ខ្សែបម្រើស្លាប ស្តេវ៉ាត ដោនណីង (Stewart Downing) របស់ក្រុមហង្សក្រហម លីវើភូល (Liverpool) នឹងផ្ទេរទៅកាន់​ក្រុមញញួរយក្ស វែសហេម (West Ham) ជាផ្លូវការ នៅថ្ងៃអង្គារ៏នេះ ក្នុងតម្លៃខ្លួន ៦លានផោន (៩.២៧ លានដុល្លា) ហើយ​គាត់សង្ឃឹមថា នឹងជួយឲ្យគាត់ជាប់ក្នុងក្រុមជម្រើសជាតិអង់គ្លេស ដើម្បីលេងបាល់ទាត់ពិភពលោកឆ្នាំក្រោយ។

ខ្សែបម្រើស្លាប ស្តេវ៉ាត ដោនណីង នៅពេលលេងឲ្យក្រុម លីវើភូល។ (រូបថត Julian Finney / Getty Images)

កីឡាករវ័យ២៩ឆ្នាំ បានធ្វើតេស្តពិនិត្យសុខភាព កាលពីយប់ថ្ងៃច័ន្ទ បន្ទាប់ពីក្រុមលីវើភូល យល់ព្រមខាតបង់ក្នុងតម្លៃ ១៤លានផោន ខណៈដែលក្លិបហង្សក្រហម បានទិញគាត់មកពីក្រុម អាស្តុន វីឡា (Aston Villa) កាលពី២ឆ្នាំមុន ក្នុងតម្លៃ​រហូតដល់ ២០លានផោន។

ដោនណីង នឹងទៅចូលរួមជាមួយនឹងអតីតមិត្តរួមក្រុមលីវើភូល អេនឌី ខារ៉ូល (Andy Carroll) ដែលកីឡាករមាឌ​យក្ស​រូបនោះ បានផ្ទេរទៅក្រុមវែសហេម ក្នុងតម្លៃ១៧លានផោន កាលពីពេលថ្មីៗ។ នេះមានន័យថា ក្លិបញញួរយក្ស បានទិញ​កីឡាករ២នាក់ ក្នុងតម្លៃសរុប ២៣លានផោន ខណៈដែលពួកគេមានតម្លៃ ៥៥លានផោន នៅពេលដែលផ្ទេរចូល​ទៅកាន់​កីឡាដ្ឋាន អេនហ្វៀល (Anfield)។

ខ្សែបម្រើអន្តរជាតិអង់គ្លេស ដោនណីង បានបង្ហាញខ្លួនឲ្យក្រុមលីវើភូល ក្នុងក្របខ័ណ្ឌព្រីមែលីក (Premier League) បាន​ចំនួន ២៩ប្រកួត បញ្ជូនឲ្យមិត្តរួមក្រុមទាត់បញ្ចូលទីបាន ៥លើក ប៉ុន្តែគាត់ទាត់បញ្ចូលទីបានតែ ៣គ្រាប់តែប៉ុណ្ណោះ កាល​ពីរដូវកាលមុន ខណៈដែលរដូវកាលដំបូងរបស់គាត់ (២០១១-២០១២) លេងបាន ៣៦ប្រកួត មិនបានបញ្ជូន​ឲ្យ​មិត្តរួម​ក្រុមសោះ និងគ្មានគ្រាប់បាល់ទាត់បញ្ចូលទីសូមបីតែ១គ្រាប់ថែមទៀត (0 Goal, 0 Assist)។

ដោយសារតែទម្រង់លេងមានភាពធ្លាក់ចុះដូចនេះ ធ្វើឲ្យគាត់ធ្លាក់ចេញពីដំណែងក្រុមជម្រើសជាតិអង់គ្លេស របស់​លោក​គ្រូបង្វឹក រ៉យ ហដសិន (Roy Hodgson) ខណៈដែលវត្តមានចុងក្រោយបង្អស់របស់គាត់ក្នុងក្រុមជម្រើសជាតិ កំពុងពេល​ប្រកួតមិត្តភាពជាមួយនឹងក្រុមន័រវែស កាលពីខែឧសភា ឆ្នាំ២០១២។

ហើយគាត់ក៏ត្រូវបានគ្រូបង្វឹកក្រុមលីវើភូល លោកប្រេដិន រ៉ដចឺស (Brendan Rodgers) ព្រមានដែរថា គាត់នឹងមិនមាន​ដំណែងចូលលេងជាជម្រើស១១នាក់ដំបូងរបស់ក្រុមហង្សក្រហមទៀតនោះទេ បន្ទាប់ពីការ​មកដល់របស់ខ្សែបម្រើ​វ័យ​ក្មេងសញ្ជាតិអេស្ប៉ាញ ល្វីស អាល់បឺតូ (Luis Alberto)។

ការលេងបាល់ទាត់ពិភពលោក (World Cup) ជាក្តីស្រម៉ៃរបស់កីឡាករគ្រប់ៗរូប ប៉ុន្តែបើពួកគេចង់លេងក្នុង​ព្រឹត្តិការណ៏​នោះ ចាំបាច់ពួកគេត្រូវតែជាកីឡាករលេងជាជម្រើស១១នាក់ដំបូងជានិច្ច សម្រាប់ក្លិបបាល់ទាត់អាជីពរបស់ខ្លួន និង​មាន​ទម្រង់លេងល្អថែមទៀត ទើបអាចមានការកោះហៅឲ្យចូលក្រុមជម្រើសជាតិ។

ដោនណីង គាត់ដឹងខ្លូនថា បើគាត់នៅក្នុងក្រុមលីវើភូលជាបន្ត គាត់ប្រហែលជាគ្មានឱកាស​ទៅលេងបាល់ទាត់​ពិភពលោក​នោះទេ ដូច្នេះគាត់ត្រូវតែចាកចេញ ដើម្បីទៅក្រុមណាមួយ ដែលអាចឲ្យគាត់បង្ហាញសមត្ថភាព ជាកីឡាករជម្រើស​១១នាក់ដំបូងបាន ជាក់ស្តែងដូចជាក្រុមវែសហេមនេះជាដើម៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១៣ ខែសីហា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ