ក្រឡា​​បញ្ជី​​សាលា​​ដំបូង​បង្ហើប​​ថា​ ខ្លួន​​សម្បូរ​​ការងារ​​ធ្វើ​ណាស់ ក្នុង​ខែ​វិច្ឆិកា​នេះ

ក្នុងរយៈពេលប៉ុន្មានថ្ងៃដើមខែវិច្ឆិកានេះ មន្ត្រីសាលាដំបូងរាជធានីភ្នំពេញ ទំនងជាមានភាពមមាញឹក ជាងពេលរាប់សិបដង ក្នុងការចេញដីកាកោះ ដីកាបង្គាប់ឲ្យចូលខ្លួន ដីកានាំខ្លួន និងដីការចាប់ខ្លួនជាដើម។ ពីក្នុងចំណោមនោះ មាន​មន្ត្រី​មួយ​ចំនួន បាន​សម្រេច​ចិត្ត​និយាយ​ជាមួយអ្នកសារព័ត៌មាន។
Loading...
  • ដោយ: អ៊ុម វ៉ារី ដោយ អ៊ុម វ៉ារី (ទាក់ទង៖ [email protected]) - ភ្នំពេញ ថ្ងៃទី២១ វិច្ឆិកា ២០១៤
  • កែប្រែចុងក្រោយ: November 21, 2014
  • ប្រធានបទ: យុត្តិធម៌
  • អត្ថបទ: មានបញ្ហា?
  • មតិ-យោបល់

ការចេញដីកា ជា​បន្ត​បន្ទាប់​ដោយ​សាលា​ដំបូង​រាជធានី ប្រឆាំង កោះ​ហៅ កោះ​ឲ្យ​ចូល​ខ្លួន ឬ​ដីកា​ចាប់​ខ្លួន... បាន​ពង្រីក​បរិមាណ​របស់​ខ្លួន​ច្រើន​ឡើង គួរ​ឲ្យ​កត់​សម្គាល់ ខុស​ប្លែក​ពី​ពេល​​កន្លង​មក ដែល​ដូច​ជា​មិន​សូវ​មាន​ការងារ​របៀប​នេះ ចេញ​ព្រមៗ​គ្នា​យ៉ាង​សម្បូរ​បែប​ដូច្នេះ​ទេ។ សំនុំ​រឿង​ក៏​ច្រើន ការ​កោះ​ហៅ​ក៏​ច្រើន រី​ឯ​ការ​កត់​ត្រា​ក៏​ត្រូវ​ធ្វើ​ឲ្យ​ញាប់​ដៃ ជំរុញ​ឲ្យ​មន្ត្រី​សឹង​តែ​គ្រប់ៗ​រូប ក្នុង​សាលា​ដំបូង​មិន​អាច​ដក​ដៃ​រួច ដើម្បី​ដក​ដង្ហើម​បាន។

មន្ត្រីមួយរូប ក្នុង​លក្ខខណ្ឌ​មិន​បញ្ចេញ​ឈ្មោះ និង​ក្នុង​តួនាទី​ជា​ក្រឡា​បញ្ជី នៃ​សាលា​ដំបូង​រាជធានី​ភ្នំពេញ បាន​ថ្លែង​ប្រាប់​ទស្សនាវដ្តី​ មនោរម្យ.អាំងហ្វូ ក្នុង​ថ្ងៃ​ទី២១ ខែ​វិច្ឆិកា​នេះ​ថា រូប​លោក​ផ្ទាល់ ក៏​ដូច​ជា​ក្រឡា​បញ្ជី​មួយ​ចំនួន​ទៀត មាន​ការ​មមាញឹក​ច្រើន និង​ខុស​ប្លែក​ជាង​រាល់​ដង តាំង​ពី​ដើម​ខែ​វិច្ឆិកា​មក ព្រោះ​តែ​ស្វែង​រក និង​រៀបចំ​ដីកា​«បង្គាប់»​នានា​ដូច​ជា​ដីកា​កោះ ដីកា​ចូល​ខ្លូន ដីកា​នាំ​ខ្លួន និង​ដីកា​ចាប់​ខ្លួន​ជា​ដើម។

ក្រឡាបញ្ជីដដែលរូបនេះ បានបន្តថា ភាគច្រើននៃដីកាទាំងនោះ ផ្តោតតែទៅលើក្រុមប្រជាពលរដ្ឋ​ដែលតវ៉ា​រឿង​ដីធ្លី រួម​មាន ក្រុមយុវជន ព្រះសង្ឃ តំណាងអង្គការសង្គមស៊ីវិល និងតំណាងសហជីព មួយចំនួន។

ទំនងជាមិនពេញចិត្ត នឹងទង្វើរបស់ក្រុមចៅក្រម និងព្រះរាជអាជ្ញាមួយចំនួន នៃសាលាដំបូងរាជធានីភ្នំពេញ ក្រឡា​បញ្ជី​ខាងលើ ក៏បានបង្ហើបការសម្ងាត់ដូច្នេះថា៖ «អ្នកខ្លះមិនទាំងបានទទួលដីកាកោះផង ឬបានទទួល​បើទោះ​ជា​ឆ្លើយតប តាមកំណត់ច្បាប់ក៏ដោយ ដីកាបន្ទាប់ដាច់ខាតត្រូវតែជា “ដីកានាំខ្លួន”។ (...) ដីកា​ខ្លះ​ចេញ​ហើយ ទុកចោល (មិនប្រគល់ឲ្យសាមីខ្លួន) ក្រោយមកបន្តិច ក៏ចេញដីកានាំខ្លួន ឬ​ចាប់​ខ្លួន​តែ​ម្តង។ (...) នេះជា​ការអនុវត្តខុសច្បាប់ ដោយមន្រ្តីតុលាការខ្លួនឯង។»

មន្ត្រីរូបនេះ បានថ្លែងទាំងទោមនស្សទៀតថា៖ «ខ្ញុំគ្មានជម្រើសទេ ក្នុងរឿងនេះ។»

រហូតមកដល់វេលានេះ យ៉ាងហោចណាស់ ពលរដ្ឋដែលរងគ្រោះក្នុងរឿងដីធ្លី និងហ៊ានចេញមុខតវ៉ាមួយ​ចំនួន​ធំ ត្រូវបានចាប់ខ្លួនជាបន្តបន្ទាប់ ក្នុងនោះមានទាំងការចាប់ខ្លួនដោយចំហរ និងចាប់ខ្លួនដោយសម្ងាត់។ ឯ​ព្រះ​សង្ឃ យុវជន មួយចំនួនទៀត ដែលហ៊ានឬចេញមុខធ្វើការតស៊ូមតិ ក៏កំពុងទទួលបាន«ដីកា»ជាបន្តបន្ទាប់ ឲ្យ​ចូលទៅបង្ហាញខ្លួន ឬចូលទៅបកស្រាយនៅសាលាដំបូងរាជធានីដែរ។

ដូចករណីព្រះតេជគុណ យាញ សឿង គង់នៅវត្តសាមគ្គីរង្សី ត្រូវបានសាលាដំបូងរាជធានីភ្នំពេញ មិនទាន់​ចេញ​ដីកាកោះផង ស្រាប់តែមានដីកាបង្គាប់ឲ្យចូលខ្លួនតែម្តង។ នេះបើតាមការបញ្ជាក់ របស់ព្រះសង្ឃ​អង្គ​នេះ។ ព្រះអង្គនឹងត្រូវបង្ហាញព្រះកាយនៅថ្ងៃទី ១៥ ធ្នូ ២០១៤ វេលាម៉ោង៩ព្រឹក ដើម្បីសាកសួរតាមដីកា​បង្គាប់​ឲ្យ​ចូល​ខ្លួន ដែលចេញដោយចៅក្រមស៊ើបសួរ នូ វាសនា។ មិនត្រឹមតែប៉ុណ្ណោះ ក្នុងដីកាបង្គាប់ឲ្យចូល​ខ្លួន​នេះ ក៏​បានបង្កប់នូវពាក្យព្រមានមួយឃ្លាថា៖ «ក្នុងករណីមិនចូលខ្លួនតាមការកំណត់ខាងលើ យើងនឹង​ចេញ​ដីកា​បង្គាប់ឲ្យនាំខ្លួន»។

ចៅក្រមរូបនេះ ចោទប្រកាន់ព្រះតេជគុណខាងលើ ក្នុងដំណើរឿង«ចូលរួមសមាគមនៃជនទុច្ចរិត» តាម​មាត្រា​៤៩៩ នៃក្រមព្រហ្មទណ្ឌ ទាក់ទងនឹងព្រឹត្តិការណ៍មួយ ដែលបានកើតឡើងនៅចំណុចមុខវត្តសាមគ្គីរង្សី ស្ថិត​នៅ​ផ្លូវលំ ភូមិទ្រា២ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ កាលពីថ្ងៃទី១២ ខែវិច្ឆិកា ឆ្នាំ២០១៤។

ទស្សនាវដ្តីមនោរម្យ.អាំងហ្វូមិនអាចស្វែងរកប្រតិកម្ម ឬការបញ្ជាក់ពីលោកចៅក្រមស៊ើបសួរ នូ វាសនា ឬពី​មន្ត្រីផ្សេងទៀត នៃសាលាដំបូងរាជធានីភ្នំពេញទេ ចំពោះការលើកឡើងខាងលើ​ ដោយទូរស័ព្ទរបស់អស់​លោក​ចៅក្រមទាំងនោះ មិនអាចភ្ជាប់ទំនាក់ទំនងបាន៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...