ជនឯកោអាយុ៤៧ឆ្នាំ ដែលរស់នៅក្នុងព្រៃភ្នំក្រំថ្មអស់រយៈពេល ២៧ឆ្នាំ ត្រូវបានតុលាការរកឃើញថាគាត់មានកំហុស ពី​បទលួចនិងចោរកម្មគាស់ផ្ទះ។ តែទោសដែលតុលាការបានកាត់ឲ្យជននេះអនុវត្តន៍ មិនមែននៅក្នុងពន្ធនាគារ ឬមណ្ឌល​​កែប្រែណាមួយនោះទេ ជាទោសដ៏ចម្លែកនិងជាលើកទីមួយ ក្នុងប្រវត្តិសាស្ត្រនៃប្រទេសអាមេរិក៖ ជនជាប់ចោទត្រូវធ្វើ​«សមាហរណកម្ម»ចូលក្នុងសង្គមជាតិវិញ !!!

ជម្រក និងសម្បុកសម្បត្តិរបស់គ្រីស្តូហ្វើរ នៅកណ្ដាលព្រៃ។ (រូបថត Reuters)

ទីក្រុងម៉ុងរ៉េអាល់ - គ្រីស្តូហ្វើរ ក្នៃធ៍ (Christopher Knight) បុរសឯកោម្នាក់ អាយុ៤៧ឆ្នាំ ដែលបានរស់នៅអស់រយៈពេល ២៧ឆ្នាំ ក្នុងព្រៃដ៏ធំមួយឈ្មោះ ម៉ែន (Maine ផ្នែកឦសាននៃប្រទេសអាមេរិក) ត្រូវបានតុលាការកាត់ទោសគាត់ នៅដើម​សប្ដាហ៍នេះ ឲ្យជាប់ទោសមួយដ៏ចម្លែកមួយមិនដែលធ្លាប់មាន ក្នុងប្រវត្តិប្រព័ន្ធយុត្តិធម៌របស់ប្រទេសនេះ។ នោះគឺជាដីការ​បង្គាប់ឲ្យ ជនជាប់ចោទត្រូវធ្វើ«សមហរណកម្ម» មកក្នុងសង្គមជាតិវិញ ជាកំហិត។

ចង់ដឹងថា បុរសឯកោនេះមានសភាពបែបណា នៅពេលចាប់ខ្លួន សូមអានអត្ថបទដែលទាក់ទងនឹងប្រធានបទឡើងវិញ ដោយចុចលើទីនេះ។

បុរសកំសត់អានាថា ត្រូវបានតុលាការកំពូលប្រចាំតំបន់ ម៉ែន រកឃើញថា គាត់មានកំហុសលើបទប្រព្រឹត្តិ​ចំនួន១៣​ករណី ក្នុងនោះសុទ្ធតែជាករណី«លួច និងចោរកម្មគាស់ផ្ទះ»។ នៅក្នុងដីកាសម្រេចនោះ គ្រីស្តូហ្វើរ ចាំបាច់ត្រូវមានការងារធ្វើ​«ពេញ​ម៉ោង» និងត្រូវចូលសាលារៀន ឬយ៉ាងហោចណាស់ចូលរួមក្នុងសកម្មភាព«ស្ម័គ្រចិត្ត»ផងទាំងពួង។ គ្រីស្តូហ្វើរ ក៏​ត្រូវបានតុលាការកំហិត ឲ្យចូលទៅពិនិត្យតាមដានសុខភាពរយៈពេលមួយឆ្នាំ ដើម្បីធានាឲ្យបាននូវការវិលត្រឡប់​មក​រួមរស់ ក្នុងសហគមន៍ជាតិវិញ។

ជាប់ចោទពីបទ«គាស់ផ្ទះ»រាប់សិបពាន់ដង

«ជាសំនុំរឿងដ៏ពិសេសមួយ៖ ទោសពៃរ៍មួយប្រភេទ សម្រាប់ជនជាប់ចោទដ៏កម្រម្នាក់» នេះជាការលើកឡើងរបស់លោក វ័ធើរ ម៉ាកឃី (Walter McKee) មេធាវីការពារក្ដីឲ្យ គ្រីស្តូហ្វើរ ដោយបានរំលឹកថា កូនក្ដីរបស់លោក មិនមានទំនាក់ទំនង​ជាមួយមនុស្សតាំងពី២៧ឆ្នាំមកហើយ។ គ្រីស្តូហ្វើរ បានប្រកាសខ្លួនឯង ថាគាត់បានភៀសទៅរស់ក្នុងព្រៃ​ តាំងពី​ក្រោយ​ព្រឹត្តិការណ៍ ផ្ទុះម៉ាស៊ីនប្រតិករ នៅទីក្រុងឆេណូវីល (Tchernobyl) ប្រទេសអ៊ុយក្រែន នាឆ្នាំ១៩៨៦ ដែលជាព្រឹត្តិការណ៍​មួយ ធ្វើឲ្យនរណាៗក៏ល្បី និងមានការភ្ញាក់ផ្អើលដែរនោះ។ ក្រោយមកទៀត គ្រីស្ត្រូហ្វើរ ត្រូវបានគេដឹងថា គាត់មិនដែល​បានជួបមនុស្សណាផ្សេងទៀតទេ។

កាលពីថ្ងៃទី៤ខែមេសាកន្លងទៅ ជនឯកោ គ្រីស្តូហ្វើរ ត្រូវបាននគរបាលចាប់ឃាត់ខ្លួន ខណៈគាត់កំពុងធ្វើសកម្មភាព​លួច​«ចំណីអាហារ» នៅក្នុងតង់បោះជំរុំរបស់យុវជន មកពីតំបន់ដដែល។ នគរបាលនិយាយថា គ្រីស្តូហ្វើរ ទំនងជាត្រូវជាប់​ចោទ ពីបទចោរកម្មគាស់ផ្ទះ រាប់សិប«ពាន់»ដង។ ការសែត ឡឺហូហ្វីនតុនប៉ុស្ត៍ (Le Huffington Post) បានបញ្ជាក់ថា សាលក្រមមិនបានបញ្ជាក់ពីថ្ងៃណាមួយ ដែលគេត្រូវដោះលែងគ្រីស្តូហ្វើរ ឲ្យមានសេរីភាពនោះទេ ប៉ុន្តែបន្ថែមថា ថ្ងៃដោះ​លែងនោះនឹងត្រូវឲ្យដឹងក្នុងពេលខាងមុខ៕

បុរសឯកោ គ្រីស្ត្រូហ្វើរ ដែលចេញទៅរស់នៅក្នុងព្រៃ បណ្ដាច់ខ្លួនពីពិភពមនុស្ស។ (រូបថត Reuters)

រូបថតសកម្មភាពធ្វើចោរកម្មគាស់ផ្ទះ របស់បុរសគ្រីស្តូហ្វើរ ដោយម៉ាស៊ីនថតសុវត្ថិភាព។ (រូបថត Reuters)

---------------------------------------------------------
ដោយៈ សុបិន្ត - ថ្ងៃទី២៩ ខែតុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ