ប៉័រម៉ារីយ៉ូ ម៉ូរ៉ូស៊ីណូ Permario Morosino កីឡាករបាល់ទាត់ម្នាក់ របស់ក្រុម លីវួន របស់ប្រទេសអ៊ីតាលី បានដួលស្រ៊ប់ចុះ នៅលើវាលស្មៅ ខណៈពេលកំពុងប្រកួតបានប្រមាណជា ៣១នាទី នៅក្នុងពូល B។ ព្រឹត្តិការណ៍បានកើតឡើងគួអោយរន្ធត់ ដែលធ្វើអោយរាល់ការប្រកួតបាល់ទាត់ បន្ទាប់ពីនោះនៅក្នុងប្រទេស ត្រូវបានលប់ចោល ដោយលើកទៅប្រកួកនៅពេល ក្រោយវិញ។

កីឡាករបាល់ទាត់ ប៉័រម៉ារីយ៉ូ ម៉ូរ៉ូស៊ីណូ បានស្លាប់ភ្លាមមួយរំពេច បណ្ដាលមកពីជំងឺគាំងបេះដូង​​ បន្ទាប់ពីការខិតខំជួយ សង្រ្គោះរបស់វេជ្ជបណ្ឌិតជំនាញ ឡេអូណាដួ ប៉ាឡូស្គីយ៉ា។ ពួកក្រុមគ្រូពេទ្យបានបញ្ជាក់ក្នុងសេចក្ដីប្រកាសមួយថា កីឡាករ ប៉័រម៉ារីយ៉ូ ម៉ូរ៉ូស៊ីណូ បានស្លាប់រួចទៅហើយ មុនគាត់មកដល់មន្ទីពេទ្យ។ ជាករណីមួយទៀតរបស់ ពួកកីឡាករបាល់ទាត់ អាជីប ដែលមុននេះប្រមាណជាមួយខែប៉ុណ្ណោះ ដែលកីឡាករបាល់ទាត់មា្នក់ទៀត ឈ្មោះ ហ្វាប្រីស ម៉ូអាំបា Fabrice Muamba ទាត់អោយក្រុមប៊ូលតុន នៅប្រទេសអង់គ្លេស បានដួលស្រ៊ប់ចុះទៅនឹងដី ដោយសារជំងឺគាំងបេះដូងដែរនោះ។​ ជាសំណាងល្អ កីឡាករ ហ្វាប្រីស ម៉ូអាំបា ត្រូវបានក្រុមគ្រូពេទ្យជួយអោយរស់រានមានជីវិតឡើងវិញ ក្រោយពីបានធ្លាក់ក្នុង សភាពលែងដឹងខ្លួន អស់រយះពេល៧៨នាទីមកនោះ។

សហព័ន្ធបាល់ទាត់អ៊ីតាលី បានសំរេចចិត្តលើកការប្រកួតទាំងអស់ ក្នុងពេលចុងសប្ដាហ៍កន្លងមកនេះ ហើយគេបានធ្វើការ ស្មឹងស្មាធរយះពេលមួយនាទី នៅរាល់ការប្រកួតកីឡាផ្សេងៗទៀត។

កីឡាករ​ ប៉័រម៉ារីយ៉ូ ម៉ូរ៉ូស៊ីណូ មានអាយុ២៥ឆ្នាំ បានដួលចុះផ្ទាល់នឹងដី ខណៈពេលកំពុងប្រកួតដោយមិនមាននរណាម្នាក់ ទៅប៉ះគាត់នោះទេ សូម្បីតែកីឡាករក្នុងក្រុមតែមួយក៏ដោយ។ គាត់បានខំប្រឹងងើបឡើងមកវិញ មុននឹងដួលម្ដងទៀតជា លើកទីពីរ។ ការប្រកួតដែលក្រុម លីវួន របស់គាត់ កំពុងតែមានពិន្ទុនាំមុខ ២-១ ត្រូវបានផ្អាក។

យ៉ាងហោចណាស់ កីឡាករបាល់ទាត់អាជីបចំនួន២០នាក់បានស្លាប់ នៅរាល់ពេលប្រកួតកាលពីឆ្នាំទៅម៉ិញ ហើយការត្រួត ពិនិត្យសុខភាព ជាពិសេសខាងជំងឺបេះដូង ត្រូវបានគេរឹតបន្តឹងទ្វេឡើង នៅគ្រប់បណ្ដាក្រុមកីឡាបាល់ទាត់។ ប៉ុន្ដែអ្នក សង្កេត​ការ ឯកទេសខាងបាល់ទាត់ បាននិយាយថា វានៅមិនទាន់គ្រប់គ្រាន់នៅឡើយទេ។

សូមអញ្ជើញទស្សនារូបភាព ដែលកីឡាករបានដួលចុះនឹងស្មៅ ហើយនិងការសង្គ្រោះដែលមិនមានសង្ឃឹមនេះ៖