ពលរដ្ឋឃុំជីខក្រោមរងទឹកភ្នែកជាថ្មី ក្រោយចាញ់ក្តីក្រុមហ៊ុនហេងហ៊ុយ
សម្លេងខ្សឹបខ្សួលអួលដើមក បានបន្លឺឡើងចេញពីប្រជាពលរដ្ឋ រស់នៅភូមិព្រែកជីក ឃុំជីខក្រោម សារជាថ្មី បន្ទាប់ពីតុលាការកំពូល ក្នុងរាជធានីភ្នំពេញនៅថ្ងៃទី២៧ ខែវិចិ្ឆកា កន្លងមកនេះ បានសម្រេចសេចក្តីឱ្យលោក ឈឹម ផាន់ ដែលមានដីទំហំជាង៧ហិចតា និងអ្នកស្រី ឈុន រីម មានដីជាង២ហិចតា ឱ្យចាញ់ក្តីលោក ហេង ហ៊ុយ ជាប្រធានក្រុមហ៊ុន ហេងហ៊ុយ។
តុលាការកំពូលបានចាត់ទុក ការចោទប្រកាន់លើប្រជាពលរដ្ឋទាំងពីរខាងលើ តាមបណ្តឹងរបស់លោក ហេង ហ៊ុយ ថាបានទៅរស់នៅលើដីសម្បទាន ដែលរដ្ឋាភិបាលបានធ្វើសម្បទាន ឱ្យទៅក្រុមហ៊ុន ហេង ហ៊ុយ នៅភូមិបឹងឈូក ឃុំជីខលើ។ នេះតាមការបញ្ជាក់របស់អ្នកស្រី កើត ពៅ តំណាងពលរដ្ឋនៅភូមិព្រែកជីក ឃុំជីខក្រោម។
តំណាងពលរដ្ឋរូបនេះ បន្ថែមថា៖ «តុលាការកាត់ហើយ កាត់ឱ្យចាញ់លោក ហេង ហ៊ុយ ថាអត់មានភូមិព្រែកជីក ជាប់ផ្លូវជាតិលេខ៤៨ទេ។ [...]