អង្គការផ្នែកការពារសិទ្ធិមនុស្ស អាដហុក នៅថ្ងៃនេះ បានបង្ហាញពីលទ្ធផលនៃ​ការស៊ើបអង្កេតរបស់ខ្លួន​ដោយ​ធ្វើការ​ចង្អុលមុខចំៗចំពោះសកម្មភាពរបស់កងកម្លាំងប្រដាប់អាវុធលេខ ៩១១ ដែលបានធ្វើការចាប់ខ្លួន និងឃុំខ្លួនតំណាង​កម្មករ-កម្មការិនី នៅក្នុងហេតុការណ៍អំពើហិង្សា កាលពីចុងសប្តាហ៍មុន ថាគឺជាអំពើខុសនឹងច្បាប់យ៉ាងធ្ងន់ធ្ងរ ដែល​មិន​អាចទទួលយកបាននោះទេ។

លោក វ៉ន ពៅ ប្រធានសមាគមន៍​សេដ្ឋកិច្ចក្រៅប្រព័ន្ធនៅកម្ពុជា នៅក្នុងការតវ៉ារបស់លោក ជាមួយកម្មករ នៅមុខការចាប់ខ្លួន។ (រូបថត ហ្វេសប៊ុក)

សំណុំរឿងកម្មករ - ជាការសន្និដ្ឋានដោយផ្អែកលើលទ្ធផលនៃការស៊ើបអង្កេតប្រៀបធៀបជាមួយអង្គច្បាប់ អង្គការ​សិទ្ធិមនុស្សអាដហុក បានហៅសកម្មភាពរបស់កងម្លាំងទាហានឆ័ត្រយោងលេខ ៩១១ ដែលបានធ្វើការចាប់ខ្លួន និង​ឃុំខ្លួនតំណាងកម្មករក្នុងប្រតិបត្តិការបង្រ្កាបក្រុមកម្មករតវ៉ាទាមទារប្រាក់ខែគោល ១៦០ ដុល្លារ កាលពីថ្ងៃទី ០២ ខែ​មករា កន្លងទៅ ជាអំពើខុសច្បាប់ និងរំលោភសិទ្ធិមនុស្សយ៉ាងធ្ញន់ធ្ញរបំផុត។

នៅក្នុងសេចក្តីប្រកាសព័ត៌មានដែលផ្សព្វផ្សាយកាលពីល្ញាចថ្ងៃទី ០៨ ខែមករា ម្សិលមិញ អង្គការធ្វើការផ្នែកសិទ្ធិ​មនុស្សមួយនេះ បានលើកឡើងថា ការបង្រ្កាបរបស់កម្លាំងយោធាកាលពីថ្ងៃទី ០២ ខែមករា នៅរោចក្រយ៉ាកជីន ទាហានបានប្រើអាវុធដែលជាឧបករណ៍សម្រាប់ធ្វើសង្គ្រាម ហើយយុទ្ធសាស្រ្តនៃការបង្រ្កាបធ្វើឡើង​មានលក្ខណៈ​ជាយុទ្ធសាស្រ្តរបស់យោធាក្នុងពេលធ្វើសង្គ្រាម។ នៅក្នុងប្រតិបត្តិការនេះ យោធា បានចាប់ខ្លួន និងឃុំខ្លួនតំណាង​កម្មករ ព្រះសង្ឃចំនួន ១៥ អង្គនាក់ ទៅដាក់នៅក្នុងបន្ទាយទាហានលេខ ៩១១ រហូតដល់ថ្ងៃទី ០៣ ខែមករា ទើប​បញ្ជូនតំណាងកម្មករចំនួន ១០ នាក់មកតុលាការក្រុងភ្នំពេញ។ ទង្វើរបស់កងកម្លាំងបែបនេះ អង្គការ​អាដហុកចាត់ទុក ជាទង្វើខុសច្បាប់ធ្ងន់ធ្ងរបំផុត។

ការអះអាងរបស់​អាដហុកបែបនេះ ដោយផ្អែកទៅលើច្បាប់នីតិវិធីក្រមព្រហ្មទណ្ឌមាត្រា ៦០ ដែលបានចែងថា «កង​កម្លាំងប្រដាប់អាវុធជាយោធា មិនមែនជានគរបាលយុត្តិធម៌នោះទេ ដូច្នេះ កងកម្លាំងយោធាមិនមានសមត្ថកិច្ច ធ្វើជា​ជំនួយតុលាការបានឡើយ ហើយកងកម្លាំងប្រដាប់អាវុធ ក៏គ្មានសមត្ថកិច្ចត្រូតពិនិត្យបទឧក្រិដ្ឋ បទមជ្ឈិម បទលហុ កំណត់អត្តសញ្ញាណចាប់ជនល្មើស ព្រមទាំងប្រមូលភស្តុតាងនោះដែរ។ ម្យ៉ាងវិញទៀត កងកម្លាំងប្រដាប់អាវុធ​គ្មាន​សិទ្ធិណាមួយ អាចចាប់ឃាត់ខ្លួនជនល្មើសបានឡើយ»។

បន្ថែមពីលើការថ្កោលទោសកងកម្លាំងប្រដាប់អាវុធ អង្គការអាដហុក ក៏បានចាត់ទុកសម្មភាពរបស់​ព្រះរាជអាជ្ញារង​អមតុលាការក្រុងភ្នំពេញ ដែលបានទៅសាកសួរតំណាងកម្មករ នៅឯបន្ទាយទាហាន ៩១១ ទាំងយប់ ជាសកម្មភាព​ដែលផ្ទុយពីគោលការណ៍ច្បាប់ ពីព្រោះថា បន្ទាយទាហានមិនមែនជាកន្លែងឃុំខ្លួន ដែលព្រះរាជអាជ្ញាត្រូវ​សួរចម្លើយ​នោះទេ។ លើសពីនេះទៀត តុលាការក្រុងភ្នំពេញបានសម្រេចឃុំខ្លួនតំណាងកម្មករចំនួន ១០ នាក់ ដោយមិនផ្តល់​ព័ត៌មានដល់មេធាវី ឬគ្រួសារនៃជនរងគ្រោះទៀត ដែលសកម្មភាពនេះជាអំពើលោភទៅលើច្បាប់ និងបង្ហាញថា មន្រ្តី​យុត្តិធម៌កំពុងស្ថិតនៅក្រោមអំណាចរបស់យោធាស្ទើរទាំងស្រុង។

តបនឹងការលើកឡើងរបស់អង្គការអាដហុក ទស្សនាវដ្តីមនោរម្យព័ងអាំងហ្វូមិនអាចទាក់ទង សុំការ​អត្ថាធិប្បាយ​​ពី​លោក ខេង ទីតូ អ្នកនាំពាក្យកងរាជហត្ថ និងលោក គៀត ចន្ថារិទ្ធ អ្នកនាំពាក្យអគ្គស្នងការនគរបាលជាតិបានទេ កាលពីយប់ថ្ងៃទី ០៨ ខែមករាម្សិលមិញ។ តែលោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តីបាននិយាយថា សកម្មភាពបង្ក្រាបរបស់កងកម្លាំងធ្វើឡើងស្របច្បាប់ ដើម្បីឲ្យសណ្តាប់ធ្នាប់សាធារណៈ វិលមកសភាពដូចដើមវិញ​តែប៉ុណ្ណោះ។ ម្យ៉ាងវិញទៀត លោក ផៃ ស៊ីផាន អះអាង ការបង្រ្កាបរបស់កងកម្លាំងគ្មាននិន្នាការ ស្អប់កម្មករគាំទ្របក្ស​ប្រឆាំងនោះទេ គឺគ្រាន់តែបង្ក្រាបក្នុងន័យឲ្យទីក្រុងភ្នំពេញមានភាពរីករាយល្អធម្មតាឡើងវិញប៉ុណ្ណោះ។

សូមបញ្ជាក់ថា កាលពីថ្ងៃទី ០២ ខែមករា សប្តាហ៍មុន លោក វន់ ពៅ ប្រធានសមាគមប្រជាធិបតេយ្យ​ឯករាជ្យនៃ​សេដ្ឋកិច្ច​ក្រៅប្រព័ន្ធ បានដឹកនាំកម្មករប្រមាណជាង ១០០ នាក់ធ្វើការតវ៉ាទាមទារប្រាក់ខែគោល ១៦០ ដុល្លារ ហើយ​ត្រូវទទួលការបង្ក្រាប់ពីកងកម្លាំងយ៉ាងចាស់ដៃ។ ក្រោយពីបង្រ្កាបលោក វន់ ពៅ និងបក្សពួក ត្រូវបានតុលាការ​សម្រេច​ឃុំខ្លូនដោយអាថ៌កំបាំងមិនឲ្យមេធាវី ក្រុមគ្រួសារជនរងគ្រោះ បានដឹងនោះទេ។ តែកាលពីថ្ងៃពុធម្សិលមិញ ក្រុមអង្គការសិទ្ធិមនុស្សបានរកលោក វន់ ពៅ និងបក្សពួកឃើញហើយ ពោលគឺពួកគេត្រូវបាន​ដឹកទៅឃុំខ្លួននៅ​ពន្ធនាគារ​ត្រពាំងផ្លុង ស្រុកពញ្ញាក្រែក ខេត្តកំពង់ចាម៕

---------------------------------------------
ដោយ៖ ជា ធីរិទ្ធ - ភ្នំពេញ ថ្ងៃទី ០៩ ខែមករា ឆ្នាំ២០១៤
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ