ក្រុមហ៊ុនមីក្រូស្សូហ្វ (Microsoft) បានបង្ហាញកាលពីថ្ងៃព្រហស្បតិ៏ម្សិលមិញថា ក្រុមហ៊ុនបានធ្វើកំណែប្រែប្រព័ន្ធ​ប្រតិបត្តិការវីនដូវ (Windows) ថ្មីមួយ ដែលនាំមកជាមួយនូវប៊ូតុង «ចាប់ផ្តើម» (Start) ត្រឡប់មកវិញ បន្ទាប់ពីបាត់មុខ​មួយរយះ សម្រាប់អ្នកដែលប្រើប្រាស់វីនដូ៨ កន្លងមក។

ការបង្ហាញនូវផលិតផលថ្មីរបស់ក្រុមហ៊ុនមីក្រុសូហ្វ ជាពិសេសវីនដូវ កូនសម្លាញ់របស់ខ្លួន។

ប្រព័ន្ធប្រតិបត្តិការវីនដូជំនាន់ថ្មីនេះ មានរហ័សនាមថា «វីនដូខៀវ» (Windows Blue)។ ក្រុមហ៊ុននឹងចេញនូវវីនដូនេះ នៅថ្ងៃ​ទី២៦ខែមិថុនា ហើយអ្នកប្រើប្រាស់វីនដូ៨ ទាំងអស់អាចធ្វើបច្ចុប្បន្នកម្ម (update) បានដោយឥតគិតថ្លៃ នូវស៊េរី៨.១នេះ។

នាយករងទទួលបន្ទុកគ្រប់គ្រងខាងសរសេរកម្មវិធីវីនដូ លោកអេនតុញ ឡេប្លូន (Antoine Leblond) បាននិយាយថា «វីនដូ៨ មានលក្ខណៈប្រសើរហើយ ប៉ុន្តែវីនដូ៨.១នេះ កាន់តែពិសេសបន្ថែមទៀត ជាមួយនឹងការរចនាខុសគ្នាបន្តិចបន្តួច នឹងធ្វើឲ្យ​ចំណេញពេលដល់អ្នកប្រើប្រាស់។»

គួរបញ្ជាក់ថា វីនដូ៨របស់ក្រុមហ៊ុនមីក្រូស្សូហ្វ ដែលចេញលក់កាលពីឆ្នាំ២០១២មកនោះ ពុំមានប៊ូតុង «ចាប់ផ្តើម» ដូចវីនដូ៧ ដែលនៅខាងក្រោមឆ្វេងដៃនៃអេក្រង់កុំព្យូទ័រនោះទេ ពោលគឺវាមាននៅខាងស្តាំអេក្រង់ ហើយទាល់តែរំកិលកូនកណ្តុរ​ទៅដាក់ជ្រុងលើ ឬក្រោមទៀត ទើបវាបង្ហាញចេញមក។

លោកឡេប្លូន បានបន្តថា «ពេលនេះ វីនដូ៨.១ បាននាំប៊ូតុង «ចាប់ផ្តើម» មកវិញហើយ។ ហើយវាបានបន្ថែមនូវមុខងារ និង​តួនាទីថ្មីមួយចំនួនទៀត និងអាចភ្ជាប់ទំនាក់ទំនងជាមួយនឹងទូរស័ព្ទដៃយ៉ាងងាយស្រួលផងដែរ។»

អ្នកវិភាគរបស់ក្រុមហ៊ុនមីក្រូស្សូហ្វ លោកមីឆែល ឆឺរី (Michael Cherry) បាននិយាយថា «បើតាមខ្ញុំដឹង អ្វីៗទាំងអស់នឹង​ត្រឡប់មកវិញ ប៉ុន្តែទាល់តែរូបខ្ញុំ បានចុចផ្ទាល់នៅលើវីនដូ៨.១នោះសិន ទើបខ្ញុំដឹងថាមានអ្វីពិសេសទៀត។»

កាលពីពេលថ្មីនេះ ក្រុមហ៊ុនមីក្រូស្សូហ្វ បានបង្ហាញឲ្យដឹងថា ក្រុមហ៊ុនបានលក់វីនដូ៨ បានជាង១០០លានអាជ្ញាបណ្ណ (licenses) ហើយក្រុមហ៊ុនរំពឹងថាការចេញនូវវីនដូ៨.១នេះ នឹងទទួលបានជោគជ័យបន្ថែមទៀត៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី៣១ ខែឧសភា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ