ភរិយា មាជ សុវណ្ណារ៉ា ថា ហ៊ុន សែន មានអំណាចកែទូរទស្សន៍ទៅជាទូរស័ព្ទ
លោក មាជ សុវណ្ណារ៉ា គ្មានទូរស័ព្ទដៃ ប្រើនៅក្នុងពន្ធនាគារទេ តែបើមានសម្ភារៈប្រើ គឺមានតែទូរទស្សន៍មួយគ្រឿង គ្រាន់នឹងទស្សនាកម្មវិធី របស់ស្ថានីយទូរទស្សន៍ក្នុងស្រុក តែប៉ុណ្ណោះ។ អ្នកស្រី មាជ ចេមី ភរិយាលោក មាជ សុវណ្ណារ៉ា បានថ្លែងអះអាងដូច្នេះ ពីសហរដ្ឋអាមេរិក ដើម្បីឆ្លើយតប ទៅនឹងការលើកឡើង របស់លោកនាយករដ្ឋមន្ត្រី ហ៊ុន សែន កាលពីថ្ងៃទី២៧ ខែមីនាកន្លងមកនេះ ដែលថាលោក មាជ សុវណ្ណារ៉ា កំពុងប្រើទូរស័ព្ទដៃ ពីពន្ធនាគារ ដើម្បីបង្ហោះសារនយោបាយ ប្រឆាំងរដ្ឋាភិបាល។
អ្នកស្រី មាជ ចេមី បានថ្លែងថា កាលពីដំបូងឡើយ ស្វាមីអ្នកស្រីមានទូរស័ព្ទប្រើ ប្រភេទ «N ចុចពិល» មួយមែន តែទូរស័ព្ទដ៏កញ្ចាស់មួយនេះ ត្រូវបានដកហូតចេញ តាំងពីយូរមកហើយ ហើយរហូតមកដល់ថ្ងៃនេះ ក្រុមគ្រួសារអ្នកស្រី ទាក់ទងគ្នាតាមរយៈ តែទូរស័ព្ទជញ្ជាំង (ទូរស័ព្ទខ្សែលើតុ) [...]
