បានអីនឹងដឹង បើលោកមិនដែលចេញ ទៅទិញនំប៉័ងនៅខាងក្រៅ ឬនៅក្នុងហាងផងនោះ។ លោកនាយករដ្ឋមន្ត្រីបាន​ថ្លែង​អះអាងថា លោកមានម៉ាស៊ីនសម្រាប់ធ្វើនំប៉័នមួយ នៅផ្ទះលោក ដែលធ្វើឲ្យលោកមិនបានស្គាល់តម្លៃនំប៉័ងនៅខាងក្រៅ។

នំប៉័ង ដឺមី ដែលបណ្ដាជន នៅទ្វីបអ៊ឺរ៉ុប តែងតែទទួលទានជាប្រចាំ។ (រូបថត MONOROOM.info)

ទីក្រុងប៉ារីស - នាយករដ្ឋមន្ត្រីអង់គ្លេស លោកដេវីដ កាមើរូន មិនស្គាល់តម្លៃនំប៉័ងដែលដាក់លក់នៅខាងក្រៅ ឬនៅតាម​ហាងលក់នំប៉័ងទេ។ តែផ្ទុយទៅវិញ លោកបានបង្ហាញពីមូលហេតុយ៉ាងពិសេសមួយ ដើម្បីកុំឲ្យអ្នកផងរិះគន់ ឬសើចពេប​ជ្រាយដាក់លោក។

ឆ្លើយទៅនឹងសំនួររបស់វិទ្យុសម្លេងមួយ ពីទីក្រុងមែនឆេស្ទឺ (Manchester) ដែលមានកិច្ចប្រជុំធំមួយ នៃគណបក្សរបស់​លោក លោកបានថ្លែងថា លោកមិនដែលទិញនំប៉័ងដែលធ្លាប់ឃើញមានលក់នៅតាមហាងនំប៉័ង ឬនៅតាមមជ្ឈមណ្ឌល​ពាណិជ្ជកម្មនោះទេ ដោយសារតែលោកមានម៉ាស៊ីនដើរដោយចរន្ដអគ្គិសនីមួយ នៅផ្ទះរបស់លោក ហើយលោកនិយាយថា លោកគ្រាន់តែដាក់ម្សៅនំប៉័ង ផលិតនៅផ្នែកខាងត្បូងនៃប្រទេសអង់គ្លេស​ ចូលទៅក្នុងនោះវាជាការស្រេច។

លោកនាយករដ្ឋមន្ត្រី បានថ្លែងបញ្ជាក់ថា «លោកអ្នកអាចដាក់ម្សៅនំប៉័ង ដែលផលិតរួចជាស្រេច នៅក្នុងតំបន់កូតស្វ័ដ (Cotswolds) ទៅក្នុងម៉ាស៊ីនធ្វើនំប៉័ង។ លោកអ្នកអាចកំណត់នាទីចំអិនរបស់វា នៅពេលយប់ ហើយនៅពេល​ដែលលោក​អ្នកភ្ញាក់ពីដំណេកឡើង លោកអ្នកនឹងមានអារម្មណ៍យ៉ាងល្អ ជាមួយនឹងក្លិនយ៉ាងឈ្ងុយនៃនំប៉័ង ហោះចេញពីផ្ទះបាយ​របស់លោកអ្នក។» លោកនិយាយថ្លែងនៅតាមវិទ្យុ LBC ទៀតថា លោកត្រូវការតែ៣០វិនាទីប៉ុណ្ណោះ ដើម្បីដាក់គ្រឿងផ្សំ​ធ្វើនំប៉័ងទាំងអស់ ជាពិសេសទៅទៀត «កូនទាំងបីរបស់ខ្ញុំ ចូលចិត្តនំប៉័ងដែលខ្ញុំធ្វើនៅផ្ទះ»។

តែទោះជាយ៉ាងណាក៏ដោយ ក៏អ្នកកាន់កម្មវិធីវិទ្យុ បានបញ្ជាក់ថា ថ្លៃនំប៉័ងមួយកញ្ចប់នៅទីផ្សារមានតម្លៃប្រមាណជា ០,៥៦អ៊ឺរ៉ូ (ឬ០,៧០ដុល្លា)។ សម្រាប់ប្រជាជនដែលរស់នៅបណ្ដាប្រទេសអ៊ឺរ៉ុប ការទទួលទាននំប៉័ង ឬទឹកដោះគោ ដែល​ជា​អាហារប្រចាំថ្ងៃរបស់ពួកគេ ជារឿងធម្មតាមួយ ដែលគ្រប់គ្នាតាំងពីតូចរហូតដល់មនុស្សចាស់ នរណាៗក៏ត្រូវតែទៅ​ឈរ​ទិញនំប៉័ង ឬទឹកដោះគោនៅតាមហាង ឬនៅតាមផ្សារដែរ។ ដូច្នេះកម្រនឹងនរណាម្នាក់ មិនដឹងពីតម្លៃរបស់អាហារ​របស់​ពួកគេ ដែលគេទទួលទាន់សឹងតែរាល់ពេលនោះណាស់។

មន្ត្រីជានខ្ពស់មួយរូប លោក ម៉ៃឃើល ដូហ្គើរ (Michael Dugher) ពីខាងគណបក្សពលករ ដែលជាគណបក្សប្រឆាំង​នៅ​អង់គ្លេស បានវាយតម្លៃថា ទង្វើរបស់នាយករដ្ឋមន្ត្រី កាមើរូន បានដាច់ចេញឆ្ងាយពី«ការពិត»។ លោក ដូហ្គើរ បានអះអាង​បន្ថែមថា «ការភ្ញាក់ផ្អើលតែមួយគត់ បានកើតឡើងនៅពេលដែលលោក កាមើរូន និយាយថា គាត់មាន​ម៉ាស៊ីននំប៉័ងមួយ​នៅផ្ទះ។ មនុស្សជាច្រើនបានគិតថា គាត់ប្រហែលជាមានហាងនំប៉័ងផ្ទាល់ខ្លួន តែមិនមែនជាម៉ាស៊ីនមួយនោះទេ។»

ប៉ុន្តែមិនមែនមានតែលោកនាយករដ្ឋមន្ត្រីម្នាក់ប៉ុណ្ណោះទេ ដែលមិនស្គាល់តម្លៃអាហារប្រចាំថ្ងៃដាក់លក់នៅឯទីផ្សារ។ កាល​ពីពេលថ្មីៗនេះ ចៅហ្វាយក្រុងឡុងដ៍មកពីគណបក្សប្រឆាំងដដែល លោក ប៉ូរីស ចនសុន (Boris Johnson) ក៏បានទទួល​ស្គាល់ដែរ ថាលោកមិនបានដឹងពីតម្លៃទឹកដោះគោ កន្លះលីត្រថ្លៃប៉ុន្មាននោះទេ។ នៅពេលនោះតម្លៃដែលលោក ចនសុន បានលើកឡើង ខុសពីតម្លៃដែលមានពិតនៅទីផ្សារ ហើយលោកបានឆ្លើយថា «ត្រឹមត្រូវហើយ ខ្ញុំមិនស្គាល់តម្លៃ​ទឹកដោះ​គោទេ។ តែមានទាស់ខុសអ្វីទេ ?»

ខាងក្រោមនេះ ជាវីដេអូ ស្ដីពីកិច្ចសម្ភាសរបស់លោក កាមើរ៉ូន នៅតាមវិទ្យុ៖

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី៤ ខែតុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ