សាមី​ខ្លួន និងមេធាវីពីរនាក់ ការពារក្ដីឲ្យអនុប្រធានគណបក្ស ទទួលបានក្នុងថ្ងៃទី៣០ ខែសីហានេះប៉ុណ្ណោះ។ អ្នកស្រី​បាន​អះអាងបន្ថែមថា មេធាវីខ្លះទៀត​ (លោក កឹម សុខា មានមេធាវីការពារក្ដីឲ្យលោក ចំនួន៥នាក់) នៅ​មិន​ទាន់​បាន​ទទួល​ដីកា របស់​តុលាការ​កំពូល​នេះ​នៅ​ឡើយ។

អ្នកស្រី ម៉េង សុភាវី បានសរសេរនៅលើគណនីហ្វេសប៊ុករបស់អ្នកស្រី ដោយលើកពីការចែង របស់មាត្រា ៤៦៦ នៃក្រមនីតិវិធីព្រហ្មទណ្ឌ មកបញ្ជាក់ថា៖ «ការប្រគល់ដីកាកោះ និងការកំណត់ ឲ្យចូលបង្ហាញខ្លួន​នៅមុខ​តុលាការ មានរយះពេល១៥ថ្ងៃ ប្រសិនបើជនជាប់ចោទ រស់នៅក្នុងដែនដី​នៃតុលាការជាន់ដំបូង»។

មេធាវីការពារក្ដី ឲ្យអនុប្រធានគណបក្សប្រឆាំង​រូបនេះ បានបន្តពន្យល់ទៀតថា៖ «ចំណែកសាលាឧទ្ធរណ៏ ក៏​ញ៉ាប់​ដៃ​ញ៉ាប់ជើង ចេញដីកាឲ្យមេធាវីចូលសវនាការជំនុំជំរះ លើបណ្តឹងនឹងដីកាដំណោះស្រាយ របស់​ចៅក្រម​សើុប​សួរ នៃសាលាដំបូងដែរ ដោយកណត់ពេលសវនាការ នៅថ្ងៃទី៥ សីហា ២០១៦ វេលាម៉ោង ៨ព្រឹក តាម​ដីកា​ចុះ​ថ្ងៃទី២៦ ខែសីហា ឆ្នាំ២០១៦»។

មិនស្របតាមនីតិវីធីច្បាប់...

អ្នកស្រីអះអាងថា៖ «ឃើញថា ការកោះហៅទាំងពីរយុត្តាធិការនេះ មិនស្របតាមនីតិវិធី នៃមាត្រា៤៦៦ឡើយ ហើយ​ជាការកត់សំគាល់ សុទ្ធតែជាដីកា​ដែលចេញកាលបរិច្ឆេទ ក្រោយ ដីកាកោះ ក្នុងរឿងអង្គសេចក្ដី​នៅ​សាលា​ដំបូង ប៉ុន្តែបានកំណត់ថ្ងៃសវនាការ មុនកាលបរិឆ្ឆេទអង្គសេចក្ដី»។

អ្នកនាំពាក្យរបស់សាលាដំបូង​រាជធានីភ្នំពេញ លោក លី សុផាណា ធ្លាប់បានបកស្រាយ ពីចំណាត់ការ​«បែប​ផ្លេក​បន្ទោរ» របស់តុលាការកម្ពុជាថា ធាតុផ្សំនៃបទល្មើស ដែលចោទប្រកាន់លើលោក កឹម សុខា មិន​មាន​ភាព​ស្មុគ​ស្មាញ​ទេ ខណៈភស្តុតាងក្នុងសំណុំរឿងនេះ គឺមានភាពងាយស្រួល ដោយមិនទាមទារ​ ឲ្យចំណាយ​ពេល​វេលា​យូរ សម្រាប់​ការ​ស្រាវជ្រាវ ឬប្រមូលភស្តុតាងឡើយ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...