បន្ទាប់ពីការធ្លាក់ចុះយ៉ាងកំហុគ ពីចំនួន៩០ អាសនៈក្នុងអាណត្តិទី៤ មកត្រឹម៦៨ អាសនៈក្នុងអាណត្តិទី៥ ដែលធ្វើឲ្យ គណបក្សប្រជាជនកម្ពុជា  ដែលបានគ្រប់គ្រងប្រទេសជាង៣០ ឆ្នាំនោះ ហាក់ដូចជា​ភ្ញាក់ខ្លួនបន្តិច ហើយទំនងជា​ផ្តើមឲ្យ​តម្លៃ សម្លេងរបស់ប្រជាពលរដ្ឋ និងអង្គការសង្គមស៊ីវិល ក៏ដូចជាគណបក្សជំទាស់។ ការបាត់បង ដែលគណបក្សកាន់​អំណាចមួយនេះ ស្ទើរតែស្មានមិនដល់ ខណៈដែលគណបក្សជំទាស់ទទួលបានអាសនៈ កើនទ្វេឡើង។

ក្រុមមេដឹកនាំសង្គមស៊ីវិល នៅបន្ទប់ស្ថានការណ៍នៃអង្គការខុបហ្វ្រែល ថ្ងៃទី០២ខែកញ្ញា។ (រូបថត MONOROOM.info/O. Vary)

រាជធានីភ្នំពេញ - ក្រោយការបង្កើតសភា និងរដ្ឋាភិបាលឯបក្ស គណបក្សប្រជាជនកម្ពុជា បានធ្វើការប្ដេជ្ញាចិត្ត ដោយ​សន្យាយ៉ាងមុតមាំ ក្នុងការកែទម្រង់ របៀបគ្រប់គ្រង និងដឹកនាំប្រទេស តាមរយៈការធ្វើឲ្យប្រាកដថា អ្វីដែលជាចំណុច​ខ្វះ​ខាត និងជាហេតុផលសំខាន់ៗ ដែលបានបង្កផលប៉ះពាល់ដល់ទឹកចិត្តម្ចាស់ឆ្នោត និងជាការជម្រុញឲ្យពួក​គេស្វែង​រក​ការ​ផ្លាស់ប្តូរនោះ ត្រូវបានធានាថានឹងត្រូវយកទៅអនុវត្ត ប្រកបដោយប្រសិទ្ធិភាព ស្របតាមការចង់បានរបស់​ប្រជាពលរដ្ឋ។

ប៉ុន្តែបើទោះជា រដ្ឋាភិបាលបានសន្យា និងបង្ហាញគោលជំហរសហការជាមួយ ប្រជាពលរដ្ឋ ក្រុមអង្គការសង្គមស៊ីវិល និង​គណបក្សជំទាស់ យ៉ាងដូច្នេះក្តី ក៏មិនអាចជម្រុញឲ្យពួកគេមានការជឿជាក់ទាំងស្រុងលើរដ្ឋាភិបាលនោះទេ ព្រោះពួកគេ​បានលើកឡើងថា ដរាបណាមិនទាន់មានតុល្យភាពអំណាច និងយន្តការច្បាស់លាស់ ក្នុងការកែទម្រង់ និងដឹកនាំ នោះ​វា​ជាការពិបាកណាស់ ដើម្បីឲ្យមានការជឿជាក់ ចំពោះការសន្យារបស់រដ្ឋាភិបាល។

គួរម្លឹកថា ក្នុងអាណត្តិទី៤កន្លងមក ដែលគណបក្សប្រជាជនកម្ពុជា គ្រប់គ្រងប្រទេស ជាមួយនឹងការទទួលបាន៩០អាសនៈ ពោលគឺ២ភាគ៣ ពីក្នុងអាសនៈសរុប១២៣ នៅក្នុងរដ្ឋសភា បានជម្រុញឲ្យគណបក្សនេះ មានសិទ្ធិអំណាចធ្វើអ្វីគ្រប់យ៉ាង​បានតែម្នាក់ឯង ក្នុងលក្ខខណ្ឌស្របច្បាប់ ដោយមិនចាំបាច់សុំការឯកភាពពីគណបក្សប្រឆាំងនោះទេ។

នៅក្នុងសេចក្តីថ្លែងការណ៍របស់គណបក្សប្រជាជនកម្ពុជា ស្តីពីកំណែទម្រង់ការបោះឆ្នោតខាងមុខ ចុះថ្ងៃទី១៤ ខែតុលា ឆ្នាំ២០១៣ បានបង្ហាញថាគណបក្សនេះ បង្ហាញឆន្ទះក្នុងការធ្វើកិច្ចការទាំងនេះ ជាមួយគណបក្សសង្រ្គោះជាតិ ដែលជា​គណបក្សជំទាស់ ក្រុមអង្គការសង្គមស៊ីវិល និងដៃគូអន្តរជាតិផ្សេងៗទៀតផងដែរ។ ឥរិយាបថនេះ ត្រូវបានក្រុមអ្នក​តាម​ដានស្ថានការណ៍នយោបាយនៅកម្ពុជា កត់សម្គាល់ថាគណបក្សប្រជាជនកម្ពុជា បាននឹងកំពុងទាក់ទាញការ​គាំទ្រ​ពី​ប្រជាពលរដ្ឋ និងដើម្បីជាយុទ្ធសាស្រ្តសម្រាប់ការបោះឆ្នោតនៅអាណត្តិខាងមុខ។

អនុប្រធានស៊ើបអង្កេតសមាគមន៍ការពារសិទ្ធិមនុស្ស អាដហុក លោក ចាន់ សុវេត បានថ្លែងពន្យល់ថា ក្រុមអង្គការ​សង្គម​ស៊ីវិល ជាគោលការណ៏គឺមានគោលជំហរឯករាជ្យ ដោយគ្នាននិន្នាការនយោបាយទៅលើគណបក្សណានោះទេ ហើយ​គ្រាន់តែចង់ធ្វើកិច្ចសហប្រតិបត្តិការជាមួយរដ្ឋាភិបាល ដើម្បីចូលរួមចំណែកអភិវឌ្ឍន៍ប្រទេសតាមជំនាញរៀងៗខ្លួន ជា​មួយគ្នាតែប៉ុណ្ណោះ។

លោក ចាន់ សុវេត បន្តថាប៉ុន្មានអាណត្តិកន្លងមកនេះ រដ្ឋាភិបាលកម្ពុជា បានធ្វើការព្រងើយកន្តើយ ជាមួយអង្គការសង្គម​ស៊ីវិល និងប្រជាពលរដ្ឋនៅតាមមូលដ្ឋាន ដែលបានរងគ្រោះ ពីការរំលោភបំពានដីធ្លី និងករណីផ្សេងៗទៀតជាច្រើន។ អ្នក​ការពារសិទ្ធិមនុស្សរូបនេះបន្ថែមថា ថ្មីៗនេះបន្ទាប់ពីការបោះឆ្នោត រដ្ឋាភិបាលបានបង្ហាញការសហការជាមួយ ក្រុមអង្គការ​សង្គមស៊ីវិលច្រើន តាមរយៈការកំណត់ក្នុងគោលនយោបាយរបស់រដ្ឋាភិបាល តែអ្វីគ្រប់យ៉ាងវាពុំទាន់មានការ​ជឿជាក់នោះទេ។

លោក ចាន់ សុវេត បញ្ជាក់ថា៖ «ប្រជាពលរដ្ឋបានកត់សម្គាល់ថា តាំងពីអាណត្តិទី២ ទី៣ ទី៤ មកម្លេះ គណបក្សកាន់​អំណាចបានត្រឹមនិយាយចោល ដោយមិនបានអនុវត្ត មានបញ្ហាដីធ្លី ធនធានធម្មជាតិ និងបញ្ហាផ្សេងៗទៀត យើងឃើញ​បញ្ហ​អស់នឹងធ្វើឲ្យប្រជាពលរដ្ឋអស់ជំនឿ ហើយរត់ទៅគាំទ្រគណបក្សប្រឆាំង»៕

---------------------------------------------
ដោយ៖ អ៊ុំ បូរី - ថ្ងៃទី១៥ ខែតុលា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ