នាងមេវេ ឌីបូ (Merve Dibo) មានកំពស់១,៧៥ម៉ែត្រ ហាក់ដូចជាខ្ពស់ស្រឡះទៅហើយ សម្រាប់មនុស្សទូទៅ តែនៅពេល​នាងទៅឈរជិតស្វាមីរបស់នាង វាហាក់ក្មេងស្រីតូចមួយរូប។ ស្វាមីភរិយាដែលមានអាយុ៣១ឆ្នាំដូចគ្នា បានស្ម័គ្រចិត្តចាប់​ដៃគ្នាជាគូរអនាគត កាលពីថ្ងៃអាទិត្យទី២៧ខែតុលានេះ។

ស៊ុលតង់ កូសេន រាំជាមួយញាតិមិត្ត បន្ទាប់ពីបានភ្ជាប់ពាក្យជាមួយនាង មេវេ ឌីបូ (ខាងស្ដាំដៃស៊ុលតង់)។ (រូបថត Anadolu Agency/Getty Images)

បុរសជនជាតិទួគីរ ដែលមានឈ្មោះថា ស៊ុលតង់ កូសេន (Sultan Kösen) មានកំពស់២,៥១ម៉ែត្រ ខ្ពស់ជាងភរិយាគាត់ ជាង​៧០សង់ទីម៉ែត្រ។ ប៉ុន្តែមិនមែនប្រៀបធៀប តែជាមួយភរិយារបស់គាត់នោះទេ តែជាទូទៅគាត់ត្រូវបានគេមើលពិ​ចម្ងាយ​ដោយមិនចាំបាច់ប្រើកែវទាញ បើប្រៀងធៀបទៅនឹងមិត្តភ័ក្រញាតិមិត្ត មកចូលរួមពិធីមង្គល់ការរបស់គាត់ នៅទឹកដី​កំណើត ម៉ារដាំង (Mardin) ផ្នែកខាងអាគ្នេយ៍នៃប្រទេសទួរគី។

ស៊ុលតង់ កូសេន បាននិយាយដោយតប់ចិត្តមិនរំភើបមិនបាន យ៉ាងដូច្នេះថា «ខ្ញុំសប្បាយចិត្តណាស់ដែលទីបំផុតទៅ ខ្ញុំរក​បានមនុស្សម្នាក់ ដែលទទួលយល់ព្រមជាមួយនឹងខ្ញុំ ហើយស្រឡាញ់ខ្ញុំតទៅ»។

ការរីកបណ្ដោយខុសខ្នាតរបស់ ស៊ុលតង់ កូសេន ដែលត្រូវបានទទួលស្គាល់ និងចុះក្នុងសៀវភៅឯកត្តកម្ម ហ្គីណេសប៊ុក (Guinness Book) នោះ ជាលទ្ធផលនៃជំងឺម្យ៉ាង ដែលចេះតែធ្វើឲ្យឆ្អឹង និងសារពាង្គកាយរបស់គាត់រីកជាលំដាប់។ នៅឆ្នាំ​២០១០ គាត់បានធ្វើដំណើរទៅសហរដ្ឋអាមេរិក ដើម្បីធ្វើការវះកាត់ និងទទួលការព្យាបាលដោយថ្នាំមួយប្រភេទ ដែលធ្វើ​កម្រិតអ័រម៉ូនរបស់គាត់ ឈប់រីកលូតលាត់តទៅទៀត។

បន្ទាប់ក្រោយមក គាត់ត្រូវបានពេទ្យសន្មតថាបានជាសះស្បើយ និងឈប់លូតលាស់តទៅទៀត តែគាត់ចាំបាច់ត្រូវ​ធ្វើ​ដំណើរទៅណាមកណា តែជាមួយឈើច្រត់អ្នកពិការ ដោយសារតែខ្លួនគាត់ទាំងមូលរីកបណ្ដោយក៏ពិតមែន តែជើងរបស់​គាត់មិនអាចទ្រទ្រង់ទម្ងន់និងតួខ្លួននោះបានឡើយ៕

រូបភាព និងវីដេអូ៖

--------------------------------------------------
ដោយ ៖ ឈូករ័ត្ន - ថ្ងៃទី២៨ ខែតុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ