ភ្នំពេញ៖ នារសៀលថ្ងៃទី៧ ខែកញ្ញានេះ គ.ជ.ប បាននឹងកំពុងរៀបចំថត«ស្ប៉ត» ស្តីពីការប្រកាសលទ្ធផលបោះឆ្នោតជា​ផ្លូវការ សម្រាប់ទុកចាក់ផ្សាយតាមរយៈទូរទស្សន៍ និងវិទ្យុជាតិ នាថ្ងៃស្អែកទី៨ ខែកញ្ញា តាមកាលកំណត់នៃប្រតិទិន​របស់​គ.ជ.ប មិនមានការកែប្រែអ្វីនោះឡើយ។ តែជាការថត«ស្ប៉ត»ផ្សាយ ដែលប្រភពមួយបាននិយាយថា ជាការធ្វើតាមបង្គាប់​បញ្ជារបស់គណបក្សប្រជាជនកម្ពុជា ដែលជាគណបក្សកាន់អំណាចសព្វថ្ងៃ។

រូបចម្លងពីអេក្រង់របស់គេហទំព័រគ.ជ.ប.។

តាមកិច្ចសម្ភាសជាមួយទស្សនាវដ្តីមនោរម្យព័ងអាំងហ្វូ លោក អ៊ឹម សួស្តី ប្រធានគណកម្មាធិការជាតិរៀបចំការបោះឆ្នោត​បានបញ្ជាក់ថា គ.ជ.ប មិនមានការកែក្រែនូវ​ប្រតិទិនរបស់ខ្លួនក្នុងការប្រកាស នូវលទ្ធផលនៃការបោះឆ្នោត​ជាផ្លូវការ​ណា​មួយនោះទេ។ ប្រធានគ.ជ.ប រូបនេះបានបញ្ជាក់ថា នាវេលាព្រឹកស្អែកនេះម៉ោងប្រាំបី នឹងមានការចាក់ផ្សាយ ពីលទ្ធផល​ជាផ្លូវការ​នៃការបោះឆ្នោតជ្រើសតាំង​តំណាងរាស្រ្ត​នីតិកាលទីប្រាំ តាមរយៈស្ថានីយ៍ទូរទស្សន៍ និងវិទ្យុជាតិ។

តែការប្រកាសលទ្ធផលនៃការបោះឆ្នោត ជ្រើសតាំងតំណាងរាស្ត្រ​អាណត្តិទីប្រាំមួយ ដែលមិនត្រូវបានធ្វើឡើងដោយមាន​ការផ្សាយ​បន្តផ្ទាល់ ឬមានការចូលរួមពីអ្នកការសែត ដូចដែលប្រទេសកាន់លិទ្ធិប្រជាធិបតេយ្យក្នុងលោកបានធ្វើនោះទេ។ លោកអ៊ឹម សួស្ដី ថ្លែងបញ្ជាក់ថា «ការផ្សាយនេះមិន​មានវត្តមានអ្នកសារព័ត៌មាននោះទេ ព្រោះជាការចាក់ផ្សាយ មិនមែន​ផ្សាយបន្ត​ផ្ទាល់ឡើយ។ (…) ឥឡូវនេះយើង​កំពុង​តែ​រៀបចំថត ធ្វើយ៉ាងណាដើម្បីឲ្យបានទាន់ម៉ោងប្រាំបីស្អែក។ អ្នក​ដែល​ប្រកាស គឺលោក ទេព នីថា អគ្គលេខាធិការ គ.ជ.ប។»

ប្រភពព័ត៌មានមួយដែលស្និតនឹង គ.ជ.ប សុំមិនបញ្ចេញឈ្មោះ បានប្រាប់ទស្សនាវដ្តីមនោរម្យព័ងអាំងហ្វូថា ការរៀបចំ​ថត​«ស្ប៉ត»នេះ ជៀសវាងនូវការផ្សាយចេញទៅ មានកំហុសខុសឆ្គងដោយប្រការណាមួយ ឬដោយបច្ចេកទេស។ មន្ត្រីម្ចាស់​ប្រភព​ដដែលបានបញ្ជាក់ថា ករណី«ពិសេស»នៃការថតសម្រាប់ការចាក់ផ្សាយ ដោយមិនផ្សាយផ្ទាល់ឬប្រកាស​លទ្ធផល​ដោយមានការចូលរួមពីអ្នកសារព័ត៌មាននោះ គឺដោយសារតែក្រោយពី​ការថត បានចប់ជាស្ថាពរហើយ និងមុននឹងត្រូវ​បាន​អនុញ្ញាតិ​ឲ្យ​យកទៅចាក់ផ្សាយ ត្រូវបញ្ជូន«ស្ប៉ត»នោះទៅឲ្យថ្នាក់ដឹកនាំ «គណបក្ស​ប្រជាជន​កម្ពុជា»ធ្វើការ«ត្រួតពិនិត្យ»ជាមុនសិន។ «បើមិនត្រឹមត្រូវ ឬមិនស្របតាមអ្វីដែលចង់បាន ឬដូចអ្វីដែលបាន​កំណត់នោះ ត្រូវធ្វើការកែប្រែ ឬផ្លាស់ប្តូរភ្លាម តែបើ​ត្រឹម​ត្រូវនោះទើបអាចយកទៅចាក់ផ្សាយបាន»។

ករណីដែលមានការចោទប្រកាន់ថាការថត«ស្ប៉ត» អំពីការប្រកាសលទ្ធផលជាផ្លូវការ​ នៃការបោះឆ្នោតជ្រើសតាំង​តំណាង​រាស្រ្តនោះ ត្រូវដាក់ទៅឲ្យថ្នាក់ដឹកនាំ«គណបក្សប្រជាជនកម្ពុជា»ធ្វើការ«ត្រួតពិនិត្យ» មុននឹងធ្វើការចាក់ផ្សាយនេះ លោក យឹម សុវណ្ណ នាំពាក្យគណបក្សសង្គ្រោះជាតិ បានប្រាប់ទស្សនាវដ្តីមនោរម្យព័ងអាំងហ្វូថា លោកទទួលស្គាល់ និង«គាំទ្រ»​នូវការលើកឡើងខាងលើនេះ។ លោកបានបន្តរថា «គ.ជ.ប មិនមែនត្រឹមតែស្តាប់គណបក្សប្រជាជន តែក្នុងឆ្នាំនេះនោះទេ ស្តាប់តាំងតែបីបួនឆ្នាំមុនការបោះឆ្នោតម្លេះ។ គ.ជ.ប នណាក៏ដឹងដែរថា ជាឧបករណ៍របស់គណបក្សប្រជាជនកម្ពុជា តាំងតែ​ពី​ឆ្នាំ១៩៩៨មក ហើយតែងតែជួយលួចបន្លំសន្លឹកឆ្នោត បំរើផលប្រយោជន៍ឲ្យគណបក្សប្រជាជន។ (…) ប្រជាពលរដ្ឋលែង​ផ្តល់សេចក្តីទុកចិត្តទៅលើ គ.ជ.ប និងក្រុមប្រឹក្សាធម្មនុញ្ញ ដែលសុទ្ធិតែជាសមាជិកគណបក្សប្រជាជនភាគច្រើននោះ។»

ប្រតិកម្មតបទៅនឹងការលើកឡើងខាងលើ លោក ជាម យៀប ប្រធានគណៈកម្មការសេដ្ឋកិច្ចហិរញ្ញវត្ថុ ធនាគារនិងសវនកម្ម​នៃរដ្ឋសភា និងជាមន្ត្រីជាន់ខ្ពស់គណៈបក្សប្រជាជនកម្ពុជា បានធ្វើការ«បដិសេធទាំងស្រុង»ចំពោះ​ការចោទ​ប្រកាន់​ខាង​លើ​នេះ។ មន្រ្តីជាន់ខ្ពស់នៃគណបក្សប្រជាជនកម្ពុជារូបនេះបានបន្តរថា «គ្មានគណបក្សប្រជាជនកម្ពុជា​បង្គាប់បញ្ជា​ទៅ​គ.ជ.ប យ៉ាងម៉េចៗទេ។ ក្នុងនាមខ្ញុំជាថ្នាក់ដឹកនាំមួយរូបរបស់គណបក្សប្រជាជនកម្ពុជា មិនដែលឮថា ថ្នាក់ដឹកនាំកំពូលនៃ​គណបក្ស​ប្រជាជនកម្ពុជាធ្វើអ្វី ត្រូវដឹងហើយ! (…) គ្មានធ្វើជាការបង្គាប់បញ្ជា ពីគណបក្សប្រជាជនកម្ពុជា ឬពីថ្នាក់ដឹកនាំ​គណបក្សប្រជាជនកម្ពុជា ទៅ គ.ជ.ប នោះទេ។ ខ្ញុំសុំ«បដិសេធដាច់អហង្កា» ចំពោះការចោទប្រកាន់ខាងលើនេះ។

ប្រធានគណៈកម្មការសេដ្ឋកិច្ចហិរញ្ញវត្ថុ ធនាគា និង សវនកម្មនៃរដ្ឋសភារូបនេះ បានបន្តរថា «គ.ជ.ប ធ្វើអ្វីដោយឯករាជ្យ​ម្ចាស់ការខ្លួន​ឯង។ គ្មានការថតណាមួយដើម្បី ឆ្លង (គណបក្សប្រជាជនកម្ពុជា) នោះទេ តាមធម្មតា គណបក្ស​ប្រជាជន​កម្ពុជា"បានដឹង"អស់ទៅហើយ តាំងតែពីការប្រកាសបណ្តោះអាសន្នថ្ងៃទី២៨ ខែកក្កដា រហូតដល់មានការប្រកាស​ផ្លូវការ​បណ្តោះអាសន្នថ្ងៃទី១២ខែសីហា។ (…) គ.ជ.ប បានអនុវត្តការងាររបស់ខ្លួនតាមច្បាប់ រួចរាល់អស់ទៅហើយ ឯក្រុមប្រឹក្សា​ធម្មនុញ្ញក៏បានបញ្ចប់នូវភារកិច្ចរបស់ខ្លួនដែរកាលពី(ថ្ងៃទី៦ ខែកញ្ញា)ម្សិលម៉ិញនេះ ដូច្នេះ គ.ជ.ប អាចធ្វើការប្រកាស​បាន​ហើយ។»

ទាក់ទិននឹងបញ្ហាខាងលើ នាយកប្រតិបត្តិនៃអង្គការ ខុមហ្វ្រែល គល់ បញ្ញា លោកមិនដែលបានដឹងពីបញ្ហាថាមាន​ការ​បង្គាប់ទៅ គ.ជ.ប ដោយគណបក្សប្រជាជនក្នុងការប្រកាសលទ្ធផលបោះឆ្នោតជាផ្លូវការនោះទេ។ ទោះជាយ៉ាងណាក៏​ដោយលោកបានបញ្ជាក់ថា សម្រាប់ការប្រកាសលទ្ធផលជាផ្លួវការ នៃការបោះឆ្នោតតាមរយៈ​នៃការថត«ស្ប៉ត»ទុកចាក់​ផ្សាយនោះ មិនមានអ្វីជាការកត់សម្គាល់ ឬកំហុសធ្ងន់ធ្ងរទេ។

នាយកប្រតិបត្តិនៃអង្គការ ខុមហ្វ្រែល បានបន្តរថា សម្រាប់អាណត្តិមុនៗ លោកក៏មិនបានដឹងថាតើជាការថតផ្ទាល់ ឬជា​ការចាក់ផ្សាយនោះដែរ។ មន្ត្រីរូបនេះបន្ថែមថា (វា)មិនសំខាន់ថា «ផ្ទាល់ឬចាក់ផ្សាយទេ។ អ្វីដែលសំខាន់ថាតើការប្រកាស​នោះពិតជាត្រឹមត្រូវ សម្រាប់ភាគីទាំងអស់ទទួលបានឬទេ។ (…) ម្យ៉ាងទៀត ការប្រកាសលទ្ធផលបោះឆ្នោតជាផ្លូវការនេះ ជាទូទៅអាចថតជា«ស្ប៉ត»បាន ព្រោះលទ្ធផលទាំងអស់នោះ នឹងមិនមានការប៉ះពាល់ឡើយ (វា)គ្រាន់តែមានលក្ខណៈ​ជាទម្រង់ប៉ុណ្ណោះ ព្រោះមានរបាយការណ៏កំណត់ពីទិន្នន័យគ្រប់គ្រាន់អស់ហើយ។ (…) អ្វីដែលចាំបាច់ដែលត្រូវធ្វើការ​ផ្សាយបន្តរផ្ទាល់ ឬអានផ្ទាល់ ដែលមិនអាចថតជាស្ប៉តបាននោះ គឺលទ្ធផលបឋម នាថ្ងៃទី២៨ ខែកក្កដា ដែលជាថ្ងៃ​បោះ​ឆ្នោត ព្រោះគ្រប់ភាគីទាំងអស់ចង់បាននូវតម្លាភាព រួមទាំងម្ចាស់ឆ្នោតផងដែរ។»

-------------------------------------------------
ដោយៈ អ៊ុម វ៉ារី - ភ្នំពេញថ្ងៃទី០៧ កញ្ញា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ