ដើម្បីធ្វើឲ្យក្រុមមួយទទួលបានជោគជ័យ សមាជិកក្នុងក្រុមទាំងអស់ត្រូវតែសហការគ្នា យល់ចិត្តគ្នា និងគ្មានពាក្យថា «អញ» នោះទេ សម្រាប់នៅក្នុងក្រុម។ ប៉ុន្តែជាក់ស្តែងកីឡាករបាល់ទាត់អាជីពជាច្រើនរូប នៅតែប្រកាន់ជាប់ពាក្យ «អញ» ដែលមានន័យថា អត្មានិយម ឬចង់បានល្បី និងចង់បានកេរ្តិ៏ឈ្មោះតែម្នាក់ឯង ដោយមិនគិតពីផលប្រយោជន៏​ក្រុម​ទាំង​មូល។

កីឡាករ រ៉ូប៊ីនញ៉ូ ធ្វើកាយវិការគ្រប់បែបយ៉ាង ដើម្បីបានឆាប់ល្បី ? (រូបថត lemeilleurdupsg.com)

មនោរម្យព័ងអាំងហ្វូ សូមដកស្រង់លើកយកកីឡាករបាល់ទាត់អាជីពទាំង១០រូប ដែលអត្មានិយមជាងគេបំផុត ដូច​ខាង​ក្រោមនេះ៖

១. អាជេន រ៉ូបិន (Arjen Robben)

នៅពេលដែលអ្នកគិតដល់ឥរិយាបទអត្មានិយមនៅលើទីលាន បុរសទី១ដែលអ្នកគិតដល់មុនគេគឺ អាជេន រ៉ូបិន។ អ្នក​អាច​សាកល្បងមើលការប្រកួតក្រុមបាយឺនម៉ូនិជ (Bayern Munich) នោះអ្នកនឹងឃើញខ្សែបម្រើស្លាបអន្តរជាតិហូឡង់ ភាគ​ច្រើនអូសជើងឆ្វេង ហើយទាត់សំដៅទៅទី ជាជាងបញ្ជូនទៅឲ្យមិត្តរួមក្រុមរបស់ខ្លួន ទោះបីជាមិត្តរួមក្រុមរបស់គាត់ស្ថិត​ក្នុងទីតាំងល្អជាងគាត់ក៏ដោយ។

២. ដានីញ៉ែល ស្តឺរ៉ិជ (Daniel Sturridge)

ដានីញ៉ែល ស្តឺរ៉ិជ អាចរកគ្រាប់បញ្ចូលទីបាន ១១គ្រាប់ ក្នុងការប្រកួត ១២លើក ក្នុងលីកសម្រាប់ក្រុមឆែលស៊ី (Chelsea) និងក្រុមលីវើភូល (Liverpool) កាលពីរដូវកាលមុន ហើយអ្នកគាំទ្រនាកីឡាដ្ឋាន អេនហ្វៀល (Anfield) សង្ឃឹមថា គាត់​នឹងក្លាយជាខ្សែប្រយុទ្ធឆ្នើមមួយរូបសម្រាប់ក្រុមនៅរដូវកាល ២០១៣/១៤ នេះ។

កីឡាករវ័យ២៣ឆ្នាំ កំឡុងពេលលេងឲ្យក្រុមតោខៀវ បានជាប់ឈ្មោះជាកីឡាករអត្មានិយម​ជាងគេបំផុត​នៅក្នុងក្របខ័ណ្ឌ​ព្រីមែលីក (Premier League)។ ប៉ុន្តែក្រោយផ្ទេរមកកាន់ក្រុមហង្សក្រហម ហាក់ដូចជាប្រសើរជាងមុន ដោយចេះបញ្ជូន​បាល់ឲ្យមិត្តរួមក្រុមខ្លះៗ។

៣. ណានី (Nani)

ណានី ពុំបានចូលលេងឲ្យក្រុមម៉ែនឆេស្ទើ យូណៃធីត (Manchester Utd) ចាប់ពីខែមេសាមក ហើយគាត់អាចនឹង​ផ្ទេរ​ទៅ​កាន់ក្រុមជូវីនទូស (Juventus) មុនទីផ្សារដោះដូរកីឡាករត្រូវបានបិទ នៅសប្តាហ៏ក្រោយ។

រយះពេល៦ឆ្នាំ នៅក្នុងកីឡាដ្ឋានអូលត្រាហ្វដ (Old Trafford) ខ្សែបម្រើអន្តរជាតិព័រទុយហ្គាល់ លេងដោយបង្ហាញ​ឥរិយាបទឲ្យឃើញថា គាត់ជាកីឡាករសំខាន់បំផុតនៅក្នុងក្រុម ហើយតែងតែញ៉ាក់ទាត់ ញ៉ាក់ទាត់សំដៅទៅទី ទោះបី​ជា​មិត្តរួមក្រុមខំរត់ជ្រែកហែកយ៉ាងណាក៏ដោយ។

៤. គ្រីស្ទែណូ រ៉ូណាល់ដូ (Cristiano Ronaldo)

គ្រីស្ទែណូ រ៉ូណាល់ដូ ជាកីឡាករដែលមានទំនុកចិត្តខ្លាំងលើខ្លួនឯង ប៉ុន្តែតារាឆ្នើមរបស់ព័រទុយហ្គាល់រូបនេះ ចង់ធ្វើអ្វីៗ​បានល្អសម្រាប់តែខ្លួនឯងជាង កាលពីគាត់លេងឲ្យក្រុមម៉ែនញូ និងកាលពីទើបចាប់ផ្តើមនៅរៀលម៉ាឌ្រីដ (Real Madrid) ដំបូង។

អ្នកដែលធ្លាប់មើលក្រុមរៀលម៉ាឌ្រីដ សុទ្ធតែបានដឹងហើយថា រ៉ូណាល់ដូ លេងរបៀបណា។ ដោយសារតែមាន​ជំនាញ​ពិសេសខ្លាំងជាងគេ រ៉ូណាល់ដូ ពុំសូវទុកចិត្តមិត្តរួមក្រុមប៉ុន្មាននោះទេ ដែលជាហេតុធ្វើឲ្យគាត់ ប្រមាញ់ទាត់សំដៅ​ទៅ​រក​ទីតែខ្លួនឯងផ្ទាល់។

៥. ល្វីស ស្វារែស (Luis Suarez)

កីឡាករដែលរកគ្រាប់បាល់បញ្ចូលទីបានច្រើនជាងគេលំដាប់ទី២ កាលពីរដូវកាលមុននៅក្នុងក្របខ័ណ្ឌព្រីមែលីក (Premier League) គ្មានអ្នកណា អាចហ៊ានទុកចន្លោះឲ្យស្វារែស នោះទេ។ ទោះបីជាខ្សែការពារកម្រាស់ប៉ុណ្ណា ស្វារែស ក៏មិនដែលខ្វល់ដែរ ដោយគាត់តែងតែជ្រមុច អូសញ៉ាក់ខ្លីៗទៅមុខជានិច្ច ដើម្បីមានឱកាសទាត់សំដៅទី ហើយនោះហើយ​ជាឥរិយាបទដ៏អត្មានិយមបំផុតរបស់គាត់។

៦. កាឡូស តេវែស (Carlos Tevez)

កាឡូស តេវែស មិនដែលខ្វល់ពីអ្នកណាឡើយ ពោលគឺគាត់ខ្វល់តែម្យ៉ាង ខ្វល់តែពី «កាឡូស តេវែស»។ ខ្សែប្រយុទ្ធ​អាស្សង់ទីន មានឥរិយាបទមួយឆាប់ខឹង និងគិតតែពីប្រយោជន៏ផ្ទាល់ខ្លួន។ ជាក់ស្តែង កាលពីគាត់លេងនៅក្រុមម៉ែនស៊ីធី (Man City) គាត់បានបដិសេធមិនព្រមចូលលេងវគ្គទី២ ក្នុងការប្រកួតឆែមពានលីក (Champions League) ជាមួយ​នឹង​ក្រុមបាយឺនម៉ូនិជ ដោយសារតែខឹង មិនឲ្យគាត់ចូលលេងជាជម្រើស១១នាក់ដំបូង។

៧. រ៉ូបីនញ៉ូ (Robinho)

កាលពីឆ្នាំ២០០៨ រ៉ូបីនញ៉ូ មិនចង់នៅបន្តជាមួយក្រុមរៀលម៉ាឌ្រីដ ដោយសារតែមិនពេញចិត្តគ្រូបង្វឹក ហើយគាត់ទៅត្អូញ​ត្អែរប្រាប់ដល់ម្ចាស់ក្លិបថា គាត់ចង់ផ្ទេរទៅកាន់ក្រុមឆែលស៊ី ប៉ុន្តែឆែលស៊ីពេលនោះ ដេញថ្លៃទាបពេក ខណៈដែលម៉ែនស៊ីធី ហ៊ានឲ្យតម្លៃខ្ពស់ជាង ម្ចាស់ក្លិបក៏លក់គាត់ទៅក្រុមមេឃខៀវ ម៉ែនស៊ីធី។

នៅថ្ងៃដំបូងក្នុងការបង្ហាញខ្លួនក្នុងសន្និសីតសារពត៌មាន ក្នុងនាមជាកីឡាករក្រុមម៉ែនស៊ីធីថ្មី រ៉ូបីនញ៉ូ ពិតជាបំបាក់មុខ​ក្លិប​មេឃខៀវមិនស្ទើរនោះទេ ព្រោះគាត់និយាយថា «ខ្ញុំរីករាយ ហើយខ្ញុំចង់ទៅចូលរួមជាមួយក្រុមឆែលស៊ី»។

៨. នីកូឡាស អាណេលកា (Nicolas Anelka)

អាណេលកា ជាកីឡាករដែលលេងបានច្រើនក្រុមបំផុត ជាងកីឡាករណាៗទាំងអស់ ដូច្នេះប្រហែលជាអ្នកគិតថា គាត់​បានយល់ដឹងពីការធ្វើការសហការជាក្រុមបានល្អហើយ។ ប៉ុន្តែមិនមែនដូច្នោះទេ អតីតខ្សែប្រយុទ្ធបារាំងរូបនេះ ប្តូរក្លិប​ច្រើនក៏ព្រោះតែភាពមិនចុះសម្រុងគ្នាជាមួយនឹងគ្រូបង្វឹក និងមានភាពអត្មានិយម។

៩. ចឺយ បាតុន (Joey Barton)

បាតុន ជាកីឡាករម្នាក់ដែលគេទទួលស្គាល់ថា ជាកីឡាករដែលមានឥរិយាបទឈ្លើយបំផុត និងអត្មានិយម។ នៅលើ​ទី​លានប្រកួត ស្ទើរតែគ្មានប្រកួតណា ដែលគាត់មិនបានទទួលកាតលឿង ឬកាតក្រហមនោះទេ ដោយសារតែ​ភាព​ជម្រូង​ចម្រាស់របស់គាត់។ ជាក់ស្តែង កាលពីពេលថ្មីៗនេះ គាត់បានដៀលខ្សែប្រយុទ្ធក្រុមប៉ារីស ហ្សិនជឺម៉ិន (PSG) ស្លាតាន់ អ៊ីប្រាហ៊ីម៉ូវីក (Zlatan Ibrahimović) ថា៖ «អាច្រមុះធំ»។

១០. សាម៉ូអែល អេតូ (Samuel Eto'o)

អេតូ គាត់មិនដែលលេងដើម្បីប្រយោជន៏ក្លិបអ្នកគាំទ្រ ឬក៏មិត្តរួមក្រុមរបស់គាត់នោះទេ ពោលគឺ គាត់លេងដើម្បីតែលុយ។ កាលពីឆ្នាំ២០០៩ កីឡាករកាមេរ៉ូន បានឈ្នះពានរង្វាន់ក្នុងលីកចំនួន៤ និងឈ្នះឆែមពានលីក ចំនួន២ ជាមួយ​នឹងក្រុម​បាសេឡូណា (Barcelona) និងក្រុម អ៊ីនថើ មីឡាន (Inter Milan)។

លុះដល់ក្រុមម៉ែនស៊ីធី ចាប់អារម្មណ៏គាត់ ហើយនិងឲ្យថ្លៃឈ្នួលគាត់ថ្លៃបំផុត គាត់ក៏រៀបចំថានឹងផ្ទេរទៅ ប៉ុន្តែក្រុមអេនស្សី ម៉ាខាចកាឡា (Anzhi Makhachkala) ក៏បានដាក់តម្លៃឲ្យគាត់ទទួលបាន ថ្លៃឈ្នួលថ្លៃជាងគេបំផុត នៅលើពិភពលោក​ពី​លើ​នោះទៀត ទីបំផុតអេតូ ក៏សម្រេចចិត្តទៅចូលរួមជាមួយក្រុមអេនស្សី របស់ប្រទេសរ៉ុស្សីវិញ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៧ ខែសីហា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ