ការរាប់ថយក្រោយសល់ រយះពេលត្រឹមតែ១ឆ្នាំទៀត នឹងឈានដល់ព្រឹត្តិការណ៏ដ៏ធំបំផុត នៃបាល់ទាត់ពិភពលោកឆ្នាំ​២០១៤ (2014 World Cup) នៅប្រទេសប្រេស៊ីល ដែលអ្នករៀបចំ ហើយប្រទេសនេះបានដាក់តាំងបង្ហាញ​នូវនាឡិកាធំ​មួយ ដើម្បីកំណត់ពេលរហូតដល់ថ្ងៃចាប់ផ្តើមទាត់។

ការសម្ភោធដាក់ឲ្យប្រើប្រាស់នាឡិការនេះ ដើម្បីរាប់ថ្ងៃពីនេះទៅដល់ពេលបើកការប្រកួត។ (រូបថត Reuters)

នាឡិកាយក្សនោះ ត្រូវបានដាក់តាំងនៅលើឆ្នេរខ្សាច់ កូផាកាបាណា (Copacabana) នៅក្នុងទីក្រុង រីយ៉ូ ដេជេណឺរ៉ូ (Rio de Janeiro) ប្រទេសប្រេស៊ីល កាលពីថ្ងៃពុធ ខែមិថុនានេះ។

វាក៏មានគោលដៅមួយ ដើម្បីជួយរំឮក ដល់អ្នករៀបចំ ឬប្រជាពលរដ្ឋប្រេស៊ីលទាំងអស់ ឲ្យមានការត្រៀមខ្លួនឲ្យបាន​រួច​រាល់ទាន់ពេលវេលា ដើម្បីត្រៀមខ្លួនស្វាគមន៏ភ្ញៀវទេសចរណ៏ ដែលធ្វើដំណើរមកពីជុំវិញពិភពលោក។

គ្រប់ហេដ្ឋារចនាសម្ព័ន្ធនានា នៅតាមបណ្តាទីក្រុង ក៏កំពុងតែមមាញឹក ក្នុងការសាងសង់ និងស្ថាបនាបន្ថែមដែរ ហើយ​មួយចំនួនធំក៏បានរួចរាល់ហើយ ប៉ុន្តែមួយចំនួនទៀត ក៏កំពុងតែដំណើរការ។

ចំណែកឯកីឡាករដ្ឋានសម្រាប់ការប្រកួត នៅសល់ចំនួនពីរឬបីទៀត មិនទាន់បានបញ្ចប់រួចរាល់ទេ ក្នុងនោះដូចជា​កីឡាដ្ឋានមួយ នៅក្នុងទីក្រុងសៅប៉ូឡូ (Sao Paulo) ទើបតែដំណើរការសាងសង់បាន ៦០%ទេ។

កីឡាដ្ឋាន៦ ក្នុងចំណោមកីឡាដ្ឋានទាំងអស់ចំនួន១២ សម្រាប់ការប្រកួតបាល់ទាត់ពិភពលោកនោះ នឹងត្រូវរៀបចំធ្វើការ​ប្រកួតនៅថ្ងៃសៅរ៏នេះ ខណៈដែលប្រេស៊ីល ជាម្ចាស់ផ្ទះការប្រកួតពានរង្វាន់ខនហ្វេដឺរ៉ឺសិនខាប់ឆ្នាំ២០១៣ (2013 Confederations Cup)។

មូលហេតុដែលប្រេស៊ីល ដាក់តាំងនាឡិកាធំ នៅលើឆ្នេរខ្សាច់កូផាកាបាណានោះ ពួកគេចង់បង្ហាញ ពីឆ្នេរខ្សាច់ដ៏ស្រស់​ឆើតឆាយ របស់ទីក្រុងរីយ៉ូ ហើយពួកគេសង្ឃឹមថា អ្នកគាំទ្រក្រុមបាល់ទាត់មកពីបណ្តាប្រទេសទាំងអស់ នឹងបានលេង​កំសាន្តនៅក្នុងឆ្នេរខ្សាច់នោះ។

បាល់ទាត់ពិភពលោកឆ្នាំ២០១៤ នឹងមានភាពជក់ចិត្តបន្ថែមទៀត ខណៈដែលប្រេស៊ីលដែលជាម្ចាស់ផ្ទះនោះ នឹង​បង្ហាញ​នូវក្បាច់រាំសាំបារបស់ខ្លួន នៅពេលដែលក្រុមទាត់បញ្ចូលទី គូប្រកួត។ មិនត្រឹមតែក្រុមប្រេស៊ីលទេ ក្នុងនោះមានក្រុម​មក​ពីតំបន់អាហ្វ្រិក និងមកពីអាមេរិកខាងត្បូងដែរនោះ ក៏មានវប្បធម៌ស្រដៀងគ្នាដែរ ឲ្យតែពេលទាត់ចូលទី កីឡាកររបស់គេ នឹងបង្ហាញពីក្បាច់រាំ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១៣ ខែមិថុនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ