ខ្សែប្រយុទ្ធ សាម៉ូអែល អេតូ (Samuel Eto'o) បានបង្ហើបឲ្យដឹងថា គាត់ធ្លាប់ស្អប់លោក ជូសេ ម៉ូរីញ៉ូ (Jose Mourinho) មុនពេលដែលគាត់ធ្វើការជាមួយគ្នា នៅក្នុងក្រុមអ៊ីនថើ មីឡាន (Inter Milan)។

កីឡាករ សាម៉ូអែល អេតូ (ឆ្វេង) ជាខ្សែរប្រយុទ្ធ និងលោកជូសេ ម៉ូរីញ៉ូ ជាគ្រូបង្វឹង របស់ក្រុមបាល់ទាត់ ឆែលស៊ី បច្ចុប្បន្ន។ (រូបថត AFP: Cristophe Simon)

គ្រូបង្វឹកម៉ូរីញ៉ូ ធ្លាប់ដឹកនាំក្រុមអ៊ីនថើ ឲ្យទទួលបានពាន៣ក្នុងមួយរដូវកាល កាលពីរដូវកាល២០០៩/២០១០ ហើយ​ក៏ជា​ពេលដែលអេតូ កំពុងតែលេងនៅទៅនោះដែរ។ អេតូ ត្រូវបានលោកម៉ូរីញ៉ូ ទិញទៅជំនួសដំណែងកីឡាករ ស្លាតាន់ អ៊ីប្រាហ៊ីម៉ូវីក (Zlatan Ibrahimovic) ហើយគាត់ក៏ធ្វើបានល្អបំផុតសម្រាប់ក្រុមអ៊ីនថើ។

ទោះបីជាធ្លាប់មានភាពជោគជ័យដ៏ធំធេង ជាមួយគ្នាយ៉ាងនោះក៏ពិតមែន អេតូប្រាប់ថា គាត់មិនដែលពិចារណា ឬគិត​ចង់លេងឲ្យក្រុមលោកម៉ូរីញ៉ូម្តងណាឡើយ កំឡុងដែលគាត់កំពុងតែលេងឲ្យក្រុមបាសេឡូណា (Barcelona)។

អេតូ បានប្រាប់ដល់កាសែតដឹសាន់ (The Sun) ថា៖ «មុនពេលដែលយើងជួបគ្នានៅអ៊ីថើ យើងទាំង២នាក់មិនដែល​ស្គាល់​គ្នាទេ ដូច្នេះទំនាក់ទំនងជាមួយគ្នាក៏គ្មានដែរ។ មានម្តងនោះ ខ្ញុំបានប្រាប់ខ្លួនឯងថា ខ្ញុំនឹងមិនលេងឲ្យក្រុមរបស់​លោកម៉ូរីញ៉ូ​ដាច់ខាត។ ប៉ុន្តែព្រះជាម្ចាស់ បានធ្វើការកែប្រែ និងបានបង្ហាញឲ្យខ្ញុំឃើញពីកំហុស ព្រោះតែពេលនេះគាត់ជា​គ្រូបង្វឹក​របស់ខ្ញុំម្តងទៀត ហើយក៏ជាមិត្តភក្តិរបស់ខ្ញុំដែរ។»

អេតូ ធ្លាប់មានអាជីពដ៏អស្ចារ្យជាមួយក្រុមបាសេឡូណា ក្រុមអ៊ីថើ និងក្រុមជម្រើសជាតិកាម៉ារ៉ូន។ នៅឆ្នាំ២០០៩ គាត់បាន​ចាកចេញពីក្រុមយក្សអេស្ប៉ាញបាសេឡូណា ទៅចូលរួមជាមួយក្រុមអ៊ីនថើ របស់អ៊ីតាលី ដែលមានលោកជូសេ ម៉ូរីញ៉ូ​ កំពុងតែដឹកនាំនៅទីនោះ។

កីឡាករវ័យ៣២ឆ្នាំ អេតូ បានចាកចេញពីក្រុម អេនស្សី ម៉ាខាចកាឡា (Anzhi Makhachkala) មកចូលរួមជាមួយ​ក្រុម​តោខៀវឆែលស៊ី កាលពីថ្ងៃចុងក្រោយនៃការទិញដូរកីឡាករ ក្នុងតម្លៃខ្លួនប្រមាណ ៧លានផោន បន្ទាប់ពីក្លិបទីក្រុងឡុងដ៏​មួយនេះ មិនអាចតាមទិញខ្សែប្រយុទ្ធ វ៉ែន រ៉ូនី (Wayne Rooney) បាន។

អេតូ ក៏ធ្លាប់ជិតផ្ទេរមកកាន់ក្រុមឆែលស៊ីម្តងដែរ កាលពីឆ្នាំ២០០៦ ខណៈដែលកីឡាករ អេឌ្រីអាណូ (Adriano) ក៏ត្រូវ​បាន​ពិចារណា មុនពេលដែលក្លិបសម្រេចចិត្តទិញ អេនដ្រេ ស្សេវឆិនកូ (Andriy Shevchenko) ក្នុងតម្លៃ ៣០លានលោនវិញ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១៣ ខែកញ្ញា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ