កីឡាករប្រណាំងរថយន្ត F1 អេស្ប៉ាញ ហ្វឺណាន់ដូ អាឡុនសូ (Fernando Alonso) បាននិយាយថា គាត់នឹងបញ្ចប់អាជីព​ជាអ្នកប្រណាំងរថយន្ត នៅក្នុងក្រុម ហ្វឺរ៉ារី (Ferrari)។

ហ្វឺណាន់ដូ អាឡុនសូ កីឡាករប្រណាំងរថយន្ត F1 ជនជាតិអេស្ប៉ាញ។

មកដល់ឆ្នាំ២០១៣នេះ អាឡុនសូ បានបើកបរឲ្យក្រុម ហ្វឺរ៉ារី បាន៤រដូវកាលហើយ។ លោក ប្រធានក្រុមហ៊ុន ហ្វឺរ៉ារី លូកា ម៉ុងតេស្ស៊ីម៉ូឡូ (Luca Montezemolo) កាលពីពេលថ្មីៗនេះ បានប្រាប់ឲ្យដឹងថា កិច្ចសន្យារបស់កីឡាករអេស្ប៉ាញ នៅមាន​រយះពេលវែង ដែលនឹងបញ្ចប់នៅឆ្នាំ ២០១៥។

អាឡុនសូ បាននិយាយថា «ប្រាកដណាស់ ខ្ញុំចង់បញ្ចប់អាជីពខ្ញុំ ជាមួយនឹងក្រុម ហ្វឺរ៉ារី ព្រោះវាជាក្រុម ដែលល្អបំផុតមួយ នៅលើពិភពលោក ហើយដូចជាគ្មានក្រុមណាមួយ នៅលើក្រុមមួយនេះទេ»។

គួររំឮកថា អាឡុនសូ បានជួយឧបទ្ទវហេតុមួយ នៅក្នុងការប្រណាំងជុំទី១ នៅក្នុងប្រទេសម៉ាឡេស៊ី កន្លងមក ដែលធ្វើឲ្យ​គាត់មិនពេញចំពោះលទ្ធផល។ រថយន្តរបស់កីឡាកររូបនេះ បានរ៉េ ទៅប៉ះទង្គិចគ្នាជាមួយ នឹងរថយន្តអ្នកប្រណាំង រ៉េដប៊ុល (Red Bull) សេបាស្ទែន វីថែល (Sebastian Vettel)។ បន្ទាប់មករថយន្តរបស់ អាឡុនសូ ក៏មានការខូតខាតខ្លាំង នៅផ្នែកស្លាបឆ្វេង ហើយក៏មិនអាចបន្តការប្រកួតតទៅមុខទៀតបាន ដែលធ្វើឲ្យកីឡាកររូបនេះ បាត់បង់ពិន្ទុអស់​យ៉ាង​ច្រើន។

កីឡាកររូបនេះ បាននិយាយថា «ដូចអ្នកទាំងអស់គ្នាបានឃើញហើយ វាពិតជាមិនគួរឲ្យជឿ ខ្ញុំមានសង្ឃឹមយ៉ាងខ្លាំង​នៅ​មុនការប្រកួតបានចាប់ផ្តើម ប៉ុន្តែដោយសារតែសំណាងមិនល្អ ទើបជួបរឿងបែបនេះ។ ខ្ញុំពិតជាសោកស្តាយខ្លាំងណាស់ ចំពោះហេតុការណ៏នេះ ហើយខ្ញុំសូមអភ័យទោស ដល់មិត្តរួមក្រុមទាំងអស់ និងលោកប្រធានក្រុមហ៊ុន ហ្វឺរ៉ារី។ »

អ្នកប្រណាំងវ័យ ៣១ឆ្នាំរូបនេះ បានបន្ថែមថា «ក្នុងករណីនេះ មានអ្នកប្រណាំងជាច្រើន ក៏បាននិយាយដែរថា បើសិន​ជាខ្ញុំមិនជួបរឿងដូច្នោះទេ ប្រហែលជាខ្ញុំមានឱកាសច្រើន ក្នុងការនាំមុខគេ នៅប្រទេសម៉ាឡេស៊ី។ ប៉ុន្តែហេតុការណ៏ ដែលបម្រុងនឹងកើតហើយ មិនអាចជៀសរួចទេ ដូច្នេះនេះជាមេរៀនសំរាប់ខ្ញុំ ដែលត្រូវតេជៀសវាង និងមានការប្រុង​ប្រយ័ត្នក្នុងពេលអនាគត៕»

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១១ ខែមេសា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ