ហេតុការណ៍កើតឡើង បានតែមួយថ្ងៃប៉ុណ្ណោះ កងទ័ពរបស់ប្រទេសអាល់ហ្សេរី នៅថ្ងៃនេះ បានសម្រេចវាយលុក​ ដើម្បី​វាយរំដោះផ្នែកមួយនៃចំណាប់ខ្មាំងជាច្រើន ដែលក្រុមប្រដាប់អាវុធអ៊ីស្លាមនិយម បានចាប់ទុកនៅក្នុងរោងចក្រចម្រាញ់​ឧស្ម័នហ្គាស នៅជាប់នឹងព្រំប្រទល់នៃប្រទេសលីប៊ី។ បណ្ដាប្រទេសដែលមានពលរដ្ឋរបស់ខ្លួន ជាប់ជាចំណាប់ខ្មាំងនេះ សង្ស័យពីទម្ងន់តុល្យភាពជាផ្លូវការ ដែលនៅមិនទាន់អោយដឹងនៅឡើយ មកទល់នឹងម៉ោងនេះ។

រោងចក្រចម្រាញ់ឧស្ម័នហ្គាស ដែលក្រុមភេវរជនបានចាប់បុគ្គលិកនៅទីនោះ ជាចំណាត់ខ្មាំង។ រូបថត Statoil/EPA/MaxPPP។

ទីក្រុងអាល់ហ្សេ នៃប្រទេសអាល់ហ្សេរី បានប្រើប្រាស់កម្លាំងចូលវាយរំដោះចំណាប់ខ្មាំង នៅថ្ងៃព្រហស្បត្តិ៍ទី១៧មករា ក្រោយ២៤ម៉ោងពីការចាប់ធ្វើចំណាប់ខ្មាំង ដោយពួកភេវរករនិយមអ៊ីស្លាម នៅក្នុងរោងចក្រចម្រាញ់ឧស្ម័នហ្គាសមួយ ដែលជាអាជីវកម្មរបស់ក្រុមហ៊ុនប្រេងកាត BP នៃប្រទេសអង់គ្លេស។​ រដ្ឋមន្ត្រីក្រសួងមហាផ្ទៃនៃប្រទេសអាល់ហ្សេរី លោក ដាហ៊ូ អ៊ូល្ដ កាប្លីយ៉ា (Dahou Ould Kablia) បានបដិសេធចោលរាល់ការចរចារណាមួយ ជាមួយនឹងក្រុមអ្នកចាប់​ចំណាប់​ខ្មាំងទាំងនោះ។

សូមអានអត្ថបទមុន របស់មនោរម្យព័ងអាំងហ្វូ ដែលធ្វើរបាយការណ៍រួចហើយ ពីហេតុការណ៍កើតក្នុងថ្ងៃកន្លងមក។

រដ្ឋមន្ត្រីមហាផ្ទៃអាល់ហ្សេរី រូបនេះបានបញ្ជាក់ថា «ព្រឹត្តិការណ៍ដែលកើតមានជាបន្ត នឹងមិនមានផលល្អសម្រាប់ ចំណាប់​ខ្មាំងទេ។ ប៉ុន្តែបើទោះយ៉ាងណាក៏ដោយ ក៏រាល់ពួកភេវរជននឹងត្រូវតែកំចាត់ចេញ។»

វាយលុកតាមផ្លូវអាកាស

ការវាយលុកមួយត្រូវបានធ្វើប្រឆាំង នឹងក្រុមជនប្រដាប់អាវុធទាំងនេះ ដែលបានចាប់អ្នកធ្វើការរាប់រយនាក់ ដែលក្នុង​នោះមានបណ្ដាជនជាង៤០នាក់ ជាជនជាតិបរទេសពីគ្រប់ជាតិសាសន៍ ដូចជាបារាំង អង់គ្លេស ណ័រវេស អាមេរិកាំង និងជប៉ុនជាដើម។ នៅក្នុងពេលមានការវាយលុក ដែលមានជំនួយពីឧទ្ធម្ភាគចក្រចម្បាំងផងនោះ ជនចំណាប់ខ្មាំង​ជា​ច្រើនទំនងជាត្រូវបានសម្លាប់។ តួលេខដែលអាជ្ញាធរអាល់ហ្សេរីឲ្យដឹង មកទល់នឹងម៉ោងនេះ ចំណាប់ខ្មាំងប្រមាណ​ជាជាង៣០នាក់បានស្លាប់ ក្នុងនោះជនបរទេសមានប្រមាណជា៧នាក់។ រីឯភេវរជនប្រមាណជា ១១នាក់ ដែលមកពី​គ្រប់ជាតិសាសន៍ដូចគ្នានោះ ក៏ត្រូវបានសម្លាប់ដែរ។

តុល្យភាពខាងលើនេះ ចេញផ្សាយដោយអាជ្ញារធរអាហ្សេរី គ្រាន់ជាតួលេខបណ្ដោះអាសន្ន ព្រោះមានតែ​ផ្នែកមួយនៃ ទីតាំងនោះប៉ុណ្ណោះ ដែលកងទ័ពអាល់ហ្សេរី ដណ្ដើមកាន់កាប់បានមកវិញ។ តែនៅមានទីកន្លែងដទៃទៀតក្នុងតំបន់នោះ ដែល​កងទ័ពនៅកំពុងធ្វើការហ៊ុំព័ទ្ធនៅឡើយ។ ចំណែកអ្នកនាំពាក្យរបស់ក្រុមភេវរជនវិញ បានថ្លែង​ក្នុងសេចក្ដីប្រកាស​ពត៌មានមួយកាលពីល្ងាចថ្ងៃព្រហស្បត្តិ៍ថា ខណៈពេលពួកគេសាកល្បងនឹងដឹកជញ្ជូនចំណាប់ខ្មាំង ទៅកាន់ទីកន្លែង​សុវត្ថិភាពតាមរថយន្ដនោះ កងទ័ពអាល់ហ្សេរីបានទម្លាក់គ្រាប់បែក វាយលុក ហើយបានសម្លាប់ចំណាប់ខ្មាំង៣៤នាក់ និងអ្នកចាប់ចំណាប់ខ្មាំង ១៥នាក់។ ចំណាប់ខ្មាំងដែលនៅរួចរស់ ពីការវាយប្រហារតាមផ្លូវអាកាសនោះ មាន៣នាក់​ជនជាតិប៊ែលហ្សិក ២នាក់ជាអាមេរិកាំង ម្នាក់ជាជប៉ុន និងម្នាក់ទៀតជាជនជាតិអង់គ្លេស។ តែសេចក្ដីប្រកាសនោះ មិន​បាននិយាយពីចំនួនអ្នករងរបួសទេ។

ពត៌មានខ្លះទៀតផ្សាយចេញក្នុងថ្ងៃព្រហស្បត្តិម្សិញម៉ិញ បាននិយាយថា ពួកភេវរជនទំនងជាមិនចង់ទុកចំណាប់ខ្មាំង យ៉ាងច្រើនសន្ធឹកសន្ធាប់បែបនេះទេ។ មនុស្សជាច្រើន រួមមានទាំងជនបរទេសផង បានលួចរត់​ចេញរួច​ដោយជោគជ័យ​ពីរោងចក្រ។ ទីភ្នាក់ងារពត៌មានរបស់ប្រទេសអាល់ហ្សេរី បាននិយាយថា អ្នកធ្វើការក្នុងរោងចក្រជាជនជាតិអាល់ហ្សេរី ប្រមាណជា ៦០០នាក់ ត្រូវបានដោះលែងអោយមានសេរីភាព។

លោក ដាហ៊ូ អ៊ូល្ដ កាប្លីយ៉ា បានថ្លែងបញ្ជាក់ថា ក្រុមប្រដាប់អាវុធនិយមអ៊ីស្លាមនេះ មានប្រភពពីប្រទេសលីប៊ី នៅជិត​ខាងជាប់ព្រំដែននេះ ហើយថា ការចាប់ជាចំណាប់ខ្មាំងនេះ ត្រូវបានរៀបគម្រោងទុក នៅក្រោមបញ្ជាការរបស់ ជនជាតិ​អាល់ហ្សេរីម្នាក់ឈ្មោះ ម៉ុកតារ ប៊ែលម៉ុកតារ (Mokhtar Belmokhtar) ដែលជាស្ថាបនិកមួយរូប នៃបណ្ដាលភេវរនិយម​អាល់កៃដា ប្រចាំនៅបណ្ដាប្រទេស នៃទ្វីបអាហ្វ្រិកខាងជើង៕

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី១៧ ខែមករា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ