ខួបគម្រប់មួយឆ្នាំនៃពិធីគោរពព្រះវិញ្ញាណក្ខន្ធ «ព្រះបរមរតនកោដ្ឋកែវមណី» ព្រះករុណា ព្រះបាទសម្ដេចព្រះ នរោត្តម សីហនុ បានចាប់ផ្តើមនាព្រឹកថ្ងៃទី១៥ ខែតុលានេះ ទៅតាមបែបព្រះពុទ្ធសាសនា។ វត្តមានដែលបានចូលរួម​នៃថ្នាក់​ដឹកនាំ​ជាន់ខ្ពស់ មកពីតាមបណ្តារក្រសួង-ស្ថាប័ននានា រួមមានក្រសួងព្រះបរមរាជវាំង សមាជិករាជរដ្ឋាភិបាល សមាជិករដ្ឋសភា ព្រឹទ្ធសភា ដែលដឹកនាំដោយលោកនាយករដ្ឋមន្ត្រី ហ៊ុន សែន ចូលរួមគោរពព្រះវិញ្ញាណក្ខន្ធ «ព្រះបរមរតនកោដ្ឋកែវមណី» នៅ«ព្រះវិមានព្រះបរមរូប»ក្បែរវិមានឯករាជ្យ និងក្នុងព្រះបរមរាជវាំង។

«ព្រះវិមានព្រះបរមរូប» នៅខាងកើតវិមានឯករាជ្យ ជិតនាគបាញ់ទឹក។ (រូបថត MONOROOM.info/ O. Vary)

រាជធានីភ្នំពេញ - តំណាលគ្នានៃការចូលគោរពព្រះវិញ្ញាណក្ខន្ធព្រះករុណា «ព្រះវិមានព្រះបរមរូប» សម្ដេចព្រះ នរោត្តម សីហនុ នៃមន្ត្រីរាជការមកពីស្ថាប័នរដ្ឋនានា អមជាមួយដោយកម្រង«ផ្កាភ្ញី» គេមិនបានឃើញមានវត្តមាន នៃសមាជិក​របស់គណបក្សសង្គ្រោះជាតិចូលរួមនោះទេ ។

គ្រប់ក្រសួងមន្ទីរស្ថាប័នរដ្ឋទាំងអស់ និងស្ថាប័នឯកជនមួយចំនួន បានបិទទ្វារឈប់សម្រាក ដើម្បីអនុញ្ញាតឲ្យ​បុគ្គលិក​របស់ខ្លួន បានគោរពព្រះវិញ្ញាណក្ខន្ធរបស់ព្រះអង្គ។ ជាមួយគ្នានេះស្ថានីវិទ្យុ និងទូរទស្សជាតិ ក៏បានធ្វើការផ្សាយ​បន្តរ​ផ្ទាល់ពីព្រឹត្តិការណ៍នេះ ខណៈពេលដែលអ្នកសារព័ត៌មានជាតិ និងអន្តរជាតិ មានចំនួនតិចតួចប៉ុណ្ណោះ ដែលអាចចូលទៅ​យកព័ត៌មានបាន។ អ្នកសារព័ត៌មានដែលអាចចូលបាន លុះត្រាតែមានប័ណ្ណ«ពិសេស» ក្រៅពីប័ណ្ណអ្នកសារព័ត៌មាន ដែលចេញដោយក្រសួងព័ត៌មាន។

ដោយឡែកសម្រាប់ប្រជាពលរដ្ឋ មិនត្រូវបានអាជ្ញាធរអនុញ្ញាត ឲ្យចូលគោរពព្រះវិញ្ញាណក្ខន្ធព្រះករុណា «ព្រះបរមរតន​កោដ្ឋកែវមណី» សម្ដេចព្រះនរោត្តម សីហនុ នាថ្ងៃនេះទេ។ ហើយប្រជាពលរដ្ឋភាគច្រើន ពិសេសលោកយាយ លោកតា ដែលគោរព ស្រលាញ់ព្រះអង្គ ហើយបានព្យាយាមមកកាន់ទីតំកល់ព្រះបរមរូប ដើម្បីគោរពព្រះវិញ្ញាណក្ខន្ធនោះ បាន​សម្តែងនូវការខកចិត្តនឹងសមត្ថកិច្ច ដែលមិនព្រមអនុញ្ញាតិឲ្យពួកគាត់ចូល។ តែបើតាមមន្ត្រីការពារសន្តិសុខ បានអះអាង​ថាពួកគាត់អាចចូលគោរព និងថ្វាយបង្គំបាននាពេលរសៀល ឬចាប់ពីថ្ងៃស្អែកតទៅ។ ទោះជាយ៉ាងនេះក្តីដោយ​ភាព​ស្មោះ​ស្ម័គ្រ និងភាពគារវៈ ពួកគាត់ដែលនៅក្នុងដៃមានកាន់ ទៀន ធូប ផ្កាឈូក អមដោយព្រះឆាយាល័ក្ខណ៍របស់​ព្រះអង្គផង​នោះ បាននាំគ្នាអង្គុយគោរពពីចំងាយ។

សូមរម្លឹកថាការគម្រប់ខួបមួយឆ្នាំ នៃការយាងចូលទិវង្គតក្នុងព្រះជន្មាយុ៨៩ព្រះវស្សានៃ «ព្រះបរមរតនកោដ្ឋកែវមណី» មាន​ការលើកឡើងពីគុណូបការៈ ក្នុងការលះបង់របស់ព្រះអង្គដើម្បីបុព្វហេតុជាតិ ឯករាជ្យ និងបូរណភាពទឹកដី រហូតធ្វើឲ្យ​ព្រះអង្គមានព្រះកិត្យានុភាពល្បីល្បាញលើសកលលោក។ ដោយស្នាព្រះហស្ថដ៏ថ្លៃថ្លា និងឧត្ដុង្គឧត្ដមនៃអង្គព្រះមហាក្សត្រ ព្រះបរមរតនកោដ្ឋកែវមណី ទទួលបានឯករាជ្យ ពីប្រទេសបារាំងទាំងស្រុងនៅថ្ងៃទី៩ ខែវិច្ឆិកា ឆ្នាំ១៩៥៣ ។ ព្រះអង្គត្រូវ​បានប្រជារាស្ត្រកម្ពុជាទូទាំងប្រទេស ថ្វាយព្រះកិត្តិនាមថ្វាយព្រះអង្គថាជា «ព្រះមហាវីរបុរសជាតិ និងជាព្រះបិតា​ឯករាជ្យ​ជាតិ។

ព្រះអង្គទ្រង់គ្រងរាជ្យសម្បត្តិលើកទី១ នៅខែមេសា ឆ្នាំ១៩៤១ ក្នុងព្រះរាជឋានៈ «ព្រះមហាក្សត្រ នៃព្រះរាជាណាចក្រ​កម្ពុជា» ដែលក្រុមប្រឹក្សាព្រះរាជបល្ល័ង្គបានជ្រើសតាំង និងថ្វាយ និងឡើងគ្រងរាជសម្បត្តិកាលពីថ្ងៃទី២៨ ខែតុលា ឆ្នាំ១៩៤១ នៅភ្នំពេញ និងការឡើងគ្រងរាជសម្បត្តិលើកទីពីរ ក្រោយកិច្ចព្រមព្រៀងសន្តិភាពទីក្រុងប៉ារីស នាថ្ងៃទី២៣ ខែតុលា១៩៩១។

ព្រះករុណា ព្រះបាទសម្ដេចព្រះ នរោត្ដម សីហនុ ព្រះអង្គប្រសូត្រ នាថ្ងៃអង្គារ ១១កើត ខែកក្ដិក ឆ្នាំច ចត្វាស័ក ព.ស. ២៤៦៥ ត្រូវនឹងថ្ងៃទី៣១ ខែតុលា ១៩២២ នៅឯព្រះបរមរាជវាំងក្រុងចតុមុខមង្គល ព្រះរាជាអាណាចក្រកម្ពុជា ។ ព្រះអង្គជា​ព្រះរាជ​បុត្រ ព្រះបាទ នរោត្តម សុរាម្រឹត និងសម្ដេចព្រះមហាក្ស័ត្រិយានី ស៊ីសុវត្ថិកុសុមៈ នារីរតន៍៕

---------------------------------------------------------
ដោយ៖ អ៊ុម វ៉ារី - ថ្ងៃទី១៥ ខែតុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ