វិទ្យាស្ថានឯកទេសខាងវិទ្យាសាស្ត្រនយោបាយដ៏សំខាន់មួយ នៃទីក្រុងប៉ារីសប្រទេសបារាំង បានជ្រើសរើស ដាក់ទៅក្នុង​កម្មវិធី​សិក្សារបស់ខ្លួន នូវរឿងនិទានមួយដ៏ល្បីមានចំណងជើងថា ហារី ផតទ័រ (Harry Potter)។ នេះបើតាមការលើកឡើង របស់​ការសែត​បារាំងមួយ ឈ្មោះថា ឡិចស្ព្រេស (l'Express)។

តួអង្គហារី ផតទ័រ នៅក្នុងភាពយន្ដអាមេរិក។ (រូបថត ភាពយន្ដ)

ទីក្រុងប៉ារីស - កម្មវិធីសិក្សាមួយ ដែលដាក់ឈ្មោះឲ្យថា «ហារី ផតទ័រ ស្វែងយល់ពីអក្សសាស្ត្រ វិភាគតាមបែបចិត្តសាស្ត្រ និងនយោបាយ» ត្រូវបានបង្កើតឡើងដោយវិទ្យាស្ថាននេះ ដើម្បីដាក់ឲ្យមាន នូវការអានសៀវភៅនៃរឿង​ព្រងនិទាន​ចំនួន​៧ក្បាលធំៗ ទៅកាន់និស្សិតរបស់ខ្លួន ឲ្យធ្វើការសិក្សាវិភាគ។ ប៉ុន្តែវិទ្យាស្ថានបានហាមឃាត់ដាក់ខាត ពីការទស្សនា​ភាពយន្ដស្ដីពីរឿងនិទាននេះ មកជំនួសការអាន។ ផ្ទុយទៅវិញ និស្សិតត្រូវបានជម្រុញ ឲ្យជ្រើសរើសការអាន​សៀវភៅ​ផ្សេងៗបន្ថែមទៀត នូវឯកសារណាដែលមានដំណើររឿង ទាក់ទងនឹងភាគនិទានដ៏ល្បីនេះ។

រឿងព្រេងនិទាន​«ហារី ផតទ័រ»  ត្រូវបានផលិតកម្មភាពយន្ដហូលីវូដ របស់អាមេរិកយកមកកែសម្រួល ថតជា​ភាពយន្ដ​ហើយបានបញ្ចាំងនៅតាមរោងនានាក្នុងពិភពលោក ដោយទទួលបាននូវភាពជោគជ័យយ៉ាងខ្លាំងមួយ។ រឿងព្រេង​មាន​សិល្ប៍ចេះហោះ និងចេះក្រឡាខ្លួនផង ជាស្នាដៃនិពន្ធដោយ លោក រ៉ូវលីង (J.K Rowling) រវាងពីឆ្នាំ១៩៩៧ មកដល់ ២០០៧។

សាស្ត្រាចារ្យមួយរូប លោក ហ្វ្រង់ស៊័រ កុំបា (François Comba) ទទួលបន្ទុកបង្រៀននូវកម្មវិធីសិក្សា«ហារី ផតទ័រ» បាន​អះអាងថាជម្រើស​សៀវភៅ ដែលនិយាយពីផ្ទះគ្រូធ្មប់ ផូល័រ (Poudlard)នេះ មានលក្ខណៈគួរឲ្យចាប់អារម្មណ៍ ដើម្បី​ពន្យល់ពីការណែនាំតាមបែបចិត្តសាស្ត្រ និងជាពិសេសពីភាពគួរឲ្យ«ស្រងេះស្រងោច»របស់វា។ សាស្ត្រាចារ្យរូបនេះ ក៏បានណែនាំឲ្យនិស្សិតរបស់លោក ឲ្យជ្រើសរើសប្រធានបទពិសេសជាច្រើន ដូចជា«ឥទ្ធិពល​គ្រឹស្ទ៍សាសនាក្នុង​រឿង​និទាននេះ» ឬ«ហេតុអ្វីសូក្រាត (ទស្សនវិទូក្រិច) ព្រះយេស៊ូ និងហារី សម្រេចចិត្តថាស្លាប់?»នោះជាដើម។

នេះមិនមែនជាលើកទីមួយទេ ដែលស្នាដៃរបស់អ្នក​និពន្ធ រ៉ូវលីង ត្រូវបានសាលាជាន់ខ្ពស់ ឬសកលវិទ្យាល័យនានា លើកយកមកវិភាគនិងសិក្សា។ នៅឆ្នាំ២០១២ សកលវិទ្យាល័យមួយ ឈ្មោះហៅថា ស៊ាំង អេនដ្រូវ (St Andrews) នៅ​ប្រទេសអៀឡង់ ក៏បានរៀបចំជាសិក្ខាសាលាមួយដែរ ដែលនិយាយពីទស្សនវិជ្ជានៅលើប្រធានបទនេះ ដែលនៅពេល​នោះ មានអ្នកសិក្សាស្រាវជ្រាវមកចូលរួម ប្រមាណជា៦០នាក់៕

-----------------------------------------------------------------
ដោយ សេក មនោរកុមារ - ប៉ារីស​ ថ្ងៃទី០៤ ខែតុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ