ប៊ុន រ៉ានី ហ៊ុន សែន៖ បក្ស​ប្រឆាំង​កំពុង​បោក​រាស្រ្ត

បន្ទាប់ពីគណបក្សសង្រ្គោះជាតិ បានបិទបញ្ចប់មហាបាតុកម្មអហិង្សា និងការដង្ហែញត្តិរួចមក ប្រធានកាកបាទ​ក្រហម​កម្ពុជា បានធ្វើការចោទប្រកាន់ចំៗថា សកម្មភាពរបស់គណបក្សសង្រ្គោះជាតិដែលកំពុងធ្វើ គឺជាការបោកប្រាស់ប្រជា​ពលរដ្ឋ ដើម្បីជាឈ្នាន់ឡើងទៅកាន់អំណាច ខណៈប្រជាពលរដ្ឋកំពុងតែរងគ្រោះដោយទឹកជំនន់។ តែការចោទ​ប្រកាន់​នេះត្រូវបានគណបក្សសង្រ្គោះជាតិ លើកឡើងថា អ្វីដែលគណបក្សខ្លួនបានធ្វើ គឺស្របតាមគោលការណ៍ច្បាប់ និងលិទ្ធិ​ប្រជាធិបតេយ្យ ហើយបញ្ហាជួយសង្រ្គោះប្រជាពលរដ្ឋពីគ្រោះទឹកជំនន់ ទុកឲ្យប្រជាពលរដ្ឋ និងសាធារណៈមតិជា​អ្នក​វាយតម្លៃ។
Loading...
  • ដោយ: អ៊ុំ បូរី
  • កែប្រែចុងក្រោយ: October 28, 2013
  • ប្រធានបទ:
  • អត្ថបទ: មានបញ្ហា?
  • មតិ-យោបល់

បន្ទាប់ពីគណបក្សសង្រ្គោះជាតិ បានបិទបញ្ចប់មហាបាតុកម្មអហិង្សា និងការដង្ហែញត្តិរួចមក ប្រធានកាកបាទ​ក្រហម​កម្ពុជា បានធ្វើការចោទប្រកាន់ចំៗថា សកម្មភាពរបស់គណបក្សសង្រ្គោះជាតិដែលកំពុងធ្វើ គឺជាការបោកប្រាស់ប្រជា​ពលរដ្ឋ ដើម្បីជាឈ្នាន់ឡើងទៅកាន់អំណាច ខណៈប្រជាពលរដ្ឋកំពុងតែរងគ្រោះដោយទឹកជំនន់។ តែការចោទ​ប្រកាន់​នេះត្រូវបានគណបក្សសង្រ្គោះជាតិ លើកឡើងថា អ្វីដែលគណបក្សខ្លួនបានធ្វើ គឺស្របតាមគោលការណ៍ច្បាប់ និងលិទ្ធិ​ប្រជាធិបតេយ្យ ហើយបញ្ហាជួយសង្រ្គោះប្រជាពលរដ្ឋពីគ្រោះទឹកជំនន់ ទុកឲ្យប្រជាពលរដ្ឋ និងសាធារណៈមតិជា​អ្នក​វាយតម្លៃ។


លោកស្រី ប៊ុន រ៉ានី ហ៊ុន​ សែន ទៅបោះឆ្នោត កាលពីអណត្តិទីបួន។ (រូបថត ឯកសារ)

រាជធានីភ្នំពេញ - ប្រធានកាកបាទក្រហមកម្ពុជា និងជាភរិយារបស់លោកនាយករដ្ឋមន្រ្តី ហ៊ុន សែន លោកស្រី ប៊ុន រ៉ានី ក្នុងពេលចុះចែក​អំណោយដល់ប្រជាពលរដ្ឋរងគ្រោះ ពីទឹកជំនន់ នៅខេត្តប៉ៃលិន ក្នុងពេលថ្មីៗនេះ បានពន្យល់ប្រាប់ប្រជា​ពលរដ្ឋ​រង​គ្រោះ​ថា នៅពេលដែលបងប្អូនកំពុងជួបការលំបាកពីគ្រោះទឹកជំនន់ គណបក្សសង្រ្គោះជាតិ មិនបានជួយ​បង​ប្អូននោះទេ តែ​ពួកគេបែជានាំគ្នាធ្វើបាតុកម្ម ទាមទារតំណែងប្រធានរដ្ឋសភាទៅវិញ។ ប្រធានកាកបាទក្រហមដដែលនេះ បានលើក​ឡើងថា វាហួសពេលហើយដែលគណបក្សសង្រ្គោះជាតិ ដឹកនាំធ្វើបាតុកម្ម និងដង្ហែញត្តិយកទៅដាក់​តាម​ស្ថានទូតនានា នៅរាជធានីភ្នំពេញ ដើម្បីរកយុត្តិធម៌នោះ ព្រោះគណបក្សប្រឆាំងតែងតែ មិនទទួលស្គាល់ពីបរាជ័របស់ ខ្លួន។

លោកស្រី ប៊ុន រ៉ានី បញ្ជាក់ថា៖ «បងប្អូនកុំចាញ់បោកគេបង្ខិតបង្ខំឲ្យផ្តិតមេដៃ ទៅចូលរួមបាតុកម្មតវ៉ា រកយុត្តិធម៌ស្អីនោះ។ ពួកគេ (គណបក្សប្រឆាំង) បោកប្រាស់ កេងចំណេញខាងនយោបាយ ដើម្បីអណាច និងផលប្រយោជន៍របស់ពួកគេ»។

គួរម្លឹកថា បន្ទាប់ពីការបោះឆ្នោតជ្រើសតាំងតំណាងរាស្រ្ត គណបក្សសង្រ្គោះជាតិ បានធ្វើមហាតុកម្មអហិង្សា​យ៉ាងហោច​ណាស់ក៏៣លើកដែរ ក្នុងគោលបំណងស្នើដល់អង្គការសហប្រជាជាតិ និងសហគមអន្តរជាតិ ជួយជម្រុញការ​អនុវត្តឲ្យ​បានពេញលេញ ចំពោះកិច្ចព្រមព្រៀងសន្តិភាពក្រុងប៉ារីស និងទទួចឲ្យមានការស៊ើបអង្កេតឯករាជ្យ ដោយមានការចូល​រួមពីភាគីអន្តរជាតិ ទាក់ទងនឹងភាពមិនក្រតីក្នុងកំឡុងពេលបោះឆ្នោត ដែលគណបក្សសង្រ្គោះជាតិ បានចោទប្រកាន់ថា មានភាពមិនប្រក្រតីធ្ងន់ធ្ងរ ដែលអាចប៉ះពាល់ដល់លទ្ធផលបោះឆ្នោត។ តែសំណើរទាំងនោះ ត្រូវបានគណៈកម្មាធិការ​ជាតិរៀបចំការបោះឆ្នោត គ ជ ប និងគណបក្សប្រជាជនកម្ពុជាបដិសេធជាបន្តបន្ទាប់។

ជុំវិញការចោទប្រកាន់របស់លោកស្រី ប៊ុន រ៉ានី អ្នកនាំពាក្យគណបក្សសង្រ្គោះជាតិ លោក យ៉ែម ប៉ុញ្ញារិទ្ធិ តាមរយៈការ​សន្ទនាតាមទូរស័ព្ទ ជាមួយទស្សនាវដ្តីមនោរម្យព័ងអាំងហ្វូ នៅថ្ងៃទី២៨ ខែតុលា ឆ្នាំ២០១៣ នេះបានពន្យល់ថា គណបក្ស​សង្រ្គោះជាតិ ធ្វើអ្វីគ្រប់យ៉ាង គឺឈរលើមូលដ្ឋានច្បាប់ និងលិទ្ធិប្រជាធិបតេយ្យ ដូច្នេះការប្រមូលស្នាមមេដៃ​ប្រជាពលរដ្ឋ​គឺផ្អែកលើឆន្ទះ និងស្មារតីរបស់ប្រជាពលរដ្ឋ ដោយមិនមានការបង្ខិតបង្ខំនោះទេ។ អ្នកនាំពាក្យរូបនេះបញ្ជាក់ថា៖ «រាល់​ការងារដែលយើងធ្វើ គឺមិនមានការបំភិតបំភៃ ឬការគម្រាមកំហែងដូចការលើកឡើងនោះទេ គឺមិនដូចបក្សកុំមុយនីស្ត ដែលបានធ្វើកន្លងមក»។

ចំពោះសកម្មភាពជួយសង្រ្គោះ ដល់ពលរដ្ឋដែល រងគ្រោះដោយគ្រោះទឹកជំនន់ លោក យ៉ែម ប៉ុញ្ញារិទ្ធិ បានអះអាងថា គណបក្សសង្រ្គោះជាតិ បានជួយប្រជាពលរដ្ឋ ឬអត់ ហើយក្នុងកម្រិតណានោះ វាមិនអាស្រ័យលើការចោទប្រកាន់ ឬការ​លើកឡើងរបស់អ្នកណានោះទេ ព្រោះអ្វីគ្រប់យ៉ាងវាស្រ័យទៅលើប្រជាពលរដ្ឋ និងសាធារណៈមតិ ជាអ្នកវាយតម្លៃផ្ទាល់ ដោយផ្អែកលើសកម្មភាពជាក់ស្តែងរបស់គណបក្សសង្រ្គោះជាតិ ដែលបានធ្វើកន្លងមក។

ទាក់ទងនឹងការផ្តល់ជំនួយដល់ប្រជាពលរដ្ឋក្នុងគ្រោះទឹកជំនន់ បើយោងលើអ្នកតាមដានស្ថានការណ៍នយោបាយ និង​សង្គមនៅកម្ពុជា បានកត់សម្គាល់ថា ទាំងរដ្ឋាភិបាល គណបក្សនយោបាយ អង្គការសង្គមស៊ីលវិល អ្នកសិល្បៈ ក៏ដូច​សប្បុរសជនទូទៅ បានខ្នះខ្នែងគៀងគរជំនួយ ផ្តល់ដល់ប្រជាពលរដ្ឋ ជាបន្តបន្ទាប់តាមលទ្ធភាពរបស់ពួកគេរៀងៗខ្លួន។ ទន្ទឹមនឹងការខ្នះខ្នែង ក្នុងស្មារតីសប្បុរសធម៌ និងសាមគ្គីភាព គេក៏អាចសង្កេតឃើញថា អ្នកដែលបានយកជំនួយ​ទៅចែក​ជូនប្រជាពលរដ្ឋ តាមមូលដ្ឋានមួយចំនួន ក៏បានឆ្លៀតឳកាសថ្លែងទៅកាន់ប្រជាពលរដ្ឋ ក្នុងន័យកេងចំណេញ​នយោបាយ​ផងដែរ៕

---------------------------------------
ដោយ៖ អ៊ុំ បូរី - ថ្ងៃទី២៨ ខែតុលា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...