ការទូត បារីស និងម៉ូស្គូ៖ ស្ថានភាពរបស់ប្រទេសស៊ីរី គឺជារបៀបវីរះដ៏សំខាន់មួយ នៅក្នុងជំនួប រវាងប្រធានាធិបតី ប្រទេសបារាំង និងរ៉ូស៊្សី ក្នុងវិមានអេលីហ្សេ នាទីក្រុងបារីស កាលពីថ្ងៃសុក្រទី១​ ខែមិថុនាកន្លងទៅ។ តែអ្នកតាម ដានស្ថានការណ៍ទាំងឡាយ បានមើលដឹងឃើញពី ភាពមិនចុះសំរុងគ្នាយ៉ាងចំរូងចំរ៉ាស់មួយរវាង ទីក្រុងបារីស និងម៉ូស្គូ។

លោកប្រធានាធិបតីបារាំង ហ្វ្រង់ស៊័រ ហូឡង់ (François Hollande) បានជួបជាលើកទីមួយ ហើយបានខំបញ្ចុះបញ្ចូល    ដៃគូ សន្ទនារបស់គាត់ លោកប្រធានាធិបតីរ៉ូស្ស៊ី វ្លាឌីមៀរ ពូទីន (Vladimir Poutine) ថាដំណោះស្រាយតែមួយគត់ សំរាប់បញ្ហា នៅប្រទសស៊ីរី គឺត្រូវតែសុំអោយ លោក បាឆា អាល់-អាសាដ (Bachar al-Assad) ជាប្រធានាធិបតីសព្វថ្ងៃរបស់បរទេសនេះ អោយចាកចេញពីតំណែង។

នៅក្នុងសន្និសីទសារពត៌មាន ក្រោយពេលជំនួបនោះ លោកប្រធានាធិបតីបារាំង បាននិយាយបញ្ជាក់ នៅនឹងចំពោះមុខ លោកពូទីន ថា «របបរបស់លោក បាឆា អាល់-អាសាដ បានប្រព្រឹត្តនូវអំពើដែលមិនអាចទទួលយកបាន និងមិនអាច អត់អោនអោយបាន។ អ្វីៗដែលរបបនេះបានធ្វើ បានរុញច្រានរបបនេះ ធ្លាក់ទៅក្នុងភាពមិនស្របច្បាប់។ ក្នុងស្ថានភាព បែបនេះ គ្មានដំណោះស្រាយអាចចេញរួចទេ ក្រៅតែពីសុំអោយលោក បាឆា អាល់-អាសាដ​ ចាកចេញពីដំណែង។»

លោកប្រធានាធិបតី បារាំង មានបំណងចង់អោយមានការផ្លាស់ប្ដូរ នូវគោលជំហរ របស់ប្រទេស ធំទាំងពីរ គឺរ៉ូស្ស៊ី និងចិន ដែលបានប្រើសិទ្ធជំទាស់ តាំងពីច្រើនខែមកហើយ ទៅនឹងរាល់ចំណាត់ការរបស់ ក្រុមប្រឹក្សាសន្ដិសុខរបស់ អង្គការសហ ប្រជាជាតិ ប្រឆាំងនឹងរបប លោក បាឆា អាល់-អាសាដ នៅស៊ីរី។

លោកប្រធានាធិបតីរ៉ូស្ស៊ី បានឆ្លើ់យតបមកវីញថា «ការដាក់ទណ្ឌកម្ម មិនប្រាកដថា ជាមធ្យោបាយដ៏ល្អនោះទេ។»​

លោកពូទីនបាននិយាយទៀតថា វាជា «រឿងដែលខុសទំនង» នៅពេលដែល រាល់មធ្យោបាយទាំងឡាយ​ ដែលបានលើក ឡើងដោយ លោក កូហ្វី អាណន្ដ Kofi Annan ប្រេសិតរបស់អង្គការសហប្រជាជាតិ នៅជាធរមាននៅឡើយ សំរាប់ដោះ ស្រាយបញ្ហា។ ហើយគាត់បានបញ្ជាក់ជាថ្មីម្ដងទៀត ពីការជំទាស់របស់រ៉ូស្ស៊ី នូវរាល់ទណ្ឌកម្មទាំងឡាយ ប្រឆាំងរបបរបស់ លោក បាឆា អាល់-អាសាដ។

នៅក្នុងសន្និសីទសារពត៌មាននោះដដែល ប្រធានាធិបតីរូស្ស៊ីរូបនេះ​ បានថ្លែងរៀបរាប់ពីគុណសម្បត្តិរបស់ លោក កូហ្វី អាណន្ដ ថា​ ជាមនុស្សមានបទពិសោធន៍ និងគួរអោយគោរព។ គាត់បានបន្ដថា «យើងត្រូវតែធ្វើអ្វីៗទាំងអស់ ដើម្បីជួយ អោយបេសកកម្មរបស់គាត់បានសំរេច។ ហើយខ្ញុំគិតថា វាដូចជាលឿនពេក ក្នុងការវាយតំលៃថា បេសកកម្មនេះ បាន បរាជ័យ។ (...) អ្វីដែលត្រូវធ្វើ គឺបញ្ជៀស កុំអោយស្ថានភាពធ្លាក់ចុះ ទៅតាមការប្រមើលទុក​ដែលកាន់តែអាក្រក់  និងបង្កា កុំអោយក្លាយទៅជា សង្គ្រាមស៊ីវិល។»

ខណៈ ដែលការយល់ឃើញរបស់ទីក្រុង បារីស និងម៉ូស្គូ មិនចុះសម្រុងគ្នានេះ លោកវ្លាឌីមៀរ​ ពូទីន បែរជាបានទទួលការ គាំទ្រទៅ​វិញពី លោកស្រី អង់ជឺឡា មែរគែល Angela Merkel ទេសាភិបាលអាឡឺម៉ង់ ប្រទេសសមាជិកយ៉ាងសំខាន់របស់ សហគមន៍អ៊ឺរ៉ុប។ មុន​មកដល់បារីស លោកពូទីន​បានចុះ ជួបលោកស្រី មែរគែល នៅប៊ែរឡាំង Berlin។ លោកស្រី ទេសាភិបាលអាឡឺម៉ង់ បានបញ្ជាក់ថា «យើងបានទទួលយល់ស្របគ្នា នៅលើចំនុចមួយ ដែលថា ការដោះស្រាយបញ្ហា នៅស៊ីរី ត្រូវតែធ្វើ តាមផ្លូវនយោបាយ អោយអស់ពីលទ្ធភាពរបស់យើង៕»

--------------------------------------------------------------
ដោយ ៖ មនោរម្យព័ងអាំងហ្វូ - ប៉ារីស ថ្ងៃទី ០២ ខែមិថុនា ២០១២
ប្រភព ៖ ទីភ្នាក់ងាសារពត៌មានបារាំង AFP
Crédit photo: AFP