តៃវ៉ាន់៖ រញ្ជួយព្រះធរណីធ្វើឲ្យស្លាប់ពីរនាក់ របួស២១នាក់ និងបាត់ខ្លួនម្នាក់ (VDO)
ការរញ្ជួយដីមួយ ដែលមានកម្រិតខ្លាំងជាង៦.០ បានកើតឡើងនៅកោះតៃវ៉ាន់ ហើយបានបង្កឲ្យមនុស្សស្លាប់ពីរនាក់ របួស២១នាក់។ ការរញ្ជួយបានអង្រួនអាគារធំៗជាច្រើន នៅក្នុងរដ្ឋធានីតៃប៉ិ បង្ខំឲ្យបណ្ដាជនអ្នករស់នៅទីនោះ រត់ចេញមកនៅតាមផ្លូវ។ នេះជាការប្រកាសឲ្យដឹង របស់អាជ្ញាធរ។
ការរញ្ជួយដី បង្កការរអិលដីធ្លាក់ចុះពីលើភ្នំ ធ្វើឲ្យមានធូលីហុយឡើងដូចពពក។
ភាពរង្គើបានពង្រីកឥទ្ធិពលរបស់ខ្លួន រហូតទៅដល់ក្រុងហុងកុង ដែលមានចម្ងាយជាង៧០០គីឡូម៉ែត្រពីកោះតៃវ៉ាន់ តែមិនមានការប្រកាសអាសន្នណាមួយ ត្រូវបានអាជ្ញាធរហុងកុងដាក់ចេញនោះឡើយ។ ការរញ្ជួយដីបានកើតឡើងនៅម៉ោង ១៣និង៤៣នាទីរសៀលថ្ងៃអាទិត្យ ប្រមាណជា៣២គីឡូម៉ែត្រផ្នែកខាងកើតនៃតំបន់ ណានទូ (Nantou កណ្ដាលកោះតៃវ៉ាន់) ជាមួយនឹងកម្រិតរញ្ជួយ៦,៣រិចទ័រ វាស់ដោយមជ្ឈមណ្ឌលរញ្ជួយដីរបស់តៃវ៉ាន់។ វិទ្យាស្ថានឧត្តុនិយមអាមេរិកាំង (USGS) បានវាស់ឃើញខុសគ្នាបន្តិច ពីកម្រិតរញ្ជួយនេះ ថាមានត្រឹមតែ៦,២ប៉ុណ្ណោះ។
ផ្នែកជួយសង្គ្រោះបានអះអាងថា មនុស្សពីរនាក់ត្រូវបានសម្លាប់ដោយការធ្លាក់ដុំថ្មសង្កត់ ដែលក្នុងនោះបុរសម្នាក់បានកំពុងតោងឡើងភ្នំ អាលី និងមនុស្សបីនាក់ពីក្នុងមនុស្សរបួស២១នាក់ ស្ថិតក្នុងសភាពធ្ងន់ធ្ងរ។
នៅភូមិជូឆ័ន (Chushan) នៃតំបន់ណានទូ អ្នកជួយសង្គ្រោះកំពុងកាយដុំថ្មទម្ងន់រាប់សិបតោនចេញ ដើម្បីព្យាយាមទាញបុរសម្នាក់ពីក្រោមនោះ។ តែអ្នកទទួលខុសត្រូវម្នាក់ បានប្រាប់ទីភ្នាក់ងារសារព័ត៌មានបារាំង អាអេហ្វប៉េ ថា«ក្ដីសង្ឃឹមពីការនៅមានជីវិតរបស់បុរសនេះ មានតិចតួចជាទីបំផុត»។
ស្ថានីយ៍ទូរទស្សន៍បានផ្សាយពីរូបភាព នៃការរអិលធ្លាក់ដី និងបង្ហាញពីពពកនៃលំអងធូលី នៅតាមជួភ្នំនានានៃតំបន់ដែលរងគ្រោះ។ អាជ្ញាធរបានបិតលែងឲ្យរត់ នូររថភ្លើងល្បឿនលឿន ចំនួន៦ខ្សែ ហើយនឹងអាចបើកឲ្យធ្វើចរាចរណ៍វិញ នៅពេលណាដែលផ្លូវដែកត្រូវបានត្រួតពិនិត្យល្អិតល្អន់ជាមុនសិន។ ដោយឡែកសកម្មភាពមជ្ឈមណ្ឌលនុយក្លេអ៊ែចំនួនបី នៅតៃវ៉ាន់ មិនត្រូវបានរងការប៉ះពាល់នោះទេ។
កាលពីឆ្នាំ១៩៩៩ តំបន់នេះធ្លាប់រងការរញ្ជួលដីដល់កម្រិត ៧,៦ បង្កឲ្យមានមនុស្សស្លាប់ ២៤០០នាក់ ដែលជាគ្រោះថ្នាក់មានសភាពខ្លាំងជាងគេបំផុត នៅក្នុងប្រវត្តិសាស្ត្រទំនើបនៃកោះ។ មុននេះប៉ុន្មានខែ នៅចុងខែមិនា ការរញ្ជួយដីដែលមានកម្រិត៦,១ បានអង្រួនផ្ទៃដីទាំងមូលនៃកោះ ហើយបានបង្កឲ្យមនុស្សម្នាក់ស្លាប់ និងច្រើនជាង៨០នាក់ផ្សេងទៀតរបួស៕
សូមទស្សនាវីដេអូ ពីការរញ្ជួយនេះដូចខាងក្រោម៖
-------------------------------------------------
ដោយ ៖ កេសរកូល - ភ្នំពេញ ថ្ងៃទី០២ ខែមិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ