លោក ម៉ាញូអែល ប៉េឡេហ្គ្រីនី (Manuel Pellegrini) បាននិយាយថា គាត់មានអារម្មណ៏ថា គាត់គ្មានសម្ពាធនោះទេ ក្នុង​ការប្រជែងយកឈ្នះពានរង្វាន់ព្រីមែលីក (Premier League) សម្រាប់ក្រុមម៉ែនឆេស្ទើ ស៊ីធី (Manchester City) នៅរដូវ​កាល​ថ្មី។

លោកម៉ាញ៉ូអែល ប៉េឡេហ្គ្រីនី គ្រូបង្វឹកសញ្ជាតិឈីលី។ (រូបថត diarioeldia.cl)

ក្រុមមេឃខៀវ ម៉ែនស៊ីធី បានបាត់បង់ដំណែងជើងឯក ទៅក្រុមម៉ែនឆេស្ទើ យូណៃធីត (Manchester United) កាលពីរដូវ​កាលមុន បន្ទាប់ពីគ្រងជើងឯកបានតែ១រដូវកាល កាលពីឆ្នាំ២០១២។

ប៉ុន្តែអតីតគ្រូបង្វឹកក្រុមម៉ាឡាកា (Malaga) លោកប៉េឡេហ្គ្រីនី ដែលបានមកជំនួសដំណែងលោករ៉ូបឺតូ ម៉ែនស៊ីនី (Roberto Mancini) កាលពីខែមិថុនា បាននិយាយថា គោលដៅរបស់គាត់ គឺធ្វើយ៉ាងណា ឲ្យទទួលបានលទ្ធផលល្អនៅពេលខាងមុខ និងអភិវឌ្ឍន៏បន្ថែមនូវកីឡាករវ័យក្មេង។

បុរសវ័យ ៥៩ឆ្នាំសញ្ជាតិឈីលី បាននិយាយថា៖ «ខ្ញុំមិនមែនមកទីនេះ ដើម្បីចង់ឈ្នះតែពានរង្វាន់នោះទេ ខ្ញុំមកទីនេះ​ក៏ដើម្បីអភិវឌ្ឍន៏កីឡាករវ័យក្មេងៗដែរ។ ខ្ញុំមិនបារម្មណ៏ ចំពោះការបញ្ចប់ចំណាត់ថ្នាក់ត្រឹមលេខ២។ ហើយខ្ញុំក៏មិន​បារម្មណ៏ ពីសម្ពាធដែរ។»

ទោះបីជាយ៉ាងណា គ្រូបង្វឹករូបនេះ ក៏បានលើកឡើងដែរថា ភាពជោគជ័យនៅតែជាគោលដៅចំបងរបស់គាត់។

គាត់បាននិយាយថា៖ «ក្នុងនាមជាគ្រូបង្វឹកមួយរូប យើងតែងតែចង់ទទួលបានភាពជោគជ័យ។ ខ្ញុំព្យាយាមដើម្បី​ទទួលបានក្រុមមួយដ៏ខ្លាំង ដែលអាចនាំឲ្យយើងទទួលបាននូវពានរង្វាន់។»

លោកប៉េឡេហ្គ្រីនី ក៏បាននិយាយដែរថា គាត់ចង់ទិញខ្សែប្រយុទ្ធមួយរូបទៀត ប៉ុន្តែគាត់សុំស្នើរដល់អ្នកគាំទ្រទាំងអស់ កុំរំពឹងទុក ឬចង់បានខ្សែប្រយុទ្ធឆ្នើមៗខ្លាំងពេក។

និយាយនៅក្នុងសន្នីសិទកាសែតលើកដំបូង ចាប់តាំងពីគាត់ក្លាយជាគ្រូបង្វឹកថ្មី លោកបានបន្ថែមថា៖ «យើងត្រូវការក្រុម​មួយដែលល្អ។ នៅសប្តាហ៏ក្រោយ អ្នកនឹងឃើញកីឡាករប្លែកៗ នៅក្នុងក្រុម។ ខ្ញុំមិនអាចទិញកីឡាករថ្មី ៤ឬ៥នាក់ ចូល​ក្រុមរាល់ឆ្នាំនោះទេ ដូច្នេះយើងត្រូវតែពង្រឹងសមត្ថភាពកីឡាករយុវជនរបស់យើង៕»

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១១ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ