បាល់ទាត់អង់គ្លេស៖ ហារី រ៉េដណេប នឹងនៅបន្តជាមួយក្រុម ឃ្យូភីអរ
- ដោយ: វិន ជីវ័ន្ត
- កែប្រែចុងក្រោយ: April 30, 2013
- ប្រធានបទ:
- អត្ថបទ: មានបញ្ហា?
- មតិ-យោបល់
-
ម្ចាស់ក្លឹប ឃ្យូភីអរ (QPR) លោក តូនី ហ្វឺណាន់ដេស (Tony Fernandes) បានចេញមកបដិសេធចំពោះសេចក្តីរាយការណ៏ថាគ្រូបង្វឹក លោក ហារី រ៉េដណេប (Harry Redknapp) អាចនឹងចាកចេញពីក្លឹប បន្ទាប់ពីក្រុមមួយនេះ បានធ្លាក់ចេញពីក្របខ័ណ្ឌព្រីមែលីក (Premier League)។
គ្រូបង្វឹក លោក ហារី រ៉េដណេប របស់ក្រុម ឃ្យូភីអរ របស់អង់គ្លេស។
លោក ហ្វឺណាន់ដេស បានជួបលោក រ៉េដណេប កាលពីថ្ងៃច័ន្ទ និងបានពិភាក្សាអំពី អនាគតរបស់ក្រុម ហើយក្នុងនោះក៏បានលេចលឺពត៌មានថា គ្រូបង្វឹករូបនេះ អាចនឹងចាកចេញពីក្លឹបនាកីឡាដ្ឋាន លូហ្វទូស រ៉ូដ (Loftus Road)។
ទោះបីជាយ៉ាងណា លោក ហ្វឺណាន់ដេស បាននិយាយប្រាប់ថា លោក ហារី រ៉េណេប នឹងនៅធ្វើជាគ្រូបង្វឹកក្រុមឃ្យូភីអរ បន្តទៀត បន្ទាប់ពីគាត់បានពិភាក្សាជាមួយអតីតគ្រូបង្វឹកក្រុម ទតិនហេម (Tottenham) វ័យ ៦៦ឆ្នាំរូបនោះ រួចមក។
លោក ហ្វឺណាន់ដេស បានប្រាប់ដល់គេហទំព័រ របស់ក្រុមឃ្យូភីអរ ថា «ខ្ញុំមានការប្រជុំវិជ្ជមានមួយ ជាមួយនឹង ហារី។ ខ្ញុំគិតថា គ្មានចំណុចអ្វី ដែលថា គាត់មិនអាចនៅជាមួយ ពួកយើងជាបន្តបានទៀតនោះទេ។ ហារី ជាបុរស ដែលមានជំនាញខាងបាល់ទាត់ម្នាក់ ហើយគាត់ដឹងថា អ្វីដែលគាត់ចង់បាន ជាមួយនឹងកីឡាករ។ យើងបានពិភាក្សាគ្នា ពីប្រភេទកីឡាករ ដែលយើងចង់បាននៅរដូវកាលក្រោយ។»
ម្ចាស់ក្លឹបសញ្ជាតិម៉ាឡេស៊ីរូបនេះ បានបន្តថា «ហារី គាត់មិនចង់លក់កីឡាករល្អៗនោះទេ ហើយគាត់ចង់រក្សារពួកគេ ឲ្យនៅជួយក្លឹបជាបន្តទៀត។ វាជាការប្រជុំ ដ៏ល្អមួយ បើទោះបីជាអ្វីៗ មិនអាចពេញចិត្តទាំងអស់ នៃតម្រូវការរបស់យើងក៏ដោយ។ ប៉ុន្តែខ្ញុំយល់ថា យើងមានគម្រោង ដ៏ច្បាស់លាស់មួយ។»
លោក រ៉េដណេប ដែលបានមកជំនួសដំណែងលោក ម៉ាក ហ្យូស (Mark Hughes) កាលពីខែធ្នូរនោះ បាននិយាយថា «វាពិតជាគ្រោះដ៏អាក្រក់មួយសម្រាប់យើង ហើយជារដូវកាល ដ៏ខកចិត្ត សម្រាប់គ្រប់គ្នា, ម្ចាស់ក្លឹប, បុគ្គលិក, អ្នកគាំទ្រ, និងគ្រប់គ្នា ដែលជាប់ពាក់ព័ន្ធនឹងក្លឹបនេះ។ យើងនឹងធ្វើឲ្យបានល្អបំផុត នៅរដូវក្រោយ ហើយសង្ឃឹមថា នឹងត្រឡប់មកព្រីមែលីកវិញ។»
គ្រូបង្វឹកសញ្ជាតិអង់គ្លេសរូបនេះ បានបន្តថា «ដូចខ្ញុំបាននិយាយជាច្រើនលើកមកហើយ ម្ចាស់ក្លឹបនេះ ពិតជាមានទឹកចិត្តល្អ ហើយពិតជាខុសប្លែកពីអ្នកដទៃៗទៀត ដែលខ្ញុំធ្លាប់ធ្វើការជាមួយ។ ទោះបីជាស្ថិតក្នុងកាលៈទេសៈ យ៉ាងនេះក្តី ក៏គាត់នៅតែជួយផ្តល់កម្លាំងចិត្ត និងលើកទឹកចិត្ត ដល់យើងទាំងអស់គ្នា។ ហើយវាពិតជា មិនគួរឲ្យជឿសម្រាប់ខ្ញុំ៕»
----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី៣០ ខែមេសា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ