តារាសម្តែងនិងចម្រៀងដែលទើបរះ ក្នុងពិភពសិល្បៈថ្មីៗ ប្រកបដោយទេពកោសល្យ នាង ជុំ រចនាពេជ្រ បាន​ទទួលការគាំទ្រយ៉ាងពេញទំហឹងពីអ្នកគាំទ្រ ដោយសារតែនាងមានមុខមាត់ស្រស់ផូរផង់ និងតែងខ្លួនយេរៗ មើលមិនចាញ់តារាជើងចាស់ប៉ុន្មានឡើយ។ ទើបតែចេញមុខលើវិថីសិល្បៈបានតែមួយរយៈ នាងរចនាពេជ្រ បានឆក់យកតំណែងតួឯកកុន ជាច្រើនមកសម្ដែង រហូតមានពេលខ្លះ នាងបានច្រានចោលការថតកុនរឿងថ្មីៗ និងរឿងស្នេហាថែមទៀត ។ តែអ្នកម្ដាយរបស់តារា បានចេះមុខអះអាងថា «បើសិល្បៈផង រៀនផង ស្នេហាផង នោះពិតជាឆ្កួតមិនខាន»។

តារាសម្ដែង និងច្រៀងម្ដងម្កាល នាងរចនាពេជ្រ ហៅ«បេប៊ី»។ (រូបថត MONOROOM.info/ Samneang)

តារាចម្រៀង - លេចមុខក្នុងពិភពសិល្បៈ កាន់តែកាក់កប ស្របនឹងយីអ៊ុនឡើង នាង រចនាពេជ្រ ហៅ«បេប៊ី» ដែល​ល្បីថាមានអ្នកតាមស្រលាញ់ យ៉ាងកៀកកិតនោះ បានសម្រេចចិត្តដកខ្លួនមិនទទួលយកស្នេហ៍ជាដាច់ខាត ខណៈ​ដែលនាងយល់ថាមានស្នេហា ទាំងវ័យក្មេងនាំឲ្យមានចំណង និងរវល់នោះ។ «បេប៊ី»កំពុងតែមមាញឹក ថតខ្សែ​ភាពយន្ត​ពីរបីរឿងក្នុងពេលនេះ ជាពិេសសនាងត្រូវសម្ដែងជាតួអង្គសំខាន់ៗ ហើយត្រូវចេញមុខជាច្រើនប្លង់។ ភាពយន្ដ​ដែលនាងក្តាប់ឱកាសនិងថតឲ្យទាំងនោះ មានរឿង«ម៉ឺនុយធ្នាក់អន្ទាក់ស្នេហ៍» របស់ផលិតកម្មមហាហង្ស ដែល​ត្រៀមនឹងដាក់បញ្ចាំង នៅកញ្ចក់ទូរទស្សន៍ស៊ីធីអិនខាងមុខនេះ។ ចំណែករឿង«ពូជខ្ញុំអញ្ចឹង»ជាតួឯក និងជា​តួកូនរបស់តារាចម្រៀង អឿន ស្រីមុំ ឲ្យផលិតកម្មរ៉ុក ត្រៀមដាក់បញ្ចាំងនៅរោងកុន។ ក្រៅពីថតភាពយន្ដទាំងនេះ នាងបេប៊ី ត្រូវបានអញ្ជើញ ឲ្យច្រៀងបង្ហាញវត្តមានតាមកញ្ចក់ទូរទស្សន៍ ជាញឹកញាប់ផងដែរ។

បន្ទាប់ពីចូលកាន់វិថីសិល្បៈ បេប៊ីដែលចង់បង្កើនកេរ្តី៍ឈ្មោះ ឲ្យកាន់តែរីកសាយនោះមិនបាន គិតគូអ្វីក្រៅពី​ការងារ​សម្តែង និងច្រៀងឲ្យកាន់តែស្ទុះឡើងទៅមុខនោះឡើយ បើទោះ ជាមានព័ត៌មានលេចឮថា នាងមានបុរសមាន ទ្រព្យធន់តាមឆក់បេះដូងក៍ដោយ។ មូលហេតុដែលនាងមិនគិតនោះ ប្រហែលជាពេលនេះ នាងបានសម្រេចចិត្ត​ព្យួរបេះដូងឲ្យនៅទំនេរ ដើម្បីច្បាមយកប្រជាប្រិយភាពសិន ជៀសជាងទុកខ្លួនឲ្យជាប់អន្ទាក់ស្នេហ៍។

បេប៊ីដែលពេលនេះ មើលទៅស្អាតប្លែកជាងមុននោះ បានឲ្យដឹងថា នាងរាល់ថ្ងៃនេះកំពុងតែចាប់ផ្តើមចង់ដឹង​ថា មានអ្នកគាំទ្រច្រើនឬទេ នៅពេលដែលខ្សែភាពយន្តរបស់នាងមួយចំនួន ដែលនាងបានថតទុកមួយរយៈមុន នឹង​ត្រៀមដាក់បញ្ចាំងព្រមគ្នានាពេលខាងមុខ នៅលើកញ្ចក់ទូរទស្សន៍និងនៅរោងកុនមួយចំនួននោះ។ បេប៊ីបន្តថា នាងកំពុងតែត្រៀមខ្លួន ថតរឿងថ្មីៗបន្តទៀត ទាំងនៅក្នុងទូរទស្សន៍និងនៅផលិតកម្មមួយចំនួន ព្រោះនាងបាន​រួចរាល់ការងារចាស់ៗអស់ហើយ ។

បេប៊ីដែលត្រូវបានមិត្តភក្តជិតស្និត បង្ហើបពីការដូរឡានទំនើបថ្មីក្រោយលេចឭ មានឧកញ៉ាតាមស្នេហ៍នោះ បាន​បញ្ជាក់ថា នាងមិនអាចបញ្ចូលខ្លួនឲ្យផុង ក្នុងចំណងស្នេហានាពេលនេះទេ ព្រោះនាងនៅវ័យក្មេងណាស់ គឺវ័យមិន ទាន់ម្ភៃឆ្នាំនៅឡើយ មិនចេះរៀបចំសង្គមគ្រួសារទេ។ នាងមិនចង់ចែករំលែកចិត្ត មើលថែរទាំអ្នកណាឡើយ ខណៈ​ដែលនាងនៅមានអនាគតវែងឆ្ងាយ ព្រោះក្រៅពីសិល្បៈនាងត្រូវរៀន នៅថ្នាក់វិទ្យាល័យដូចគេដែរ។

«មិនអាចឲ្យផុងនឹងចំណងស្នេហ៍» ត្រូវបាននាងបញ្ជាក់លំអិតទៀតថា ព្រោះនាងឆ្នាំនេះត្រូវប្រលងបាក់ឌុបផង ទើប​នាងកាន់តែខ្លាចរឿងមានស្នេហា ស្របពេលដែលនាងខំបែងចែកយ៉ាងពិបាករួចទៅហើយ នូវការងារសិល្បៈ ចុះ​ទំរាំ​តែបែងចែករឿងយកចិត្តបុរសណានោះ ពិតជាកាន់តែពិបាកទៀតជាមិនខាន។ការងារសិល្បៈពេលនេះ ពិតជា​រវល់​ជាងមុន ពេលខ្លះចេញពីថតត្រូវធ្វើខ្លួនឡើងច្រៀង តាមកញ្ចក់ទូរទស្សន៍អត់បាយអត់ទឹកក៍មាន។

ទាំងអស់នេះ​ ធ្វើ​ឲ្យនាងហាក់ទ្រុតទ្រោមចង់ឈឺជំងឺក្រពះ ប៉ុន្តែសប្បាយចិត្ត នៅពេលដែលឃើញអាជីពសិល្បៈ​មាន​ភាពរីកលូតលាស់។ ទោះជាហត់មែនពិត តែការងារកើតចេញពីសមត្ថភាព និងសប្បាយចិត្តព្រោះនាង​អាចរកកម្រៃ​ចិញ្ចឹមខ្លួន ទាំងនៅវ័យក្មេង និងថែមទាំងបានជួយដល់គ្រួសារខ្លះទៀត។

«បើសិល្បៈផង រៀនផង ស្នេហាផង នោះពិតជាឆ្កួតមិនខាន»

ចំណែកអ្នកម្តាយរបស់កញ្ញាបេប៊ី ដែលតែងតែទៅណាជាមួយកូន ព្រោះខ្លាចប្រុសៗតាមរញ៉េរញៃនោះ បានឲ្យ​ដឹង​ដែរថា គាត់អាណិតកូនស្រីគាត់ណាស់ ព្រោះតាំងពីមានសន្ទុះការងារសិល្បៈមក កូនគាត់ត្រូវដើរច្រៀង ដើរសម្តែង​បាត់ពីផ្ទះ រហូតពេលខ្លះបាយទឹកមិនទៀងទេ។ អ្នកស្រីបានបន្តទៀតថា «ខ្ញុំខ្លាចនាងឈឺក្រពះទេ ព្រោះមើលទៅ​ពេលនេះ​ នាងស្រកទម្ងន់ជាងមុនខ្លះ»។ ចំពោះរឿងបេះដូងអីនោះ អ្នកស្រីត្រូវតែឲ្យកូនគិតដោយខ្លួនឯង តែអ្វីជា​រឿង​សំខាន់ពេលនេះ នាងនៅរៀនទុកពេលយកចំណេះសិនក៍ល្អដែរ។ «បើសិល្បៈផង រៀនផង ស្នេហាផង នោះ​ពិត​ជាឆ្កួតមិនខាន»៕

-------------------------------------------------
ដោយ៖ សំ នៀង - ភ្នំពេញ ថ្ងៃទី៣០ ខែវិច្ឆិកា ឆ្នាំ២០១៣
រក្សាសិទ្ធិគ្រប់យ៉ាងដោយទស្សនាវដ្តីមនោរម្យអំាងហ្វូ