លោក ម៉ៅ មុនីវណ្ណ អនុ​ប្រធាន​គណកម្មការ​ទី​៩ នៃ​រដ្ឋសភា និង​ជា​តំណាង​រាស្ត្រ​មក​ពី​គណបក្ស​សង្គ្រោះ​ជាតិ គ្រោង​នឹង​ចេញ​លិខិត​ជា​លើក​ទី​ពីរ ក្នុង​សប្តាហ៍​ចុង​ខែ​វិច្ឆិកា​នេះ ទៅ​លោក​នាយក​រដ្ឋមន្រ្តី ហ៊ុន សែន ដើម្បី​កោះ​ហៅ​នាយក​រដ្ឋមន្ត្រី និង​មន្ត្រី​ពាក់​ព័ន្ធ ឲ្យ​មក​ឆ្លើយ​បំភ្លឺ​រឿង​ព្រំដែន ករណី​ច្រក​ទន្លេ​ដាក់​ដាំ។

កាលពីថ្ងៃទី១០ ខែតុលា ឆ្នាំ២០១៤ គណៈកម្មការ​ទី៩ នៃ​រដ្ឋសភា​នេះ បាន​ចេញ​លិខិត​ម្ដង​ហើយ ស្នើ​ទៅ​លោក​នាយក​រដ្ឋមន្រ្តី ហ៊ុន សែន ឲ្យ​មក​បំភ្លឺ​បញ្ហា​ព្រំ​ដែន នៅ​ចំពោះ​មុខ​សភា។ តែ​មក​ដល់​ថ្ងៃ​ទិ២០ ខែ​វិច្ឆិកា​នេះ នៅ​មិន​ទាន់​មាន​ការ​ឆ្លើយ​តប​ណា​មួយ ជា​ផ្លូវ​ការ​នៅ​ឡើយ។

នៅក្នុងការថ្លែងតាមទូរស័ព្ទ ជាមួយទស្សនាវដ្តីមនោរម្យ.អាំងហ្វូ ថ្ងៃទី២០ ខែវិច្ឆិកានេះ លោក ម៉ៅ មុនីវណ្ណ បាន​លើកឡើងថា ច្រកដាក់ដាំ ត្រូវបានប្រទេសវៀតណាមធ្វើផ្លូវចូលមក ដោយរំលោភលើអធិបតេយ្យ​ជាតិ​កម្ពុជា។ ហើយរដ្ឋាភិបាលវៀតណាម បានប្រកាន់យកស្ទឹងដាក់ដាំ ជាខ្សែបន្ទាត់ព្រំដែន ជាឯកតោភាគី ដែល​ករណីនេះ ធ្លាប់ត្រូវបានរដ្ឋាភិបាលលោក ហ៊ុន សែន ច្រានចោល កាលពីពេលមកឆ្លើយបំភ្លឺ ក្នុងរដ្ឋសភា​នា​ពេលកន្លង។

អ្នកតំណាងរាស្ត្ររូបនេះបានថ្លែងថា បើទោះជាមានភាពស្ងប់ស្ងាត់បន្តិចមែន តែអាជ្ញាធរវៀតណាមនៅតែ​បន្ត​សកម្មភាពរបស់ខ្លួន ក្នុងការរំលោភអធិបតេយ្យជាតិកម្ពុជា ឯរដ្ឋាភិបាលកម្ពុជាវិញ បែរជាបណ្តែត​បណ្តោយ ឲ្យ​វៀតណាមធ្វើផ្លូវមកដល់ស្ទឹងដាក់ដាំ។ លោកបានថ្លែងថា៖ «អ្វីដែលប្រទេសវៀតណាម បាន​ធ្វើការ​ប៉ុនប៉ង​ចង់​បាននោះ ត្រូវទទួលបានជោគជ័យ»។ លោកបានលើកជាឧទាហរណ៍ជាក់ស្តែង នៅស្រុកកំណើតលោក ហេង សំរិន ប្រធានរដ្ឋសភាកម្ពុជាបច្ចុប្បន្ន ក៏ត្រូវបានបាត់បង់ដោយការរំលោភបំពាន ពីភាគីវៀតណាមតាមរយៈការ​បោះបង្គោលព្រំដែន លេខ១២៥ ត្រង់ចំណុចភូមិ ថ្លុងត្រាច និងភូមិអន្លង់ជ្រៃ ស្រុកពញាក្រែក ខេត្តកំពង់ចាម (ដែលក្លាយជាខេត្តត្បូងឃ្មុំ នាពេលបច្ចុប្បន្ន)។

លោក ម៉ៅ មុនីវណ្ណ បានថ្លែងទៀតថា លោក វ៉ា គឹមហុង ទេសរដ្ឋមន្ត្រី ទទួលបន្ទុកប្រធាន​គណៈកម្មការ​កិច្ចការ​ព្រំដែន​កម្ពុជា ក៏បានលើកឡើងបន្ទាប់ពីលោកបានចេញលិខិត ធ្វើការកោះហៅនាយករដ្ឋមន្រ្តី មកសួរដេញ​ដោលនៅមុខសភាថា ប្រទេសវៀតណាមពិតជាបានរំលោភ ចូលអធិបតេយ្យភាពកម្ពុជាមែន។ លោក មុនីវណ្ណ បានស្រង់សម្ដីលោក វ៉ា គឺមហុង មកបញ្ជាក់ថា «នោះជាការបំពានរបស់ប្រទេសវៀតណាម មកលើអធិប​តេយ្យ​ភាព​កម្ពុជា»។

សំអាងតាមរដ្ឋធម្មនុញ្ញ ដែលបានចែងថា តំណាងរាស្រ្ត អាចបោះសំនួរជាលាយលក្ខអក្សរ ឬផ្ទាល់មាត់ ទាំង​រដ្ឋមន្រ្តី ទាំងនាយករដ្ឋមន្រ្តី យ៉ាងយូរមួយអាទិត្យ។ ប៉ុន្តែភាពស្ងៀមស្ងាត់ មិនឆ្លើយតប របស់លោកនាយករដ្ឋ​មន្រ្តី ហ៊ុន សែន ត្រូវបានលោក មុនីវណ្ណ ចាត់ទុកថា ជាការរំលោភច្បាប់រដ្ឋធម្មនុញ្ញ របស់បុរសខ្លាំងកម្ពុជា។ លោកបានថ្លែងឲ្យដឹងទៀតថា៖ «ទាំងលោកនាយករដ្ឋមន្រ្តី ហ៊ុន សែន ទាំងលោក វ៉ា គឹមហុង នៅមិនទាន់​មាន​ការឆ្លើយតបណាមួយ ជាលាយលក្ខអក្សរនៅឡើយ។»

ធ្វើញត្តិបន្ទោស

លោកនឹងបន្តស្នើលិខិតថ្មីជាលើកទីពីរទៀត  ទៅលោកនាយករដ្ឋមន្រ្តី ហ៊ុន សែន។ លើកទីពីរនេះ បើ​លោក​នាយករដ្ឋមន្រ្តី ហ៊ុន សែន នៅតែមិនមានការឆ្លើយតបទៀតនោះ មានន័យថា លោកនាយករដ្ឋមន្រ្តី កំពុង​រំលោភ​រដ្ឋធម្មនុញ្ញាយ៉ាងធ្ងន់ធ្ងរ ហើយលោកស្នើឲ្យលោកនាយករដ្ឋមន្រ្តី ឈប់ប្រកាសថា​ខ្លួនកំពុង​តែ​«ការពារ»​រដ្ឋធម្មនុញ្ញ។ ឬក្នុងករណីដែលលោកនាយករដ្ឋមន្រ្តី ហ៊ុន សែន នៅតែចចេស មិនព្រមចូលខ្លួនឆ្លើយ​ចំពោះ​មុខរដ្ឋសភា ពីបញ្ហាច្រកដាក់ដាំនោះ លោកអនុប្រធានគណកម្មការទី៩ នៃរដ្ឋសភារូបនេះ នឹងធ្វើការស្នើ​ទៅកាន់​តំណាងរាស្រ្តក្នុងរដ្ឋសភា ឲ្យបាន៣០រូបឡើងទៅ ដើម្បីធ្វើ«ញត្តិបន្ទោស» ជាលើកទីមួយទៅ​រដ្ឋាភិបាល ចំពោះ​​ករណី​រំលោភបំពានរដ្ឋធម្មនុញ្ញនេះ។

មកទល់ថ្ងៃទី២០ ខែវិច្ឆិកានេះ ត្រូវគម្រប់មួយខែគត់ គិតពីថ្ងៃចេញលិខិត តែលោកនៅមិនទាន់ដាក់លិខិត​ជាថ្មី ទៅកាន់លោកនាយករដ្ឋមន្រ្តីឡើយ។ លោកនឹងទុករយៈពេល មួយសប្តាហ៍ទៅមុខទៀត សម្រាប់លោក​នាយករដ្ឋមន្រ្តី មានឱកាសក្នុងការឆ្លើយតប ព្រោះក្រែងលោកជាប់រវល់ និងការឈប់សម្រាកបុណ្យច្រើន​ដូច​ជាអុំទូក បុណ្យឯករាជ្យជាដើម

មិនទាន់អាចទាក់ទងមន្ត្រីរដ្ឋាភិបាល រូបណា ដើម្បីសុំការបកស្រាយបំភ្លឺបាននៅឡើយ។ ទស្សនាវដ្ដី​មនោរម្យ.អាំងហ្វូ នឹងព្យាយាមទាក់ទងជាបន្ត ហើយនឹងផ្សាយដំណឹងបន្ថែមទៀត នៅក្នុងអត្ថបទ​របស់ខ្លួន​លើកក្រោយ។

ដោយឡែក មន្ត្រីជាន់ខ្ពស់ពីគណបក្សប្រជាជនកម្ពុជា តំណាងរាស្ត្រ និងជាប្រធានគណៈកម្មការទី២ នៃ​រដ្ឋសភា លោក ជាម យៀប ធ្លាប់បានបដិសេធ តាមរយៈទស្សនាវដ្ដីមនោរម្យ.អាំងហ្វូ កាលពីអំឡុងខែ​ឧសភា​ថា កម្ពុជាក្រោយការដឹកនាំរបស់គណបក្សប្រជាជនកម្ពុជា នឹងមិនឲ្យបាត់បងទឹកដី «មួយគ្រាប់ខ្សាច់»ណា​មួយ​នោះឡើយ។ លោកបានថ្លែងថា គណបក្សប្រជាជនកម្ពុជា និងរដ្ឋាភិបាលបច្ចុប្បន្ន មានអ្នកមាន​សមត្ថភាព​​គ្រប់គ្រាន់ ទាំងផ្នែកបច្ចេកទេស និងផ្លូវច្បាប់ ហើយក៏ជាកូនខ្មែរស្នេហាជាតិ ដូច្នេះមិនឲ្យបាត់បង់​ទឹកដីរបស់​ប្រទេស​កម្ពុជា នោះទេ៕