«ខ្ញុំសូមស្វាគមន៍​ការគាំទ្រណាក៏ដោយ» នេះ ជាការថ្លែងឡើង របស់លោក សម រង្ស៊ី អតីតប្រធានគណបក្សសង្គ្រោះជាតិ និងជាប្រធានចលនាសង្គ្រោះជាតិ ចំពោះការគាំទ្ររបស់គណបក្សថ្មីមួយ ឈ្មោះ គណបក្សខ្មែរតែមួយ ចំពោះចលនាដែលលោកកំពុងដឹកនាំ។ គណបក្សថ្មីនោះ មានឈ្មោះ គណបក្សខ្មែរតែមួយ ដឹកនាំដោយលោក កែម រិទ្ធិសិត ជាប្រធាន និងលោក គុជ លី ជាអនុប្រធាន

លោក សម រង្ស៊ី បានសរសេរ នៅលើទំព័រទ្វីសធើរ​របស់លោក ជាភាសាអង់គ្លេស ដោយមានអត្ថន័យ ជាខេមរភាសាថា៖ «ខ្ញុំសូមស្វាគមន៍ ការគាំទ្រណាក៏ដោយ ចំពោះគណបក្សសង្គ្រោះជាតិ និងចលនាសង្គ្រោះជាតិ នៅក្នុងបុព្វហេតុនៃការតស៊ូ មិនឈប់ឈររបស់យើង ដើម្បីការផ្លាស់ប្ដូរមួយ តាមបែបប្រជាធិបតេយ្យ តាមរយៈការបោះឆ្នោត ដែលពិតប្រាកដ និងទទួលស្គាល់ដោយអន្តរជាតិ ព្រមទាំងមានការចូលរួម ពីគណបក្សសង្គ្រោះជាតិ»។

គណបក្សខ្មែរតែមួយ តាមរយៈលិខិតមួយ ចុះហត្ថលេខាដោយលោក គុជ លី ដែលជាអ្នកនាំពាក្យ​គណបក្សផងនោះ បានប្រកាសកាលពីថ្ងៃទី២៧ ខែមីនានេះ ថា៖ «ដើម្បី​ផល​ប្រយោជន៍​ជាតិ​ខ្មែរ និង​ប្រជាជាតិ​ខ្មែរ ខ្ញុំ​ គុជ លី តំណាង​ឲ្យ​ គណបក្ស​ខ្មែរ​តែ​មួយ ​សូម​ប្រកាស​គាំទ្រ​ និង​ចូល​រួម​ធ្វើ​សកម្ម[ភាព]​ ​ជាមួយ​ចលនា​សង្គ្រោះ​ជាតិ​ ដឹកនាំ​ដោយ​លោក​ប្រធាន ​សម រង្ស៊ី»។

លិខិតរបស់លោក គុជ លី នៅបានអំពាវនាវ ទៅអ្នកគាំទ្រ និងសកម្មជនរបស់គណបក្សសង្គ្រោះជាតិ ឲ្យចូលរួមជាមួយគណបក្សខ្មែរតែមួយ ដើម្បីធ្វើបេសកកម្មរួម ជាមួយចលនាសង្គ្រោះជាតិ ទាមទារឲ្យរដ្ឋាភិបាលលោក ហ៊ុន សែន ដោះស្រាយវិបត្តិនយោបាយ រវាងខ្មែរនិងខ្មែរ ក្នុងនោះមានការផ្ដល់សេរីភាពឡើងវិញ ឲ្យលោក សម រង្ស៊ី - លោក កឹម សុខា - លោក មាជ សុវណ្ណារ៉ា ដែលធ្លាប់ជាដៃគូអាជីព ជាមួយលោក គុជ លី ក្នុងកាសែតខ្មែរប៉ុស្ដិ៍ និងឲ្យអ្នកទោេសមនសិការទាំងអស់។

ប៉ុន្តែសម្រាប់អ្នកឃ្លាំមើល បញ្ហានយោបាយវិញ មិនមានសុទិដ្ឋិនិយម និងមិនជឿថា គណបក្សថ្មីនេះ ពិតជាមានសមានចិត្ត ជាមួយចលនាសង្គ្រោះជាតិ ដែលត្រូវរដ្ឋាភិបាលកម្ពុជា ចាត់ទុកជាចលនាឧទ្ទាម​ក្រៅច្បាប់ និងរងការប្រមាញ់ មិនឈប់ឈរនោះទេ។ ព្រះសង្ឃ ប៊ុត ប៊ុនតិញ ដែលជាសង្សឃ្លាំមើល បញ្ហានយោបាយ ដ៏ល្បីមួយអង្គ បានចាត់ទុកថា ការគាំទ្រនេះ គ្រាន់តែជាឆាកល្ខោនមួយ ដើម្បីងាយឲ្យ​អ្នកគាំទ្រចលនាសង្គ្រោះជាតិ ពិតប្រាកដដ៏ទៃទៀត ចូលអន្ទាក់ នឹងអាលត្រូវរដ្ឋាភិបាលលោក ហ៊ុន សែន ក្របួចបានទាំងអស់៕

» សូមទស្សនា និងស្ដាប់សង្ឃដីកា របស់ព្រះតេជគុណ ប៊ុត ប៊ុនតិញ៖