បើទោះបីជាសម្តេចព្រះសង្ឃរាជទំាងពីរគណៈ បានចេញបញ្ជាមិនអនុញ្ញាតឲ្យព្រះសង្ឃ ចូលរួមធ្វើបាតុកម្មនោះយ៉ាងណា​ក៏ដោយ ក៏នៅថ្ងៃទី៧ខែកញ្ញានេះ ព្រះសង្ឃជាច្រើនរយអង្គ នៅតែចូលរួមធ្វើមហាបាតុកម្ម ជាមួយនឹងគណៈបក្សសង្គ្រោះ​ជាតិដដែល។ ព្រះថេរានុថេរៈដែលបានទៅចូលរួម នៅក្នុងមហាបាតុកម្មនោះ សុទ្ធតែអះអាងដូចៗគ្នាថា លោកមិនខ្លាច​សម្តេចសង្ឃដាក់ទោសនោះទេ។

ភាគមួយនៃព្រះសង្ឃ ដែលបានទៅចូលរួមក្នុងមហាបាតុកម្ម របស់គណបក្សសង្គ្រោះជាតិថ្ងៃទី០៧ខែកញ្ញា។ (រូបថត MONOROOM.info/ O. Vary)

«អាត្មាមិនខ្លាចនោះទេ ពីព្រោះអាត្មាធ្វើដើម្បីជាតិមាតុភូមិអាត្មា» នេះគឺជាសង្ឃដីកាជាទូទៅ ប្រកបដោយព្រះភ័ក្ដស្លូតបូត តែមានភាពក្លាហាន​របស់ព្រះថេរានុថេរៈ ដែលបាននិមន្តមកចូលរួម ក្នុងមហាបាតុកម្មរបស់គណបក្សសង្គ្រោះជាតិ នៅទី​លានប្រជា​ធិបតេយ្យ​នាព្រឹកថ្ងៃសៅរ៍ ទី៧ ខែកញ្ញានេះ។ ព្រះសង្ឃព្រះពុទ្ធសាសនារាប់រយអង្គទាំងនោះ បាននិមន្ដមកពីទី​អារាមនានាក្នុង​រាជធានីភ្នំពេញ និងតាមបណ្តាខេត្តមួយចំនួននៅទូទាំងប្រទេសកម្ពុជា ដើម្បីចូលរួមធ្វើមហាបាតុកម្មនេះ។

ការចូលរួមរបស់ព្រះសង្ឃក្នុងមហាបាតុកម្ម ត្រូវបានគេមើលឃើញថា បានបង្ហាញនូវភាព«មិនរវល់» និងអាចនិយាយថា ជាការ«ប្រឆាំង»ទៅនឹងព្រះរាជសង្ឃប្រកាសរបស់សម្តេច សង្ឃ ទេព វង្ស និងសម្តេច សង្ឃ ប៊ូរ គ្រី កាលពីប៉ុន្មានថ្ងៃមុននេះ ដែលចេញបញ្ជាហាមប្រាមមិនឲ្យព្រះសង្ឃនៅទូទាំងប្រទេសកម្ពុជាទាំងអស់ ចូលរូមធ្វើមហាបាតុកម្មអ្វីឡើយ។ នៅក្នុង​សង្ឃប្រកាសនោះ ក៏បានបញ្ជាក់ដែរថា ប្រសិនបើមានភិក្ខុ សង្ឃអង្គណា ល្មើសនឹងសង្ឃបញ្ជានេះ នឹងត្រូវដាក់ទោសតាម​ច្បាប់ជាតិ និងច្បាប់សាសនា (?)។

កំពុងគង់ផ្ទាល់នឹងឥដ្ឋការ៉ូ នាបរិវេណនៃទីលានប្រជាធិបតេយ្យ ហើយព្រះហស្ថម្ខាងកាន់ឆ័ត្រ ដើម្បីបាំងពន្លឺថ្ងៃដែលកំពុង​តែរះវេលាជិតថ្ងៃត្រង់ ព្រះតេជគុណ ថាំង សាន និមន្តមកពីវត្តថាន់ នៅរាជធានីភ្នំពេញ បានមានសង្ឃដីការប្រាប់​ទស្សនាវដ្ដី​មនោរម្យព័ងអាំងហ្វូ ថា «ការហាមប្រាណរបស់សម្តេចសង្ឃទាំងពីរគណៈ ធ្វើឡើងគ្រាន់តែដើម្បីអំណាច​របស់ខ្លួន​តែ​ប៉ុណ្ណោះ មិនបានគិតពីផលប្រយោជន៍ប្រទេសជាតិនោះទេ»។ សង្ឃវ័យជាង ២០ ព្រះវស្សាអង្គនេះ បានមានដីការបន្តថា «បើទោះបីជាព្រះអង្គត្រូវស្លាប់ ឬត្រូវគេធ្វើបាប បណ្តេញចេញពីវត្តយ៉ាងណាក៏ដោយ ក៏ព្រះអង្គនៅតែចូលរូមធ្វើ​មហា​បាតុកម្ម ជាមួយនឹងគណបក្សសង្រោ្គះជាតិដែរ ពីព្រោះរឿងនេះជារឿងជាតិ ហើយបើរឿងជាតិ ក៏ជារឿងរបស់ព្រះអង្គដែរ»។

«កុំស្រឡាញ់អំណាចខ្លាំងពេក!»

ព្រះតេជគុណ ថាំង សាន បានមានថេរដីការបន្តថា បច្ចុប្បន្ននេះព្រះសង្ឃជាច្រើនបានទទួលរង នូវការគាបសង្កត់​គ្រប់​បែបយ៉ាងពីសំណាក់មន្រ្តីសង្ឃ ជាពិសេសគឺពីសំណាក់សម្តេចសង្ឃតែម្តង នៅពេលដែលព្រះសង្ឃអង្គណាចូលរួមក្នុង​សកម្មភាពនយោបាយជាមួយបក្សប្រឆាំង និងសកម្មភាពការពារសិទ្ធិមនុស្ស។ ព្រះតេជគុណ  បានធ្វើការអំពាវនាវ​ឲ្យ​សម្តេចសង្ឃទាំងអស់ និងមន្រ្តីសង្ឃដទៃទៀត គួរតែគិតពីប្រទេសជាតិខ្លួនឯងផង «កុំស្រឡាញ់អំណាចខ្លាំងពេក» និងគួរ​តែយកគំរូតាមព្រះសង្ឃ ដែលហ៊ានចូលរូមគិតគូរពីបញ្ហាប្រទេសជាតិ។

ស្រដៀងគ្នានេះដែរព្រះតេជគុណម្នាក់ទៀតព្រះនាម លី គង់ និមន្ដមកពីវត្តឧណ្ណាឡោម សម្បុរខ្មៅស្រអែម ព្រះភ័ក្ដពោរ​ពេញទៅដោយញើស ដែលហូរចេញមកពីព្រះកេស ព្រោះតែពន្លឺព្រះអាទិត្យខ្លាំងពេក បានមានថេរដីការថា ការចេញ​សេចក្តីប្រកាសរបស់សម្តេច​សង្ឃរាជកាលពីពេលថ្មីៗនេះ ថាគឺជាការបំបិទសិទ្ធិសេរីភាពរបស់ព្រះសង្ឃ ក្នុងការបញ្ចេញ​មតិ។ ព្រះសង្ឃអង្គនេះ បាន​បន្តថា លោកមិនមានការភ័យខ្លាចអ្វីនោះទេ ពីព្រោះអ្វីដែលព្រះអង្គកំពុងធ្វើ គឺជាអំពើល្អ ពោលគឺដើម្បីទាមទារ​សិទ្ធិ​សេរីភាព​ជូនប្រជាពលរដ្ឋ។ ដូច្នេះ វាពិតជារឿងស្របច្បាប់ជាតិ និងច្បាប់សាសនា (?)។

«ព្រះពុទ្ធលោកមិនមែនបង្រៀនឲ្យព្រះសង្ឃ«ឆាប់សិងៗ»នោះទេ»

និមន្តមកពីវត្តឱរ៉ាល់ស្ថិតនៅខេត្តកំពង់ស្ពឺតែមួយអង្គឯង និងមិនបានឆាន់ចង្ហាន់ទៀតនោះ  ព្រះតេជគុណ សម គឹមសាធ កំពុងតែនិមន្ដ​ដើរចេញពីសួន​សេរីភាពប្រកបដោយភាពស្ងៀមស្ងាត់ នៅក្រោយពេលដែលបាតុកម្មបានបិទបញ្ចប់។ តែ​ព្រះអង្គបានឆ្លៀតថ្លែងប្រាប់ទស្សនាវដ្ដីមនោរម្យព័ងអាំងហ្វូ  ដោយបានហៅចំណាត់ការ​របស់សម្តេចព្រះសង្ឃរាជ ថាជា​ការមិនយល់អំពីព្រះពុទ្ធសាសនា សោះឡើយ។ ព្រះអង្គបានពន្យល់ថា ក្នុងផ្លូវព្រះពុទ្ធ​សាសនា ព្រះពុទ្ធលោក​មិនមែន​បង្រៀនឲ្យព្រះសង្ឃគិតតែ«ឆាន់សិងៗ»នោះទេ តែនៅពេលដែលឃើញ​ពុទ្ធបរិស័ទមាន​ទុក្ខហើយនោះ ព្រះសង្ឃត្រូវតែ​ចូលរួមរក«ដំណោះស្រាយជាមួយនឹងពុទ្ធបរិស័ទ ឬប្រជាពលរដ្ឋហើយណាញ៉ោម»។

ព្រះតេជគុណ សម គឹមសាធ បានបញ្ជាក់ថា ប្រសិនបើព្រះអង្គចូលរួមសកម្មភាពនេះ ហើយត្រូវបានគេចាប់យកទៅដាក់​ទោសនោះ គឺព្រះអង្គមានតែសប្បាយចិត្តថែម ពីព្រោះព្រះអង្គមិនបានធ្វើអ្វីខុសនោះទេ។ អ្នកបួសអង្គនេះ បានអំពាវនាវ​ទៅសម្តេចសង្ឃទាំងពីរគណៈ ឲ្យយល់ថារឿងនយោបាយទាំងអស់នេះ ត្រូវការព្រះសង្ឃចូលរួមជាការចាំបាច់ ទើប​ប្រទេស​ជាតិបានសុខសាន្ត។

នៅល្ងាចថ្ងៃនេះដដែល គេមិនទាន់ដឹងនៅឡើយទេ ថាខាងសម្តេចសង្ឃទាំងពីរគណៈគឺសម្តេចសង្ឃ ទេព វង្ស និងសមេ្តច​សង្ឃ ប៊ូរ គ្រី ព្រមទាំងខាងក្រសូង​ធម្មការនោះផង​ នឹងមានចំណាត់ការយ៉ាងណានោះ ទល់នឹងព្រះសង្ឃ«ល្មើស»ទាំង​នេះ។ ទស្សនាវដ្ដីមនោរម្យព័ងអាំងហ្វូ ក៏មិនអាចទាក់ទងអ្នកទទួលខុសត្រូវក្រសូងធម្មការ និងសាសនា និងខុទ្ទកាល័យ​សម្ដេច​សង្ឃទាំងពីរនៅថ្ងៃនេះ ដើម្បីសុំការធ្វើអត្ថាធិប្បាយជុំវិញបញ្ហានេះ បានដែរ។

ប៉ុន្តែទោះជាសង្ឃប្រកាសនេះ បានបញ្ជានិង​ធ្វើឡើងក្រោមរូបភាពសាសនាក៏ដោយ ​តែក្រុមអ្នកការពារសិទ្ធិ​តែងតែចោទថា នោះជាសង្ឃប្រកាសដែលបម្រើ​ឲ្យនយោបាយ របស់គណបក្សកាន់អំណាច ក្នុងពេលដែលកម្ពុជាកំពុង​ស្ថិត​ក្នុងបរិបទ​ប្រទាញប្រទង់នៅក្រោយការបោះឆ្នោត។ លោកនាយក​រដ្ឋមន្ត្រី ហ៊ុន សែន បានដឹកនាំប្រទេស​ដោយ​កណ្ដាប់ដៃដែកតាំង​ពីជិត៣០ឆ្នាំមកហើយ និងជារឿយៗ រដ្ឋាភិបាលរបស់លោក តែង​រងការរិះគន់ថាបានដាក់​គម្នាបលើសិទ្ធិសេរីភាព និង​បង្ខាំង​ពលរដ្ឋខ្លួនឯង មិនឲ្យមានសិទ្ធិបញ្ចេញមតិពេញបរិបូរ៕

---------------------------------
ដោយ៖ ជា ធីរិទ្ធ - ភ្នំពេញថ្ងៃទី៧ ខែកញ្ញា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ