រាជធានីភ្នំពេញ - កាលពីថ្ងៃទី ១១ ខែតុលាកន្លងទៅ រដ្ឋាភិបាលលោក ហ៊ុន សែន បានប្រារព្ធពិធីសម្ពោធជាផ្លូវការ​នូវ​ព្រះបរមរូបសម្តេចឪ នរោត្តម សីហនុ ដែលកសាងអស់រយៈពេលជាងមួយឆ្នាំ និងចំណាយទឹកប្រាក់ប្រមាណជាង ១លាន ២ សែន ដុលា្លរសហរដ្ឋអាមេរិក។ ការកសាងព្រះបរមរូបសំណាក់នេះ បានធ្វើឲ្យមានការបកផ្សាយផ្សេងៗគ្នា ជុំវិញគោល​បំណងកេញចំណេញរបស់រដ្ឋាភិបាល និងភាពខុសគ្នាទៅនឹងរូបពិតរបស់ ព្រះបាទ សីហនុ ។

ថ្លែងប្រាប់ទស្សនាវដ្តីមនោរម្យព័ងអាំងហ្វូ នៅថ្ងៃទី១៥ខែតុលានេះ ខ្សែរាជវង្សមួយអង្គព្រះនាម ស៊ីសុវត្ថិ ធម្មិកោ បានធ្វើ​ការអត្ថាធិប្បាយថា ធាតុពិតទៅ រដ្ឋាភិបាលលោកនាយក ហ៊ុន សែន កសាងព្រះបរមរូបនេះឡើយ មិនមែនមានចេតនា​ពិតប្រាកដ ដើម្បីរម្លឹកនូវគុណូបការៈរបស់ ព្រះមហាវីរក្សត្រនោះទេ តែអ្វីដែល លោក ហ៊ុន សែន ចង់បានធំបំផុតនោះ គឺ​ចង់ឲ្យប្រជាជនខ្មែរគោរពដឹងគុណ ចំពោះគណបក្សប្រជាជនកម្ពុជា ដែលបានកសាងនូវព្រះបរមរូបនេះ។ ពីព្រោះថា ព្រះបាទនរោត្ត សីហនុ ជាស្តេចដ៏អស្ចារ្យ ដែលប្រជាពលរដ្ឋខ្មែរភាគច្រើន គោរព និងជឿជាក់ដឹងគុណជាទីបំផុត។

ខ្សែរាជវង្សអង្គនេះ បានមានបន្ទូលទៀតថា ព្រះអង្គមានការសោកស្តាយណាស់ ចំពោះព្រះបរមរូបនេះ ដោយសារថា ធ្វើ​ឡើងមិនមានលក្ខណៈដូចទាល់តែសោះ ទៅនឹងរូបពិតរបស់ព្រះមហាវីរក្សត្រ ទាំងព្រះភក្រ្ត និងព្រះកាយរបស់ព្រះអង្គ។ ព្រះអង្គធម្មិកោ មិនអាចបញ្ជាក់ថា តើរដ្ឋាភិបាលមានចេតនាធ្វើឲ្យខុស ឬមកពីបច្ចេកទេស របស់ក្រុមជាងចម្លាក់នោះទេ?

ទស្សនាវដ្តីមនោរម្យព័ងអាំងហ្វូ  បានសុំការអត្ថាធិប្បាយតប ពីមន្រ្តីគណបក្សប្រជាជនកម្ពុជាមានលោក ជាម យៀប និង​ពីមន្ត្រីរដ្ឋាភិបាលលោក ផៃ ស៊ីផាន នៅថ្ងៃនេះដែរ តែមិនអាចធ្វើការទំនាក់ទំនងបាន។ តែលោក ហ៊ុន សែន នាយករដ្ឋមន្រ្តី​កម្ពុជា បានថ្លែងកាលពីថ្ងៃទី១១ ខែតុលា កន្លងទៅ នៅពេលដែលលោកទៅចូលរួមក្នុងពិធីសម្ពោធព្រះបរមរូបថា ការសង់​ព្រះបរមរូបនេះ ធ្វើឡើងដើម្បីជាការគោរពដឹងគុណ ចំពោះព្របរមរតនកោដិ ដែលោក ហ៊ុន សែន អះអាងថា ព្រះអង្គគឺ​ជា​ស្តេចដែលបានសាងផលប្រយោជន៍ ជូនប្រជាជនខ្មែររាប់មិនអស់ ដែលប្រជាពលរដ្ឋខ្មែរត្រូវតែនាំគ្នា​គោរពដឹងគុណជានិច្ច​ចំពោះព្រះអង្គ។ លោក ហ៊ុន សែន បាននិយាយចំពោះមុខព្រះបរមរូបទៀតថា គណបក្សប្រជាជនកម្ពុជាការពាររបប​រាជនិយមជានិច្ច។

សូមបញ្ជាក់ថា ព្រះបរមរូបព្រះបរមរតនកោដិ ព្រះបាទ នរោត្តម សីហនុ ត្រូវបានកសាងឡើងពីស្ពាន់ ស្ថិតនៅលើសួនច្បារ​ខាងកើតវិមានឯករាជ្យ ក្នុងរាជធានីភ្នំពេញ ដោយចំណាយទឹកប្រាក់សរុបប្រមាណ ១លាន ២ សែន ដុលា្លរអាមេរិក។ ព្រះ​បរមរូបនេះ ស្ថិតនៅក្នុងសម្លៀកបំពាក់ខោអាវធំ អបដៃសំយ៉ុងមកមុខ បែព្រះភក្រ្តទៅទិសខាងកើត មានកម្ពស់ ៤ ម៉ែត្រ ៥ តឹក ហើយត្រូវបានតម្កល់នៅលើទម្រកម្ពស់ ២ ម៉ែត្រ ៧ តឹក៕

----------------------------------------------
ដោយ៖ ជា ធីរិទ្ធ - ថ្ងៃទី ១៥ ខែតុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ