ម្ចាស់បណ្ដាញសង្គម ដែលធំជាងគេក្នុងពិភពលោក លោក ម៉ាក ហ្សូឃើប៊័រ ជាមហាសេដ្ឋី​វ័យក្មេងម្នាក់​គ្រប់គ្រង​ទ្រព្យធនរហូតដល់ ទៅ ២០,៥ ពាន់លានដុល្លាអាមេរិក ក្នុងអាយុ​ទើបតែ២៩​ឆ្នាំប៉ុណ្ណោះ គិតមកទល់ថ្ងៃនេះ។ ប៉ុន្តែ​សួរថា ហេតុអ្វីក៏យុវជន ម៉ាក ហ្សូឃើប៊ែរ អាចមានលុយច្រើនយ៉ាងនេះ? ចម្លើយយ៉ាងខ្លី ហ្វេសប៊ុក ជាថ្នាំម្យ៉ាងដែល​បានសណ្ដំអ្នកប្រើប្រាស់របស់វា មិនឲ្យដកចិត្តចេញពីវាបានសូម្បីបន្តិចឡើយ។ បណ្ដាញសង្គមនេះ ថែមទាំងបាន​ផ្លាស់ប្ដូរជីវិតអ្នកប្រើប្រាស់វា យ៉ាងសន្ធឹកសន្ធាប់ថែមទៀត។

លោក ម៉ាក ហ្សូឃើប៊័រ ឈរថតរូបនៅពីមុខកូនបង្កើតរបស់លោក ដែលនរណាៗក៏ស្គាល់៖ ហ្វេសប៊ុក។

តាំងពីថ្ងៃបង្កើត រហូតមកទល់បច្ចុប្បន្ន បណ្ដាញសង្គមហ្វេសប៊ុកមានអាយុ៩ឆ្នាំហើយ ហើយគេហទំព័រ​សង្គមដ៏​ល្បី​ល្បាញនេះ បានប្រែក្លាយសឹងតែថា មិនអាចខ្វះបាននៅក្នុងជីវិតរបស់អ្នកប្រើប្រាស់ នាថ្ងៃនេះប្រមាណជា ១ពាន់​លាននាក់ នៅក្នុង ពិភពលោក។ ការផ្លាស់ប្ដូរដ៏ប៉ិនប្រសព្វទាំងឡាយ ដែលបានធ្វើអោយគេហទំព័រ ក្លាយជា​គេហទំព័រ​នៃជីវិតរាល់ថ្ងៃ របស់ យើងទាំងអស់គ្នា ទំនងជានឹងមិនបញ្ឈប់ក្នុងអនាគត ណាមួយនោះទេ។ សូមតាម​ដាន ការផ្លាស់ប្ដូរក្នុងជីវិតរបស់អ្នក ទាំង ២៨យ៉ាង នៅពេលដែលអ្នកចូលទៅកាន់ ហ្វេសប៊ុក៖

១- ខ្ញុំមិនដែលតាមដាន អ្វីអោយច្បាស់លាស់ខ្លាំង នៅលើទំព័រមុខនៃគណនីរបស់ខ្ញុំ ឬមិត្តភ័ក្រម្នាក់ៗ ពីមុន​ពេល​ខ្ញុំមាន ហ្វេសប៊ុក នោះទេ។

២- ខ្ញុំមិនដែលមានមិត្តភ័ក្ត្រដែលច្រើនយ៉ាងនេះទេ។

៣- មិត្តភ័ក្រក្នុងហ្វេសប៊ុករបស់ខ្ញុំ លែងហៅមកខ្ញុំទៀតហើយ តែបែជាផ្ញើរ "poke" មកខ្ញុំទៅវិញ។

៤- តាំងពីមានហ្វេសប៊ុក ស្ថានភាពស្នេហារបស់អ្នក ជាផ្លូវការ មានភាពរញ៉េរញ៉ៃជាងមុន។

៥- គណនីទទួលសាររបស់ខ្ញុំ ដូចជា Yahoo ឬ MSN ឬ Hotmail ... ពេញហៀរដោយការទទួលចូល នូវការកត់ចំណាំ​ទាំង​ឡាយពីហ្វេសប៊ុក។

៦- គេបានប្រាប់ខ្ញុំថា គេស្រឡាញ់ខ្ញុំគ្រប់ពេល គ្រប់វេលា។

៧- ខ្ញុំដឹងថា ខ្ញុំនៅ​ឯណា ទីណា ហើយអ្នកផ្សេងក៏អញ្ចឹងដែរ។

៨- មិត្តភ័ក្ររបស់ខ្ញុំ អោយយោបល់មកខ្ញុំ ចូលចិត្តឬមិនចូលចិត្ត ដោយមិនបាច់និយាយ ឬសសេរជាអក្សរ។

៩- ខ្ញុំដូរ យ៉ាងហោចណាស់ ១២ដង នូវឈ្មោះរបស់ខ្ញុំ។

១០- ខ្ញុំមិនអាចធ្វើពើរ ជាភ្លេច ថ្ងៃខួបកំណើតរបស់នរណាម្នាក់ នោះបានទៀតទេ។

១១- ខ្ញុំមានអនុស្សាវរីយ៍ច្រើនជាងមុន ពេលដែលខ្ញុំចេញដើរកំសាន្ដ។

១២- ខ្ញុំអាចរកឃើញមកវិញ អ្នកដែលខ្ញុំស្រឡាញ់តាំងពីនៅតូច កាលពី១៥ឆ្នាំមុន ដោយប្រើពេលតែ២នាទី និងដៃមួយ​ប៉ុណ្ណោះ។

១៣- ខ្ញុំអាចរកបាន ស្នេហារបស់ខ្ញុំថ្មីម្នាក់ទៀតបាន ដោយគ្រាន់តែលេងល្បែងក្នុង ហ្វេសប៊ុក ប៉ុណ្ណោះ។

១៤- ឈប់ត្រូវការ ចេញដើរនៅខាងក្រៅ ក៏ខ្ញុំនៅតែមានមិត្តភ័ក្រដែរ។

១៥- អ្នកខ្លះគិតថា ខ្ញុំស្អាត ល្អដូចជាតារាភាពយន្ដ តែតាមពិតខ្ញុំគ្រាន់ប្តូររូបថតពិតរបស់ខ្ញុំប៉ុណ្ណោះ។

១៦- ខ្ញុំស្គាល់សមាជិកគ្រួសារខ្ញុំ ច្រើនជាងមុន ដូចជា ប្អូនស្រីខ្ញុំ មានរាងស៊ិចស៊ី និងគួរអោយទាក់ទាញអស្ចារ្យ ជាងអ្វីដែល​ខ្ញុំធ្លាប់ដឹង។

១៧- ខ្ញុំក្លាយជាមិត្តភ័ក្រ ជាមួយនឹងមនុស្ស ដែលខ្ញុំមិនដែលយកភ្នែកមើល​នៅតាមផ្លូវ។

១៨- ចំណេះដឹងទូទៅរបស់ខ្ញុំបានកើនឡើង ខ្ញុំអាចដឹងពីអ្វីៗ នៅកន្លែងណាដោយ ...។

១៩- ខ្ញុំចំណាយពេលច្រើន ជាមួយនឹងការជ្រើសរើសរូបថត សំរាប់ទំព័រមុខនៃគណនី ហ្វេសប៊ុករបស់ខ្ញុំ ដើម្បីជា​ពត៌មានថ្មីៗ សំរាប់មិត្តភ័ក្រខ្ញុំ។

២០- ខ្ញុំជាមិត្តភ័ក្ររបស់ប្រធានាធិបតីអាមេរិច អូបាម៉ា ហើយមានទំនាក់ទំនងស្នេហាជាមួយនឹង អែនហ្សូលីណា ហ្សូលី។

២១- ក្លាយជាអ្នកទាន់សភាពការណ៍ ក្លាយជារឿងដែលខ្ញុំមិនធ្វើមិនបាន។

២២- ខ្ញុំមានមិត្តភ័ក្រពិតប្រាកដ តែស្នាក់នៅក្នុងប្រទេសដែលខ្ញុំមិនស្គាល់ ឬខុសទៅវិញ។

២៣- មិត្តភ័ក្ររបស់ខ្ញុំ ដឹងថាខ្ញុំនៅ លីវ មុនខ្ញុំទៅទៀត។

២៤- ខ្ញុំត្រូវបានគេអញ្ជើញអោយទៅចូលរួម ក្នុងកម្មវិធី ឬព្រឹត្តិការណ៍ជាច្រើន បើទោះជាខ្ញុំមិនស្គាល់អ្នករៀបចំ ក៏ដោយ។

២៥- ខ្ញុំអាចលប់អ្នកណាម្នាក់ចោលក៏បាន ដោយមិនចាំបាច់សំលាប់ (ដោយប្រយោល) អ្នកនោះ។

២៦- កាលដែល ហ្វេសប៊ុន គាំងលែងដំណើរការ កាលពីថ្ងៃទី៧ ខែមិនាកន្លងទៅ បានធ្វើអោយអារម្មណ៍ខ្ញុំគិតថា ចប់​ហើយពិភពលោកយើងនេះ។

២៧- ខ្ញុំត្រូវគេ តាហ្គេ taged ច្រើនជាងឡានបើកនៅលើស្ពានជ្រោយចង្វាទៅទៀត។

២៨- ខ្ញុំអាចតាមដាន រាល់អត្ថបទរបស់ មនោរម្យព័ងអាំងហ្វូ បានគ្រប់ពេលគ្រប់ទីកន្លែង ដោយសារតែខ្ញុំចុចលើ LIKE នៃ​ទំព័ផ្លូវការរបស់ទស្សនាវដ្ដីនេះ នៅលើហ្វេសប៊ុក។

--------------------------------------------------------------
ដោយ ៖ មនោរម្យព័ងអាំងហ្វូ - ប៉ារីស ថ្ងៃទី ១៦ ខែឧសភា ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ