ក្រឡាបញ្ជីសាលាដំបូងបង្ហើបថា ខ្លួនសម្បូរការងារធ្វើណាស់ ក្នុងខែវិច្ឆិកានេះ
ការចេញដីកា ជាបន្តបន្ទាប់ដោយសាលាដំបូងរាជធានី ប្រឆាំង កោះហៅ កោះឲ្យចូលខ្លួន ឬដីកាចាប់ខ្លួន... បានពង្រីកបរិមាណរបស់ខ្លួនច្រើនឡើង គួរឲ្យកត់សម្គាល់ ខុសប្លែកពីពេលកន្លងមក ដែលដូចជាមិនសូវមានការងាររបៀបនេះ ចេញព្រមៗគ្នាយ៉ាងសម្បូរបែបដូច្នេះទេ។ សំនុំរឿងក៏ច្រើន ការកោះហៅក៏ច្រើន រីឯការកត់ត្រាក៏ត្រូវធ្វើឲ្យញាប់ដៃ ជំរុញឲ្យមន្ត្រីសឹងតែគ្រប់ៗរូប ក្នុងសាលាដំបូងមិនអាចដកដៃរួច ដើម្បីដកដង្ហើមបាន។
មន្ត្រីមួយរូប ក្នុងលក្ខខណ្ឌមិនបញ្ចេញឈ្មោះ និងក្នុងតួនាទីជាក្រឡាបញ្ជី នៃសាលាដំបូងរាជធានីភ្នំពេញ បានថ្លែងប្រាប់ទស្សនាវដ្តី មនោរម្យ.អាំងហ្វូ ក្នុងថ្ងៃទី២១ ខែវិច្ឆិកានេះថា រូបលោកផ្ទាល់ ក៏ដូចជាក្រឡាបញ្ជីមួយចំនួនទៀត មានការមមាញឹកច្រើន និងខុសប្លែកជាងរាល់ដង តាំងពីដើមខែវិច្ឆិកាមក [...]