រតនគីរី៖ វៀតណាមយកលេសចែកថ្នាំ ដើម្បីរំកិលបង្គោល«ព្រំដែន»?
រតនគីរី - ស្ថិតនៅឆ្ងាយពីទីរួមខេត្តរតនគីរី និងនៅជាប់ព្រំដែននៃប្រទេសវៀតណាម ប្រជាពលរដ្ឋម្នាក់ ដែលរស់នៅក្នុងឃុំតាវែង ស្រុកតាវែង ខេត្តរតនគីរី លោក សាន ស៊ីន បានថ្លែងប្រាប់ទស្សនាវដ្តីមនោរម្យ.អាំងហ្វូថា ជនជាតិវៀតណាម ដែលទំនងសុទ្ធជាអ្នកមុខអ្នកការ ក្នុងជួរទ័ពវៀតណាម និងមានអាយុចាប់ពី៣០ ទៅ៤០ឆ្នាំ បានមកស្នាក់នៅក្នុងស្រុកតាវែងនេះ និងបានដើរផ្តឹតយករូបភាពទាំងអស់ក្នុងស្រុក។ បើទោះជាមកថតក្នុងអាវស៊ីវិល តែពួកគាត់ស្លៀកខោ និងស្បែកជើងជាទាហាន។
ពលរដ្ឋរូបនេះបន្តថា ក្រៅពីដើរថតរូប ទាហានវៀតណាមទាំងនោះ បានដើរចែកថ្នាំពេទ្យ ម៉ី ម្សៅស៊ុបជាដើម ដល់ប្រជាពលរដ្ឋក្នុងឃុំទាំងពីខាងលើ។ លោក សាន ស៊ីន បានឲ្យដឹងទៀតថា ពលរដ្ឋកម្ពុជាមួយចំនួនមានការងឿងឆ្ងល់ ហេតុអ្វីបានជាចាំបាច់ត្រូវការជំនួយជាថ្នាំពេទ្យ [...]
