ចង់ដឹងពីផ្ទះ«បីសាចដ៏តក់ស្លុតខ្លាំងជាងគេ» ក្នុងពិភពលោកឬទេ?
តើលោកអ្នកចូលចិត្តរឿងខ្មោច និងរឿងចម្លែកៗ ខុសពីធម្មជាតិឬ? លោកអ្នកចូលចិត្ត ល្បែងដែលធ្វើឲ្យភ័យ តែល្បែងដែលលោកអ្នកធ្លាប់បានលេងកន្លងមក មិនបានធ្វើឲ្យលោកអ្នក«ស្កៀបជើងធ្មេញ»ទេ មែនឬទេ? យើងសូមបង្ហាញ នូវផ្ទះបីសាចថ្មីមួយ ដែលអាចធ្វើឲ្យលោកអ្នកតក់ស្លុត រហូតលួសព្រលឹងស្ទើរស្លាប់ស្ទើររស់ ស្ថិតនៅក្នុងក្រុងសានឌីយ៉េហ្គោ (San Diego) នៃរដ្ឋកាលីហ្វ័នី សហរដ្ឋអាមេរិក។
ជាផ្ទះបីសាចដ៏អាក្រក់ជាងគេក្នុងលោក ឈ្មោះ ម៉ាកកាមនី ម៉ាន័រ (McKamey Manor) ដែលរហូតមកដល់ពេលនេះ មិនទាន់មានអ្នកចូលទៅសាកល្បងណាម្នាក់ បានបញ្ចប់ដំណើរផ្សងព្រេង នៅក្នុងផ្ទះនេះរួចនៅឡើយ។ នេះបើតាមសហគ្រាស ដែលបានបង្កើតផ្ទះនេះចេញមក។
ល័ក្ខខ័ណ្ឌដែលអាចចូលទៅសាកល្បងបាន លោកអ្នកត្រូវមានអាយុ២១ឆ្នាំ និងមានសុខភាពល្អមាំទាំ។ ស្ត្រីមានផ្ទៃពោះ អ្នកមានជំងឺបេះដូង ហឺត [...]
