កីឡាករប្រណាំងរថយន្តក្រុមរ៉េដប៊ុល (Red Bull) សេសបាស្ទែន វេថេល (Sebastian Vettel) នៅតែបន្តឈរនៅលើ​កំពូល​តារាងកាណាដា ហ្គែនប្រៃ (Canadian Grand Prix) បន្តទៀត បន្ទាប់ពីឈ្នះការប្រណាំងនាំមុខគេ ខណៈដែលកីឡាករ​ហ្វឺណាន់ដូ អាឡុនសូ (Fernando Alonso) បាន ប្រជែងយកដំណែងលេខ២ ពីកីឡាករឡេវីស ហាមីលតុន (Lewis Hamilton) បានសម្រេច។

កីឡាករ សេសបាស្ទែន វេថេល នៅពែលបានទទួលពានរង្វាន់។ (រូបថត Getty Images/Paul Gilham)

អ្នកប្រណាំងវេថេល បាននាំមុខគេដាច់នៅជុំទី៣ ហើយក៏ជាជ័យជំនះលើកទី១របស់គាត់ដែរ នៅក្នុងទីលាន​ប្រណាំង​របស់កាណាដា ខណៈដែលកីឡាករអាឡុនសូ ដែលបើកឲ្យក្រុមហ្វឺរ៉ារី (Ferrari) បានវ៉ាផ្តាច់កីឡាករលេខ២ ហាមីលតុន ដែលបើកឲ្យក្រុមមឺសេដេស (Mercedes) បានសម្រេចនៅជុំទី៩។

ដូច្នេះអាឡុនសូ បានឡើងទៅឈរនៅចំណាត់ថ្នាក់លេខ២វិញ មាន១៨ពិន្ទុ ខណៈដែលវេថេលឈរនៅចំណាត់ថ្នាក់​លេខ១ មាន២៥ពិន្ទុ និងហាមីលតុន ចំណាត់ថ្នាក់លេខ៣ មាន១៥ពិន្ទុ។

កីឡាករលេខ១ (វេថេល) បាននិយាយថា «វាជាការប្រណាំងដ៏អស្ចារ្យ។ ខ្ញុំបានចាប់ផ្តើមយ៉ាងល្អ និងរថយន្តរបស់ខ្ញុំ​ក៏ពុំ​មានបញ្ហាអ្វីដែរ។ ជ័យជំនះមួយនេះ ពិតជាសំខាន់ខ្លាំងណាស់សម្រាប់រូបខ្ញុំ ក៏ដូចជាក្រុមទាំងមូល។ ខ្ញុំពិតជារីករាយ និង​មានមោទនភាពខ្លាំងណាស់។»

វេថេល ចាប់ផ្តើមឡើង២ជុំដំបូង បានត្រឹមតែចំណាត់ថ្នាក់ទី២ទេ ហើយគាត់ត្រូវបានកីឡាករហាមីលតុន នាំមុខចំនួន​១៥វិនាទី ប៉ុន្តែទីបំផុតគាត់អាចវ៉ាយកចំណាត់ថ្នាក់លេខ១ បានសម្រេចនៅជុំទី៣ ហើយក៏រក្សារដំណែងនោះរហូត​ដល់​ការប្រកួតបញ្ចប់ដែរ។

អ្នកប្រណាំងចំណាត់ថ្នាក់លេខ២ (អាឡុនសូ) បាននិយាយថា «យើងបានប្រជែងគ្នា ចង់បានទីតាំងនាំមុខគេ ដូច្នេះវាមិន​មែនជារឿងងាយស្រួលនោះទេ បើទោះបីជាអ្នកមានជំនាញខ្លាំងប៉ុណ្ណាក៏ដោយ។ ប៉ុន្តែទោះជាយ៉ាងណា ខ្ញុំអាចធ្វើបាន​ល្អ​ដែរ គ្រាន់តែមិនបានឥតខ្ចោះតែប៉ុណ្ណោះ។»

ចំណែកឯកីឡាករហាមីតុន ដែលត្រូវអាឡុនសូ វ៉ាយកចំណាត់លេខ២បាននោះ បាននិយាយថា «យើងបានចាប់ផ្តើម បាន​យ៉ាងឥតខ្ចោះហើយ ប៉ុន្តែដោយសារតែមានកំហុសឆ្គង បន្តិចបន្តួច ទើបធ្វើឲ្យយើងទទួលបានលទ្ធផលដូចនេះ។ ប៉ុន្តែខ្ញុំ​សន្យាថា នឹងយកឈ្នះពួកគេវិញ នៅការប្រណាំងលើកក្រោយ៕»

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១០ ខែមិថុនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ