ភេរវកម្មនៅប៉ារីស៖ យ៉ាងតិច១២៦នាក់ស្លាប់ ជាង២០០នាក់របួស
ខាងក្រោមនេះ ជារបាយការណ៍លំអិត ធ្វើនៅថ្ងៃសៅរ៍ ទី១៤ ខែវិច្ឆិកា វេលាម៉ោង៧ព្រឹក (ម៉ោង១៣រសៀល ម៉ោងនៅកម្ពុជា) ពីស្ថានការណ៍ទាំងឡាយ ដែលបានកើតឡើង នៅក្នុងការវាយប្រហារ ចំនួន៦កន្លែងនៅរដ្ឋធានីប៉ារីស និងនៅតំបន់ជាយក្រុង។ ប៉ុន្តែទស្សនាវដ្ដីមនោរម្យ.អាំងហ្វូ សូមលើកយកតែព័ត៌មាន ដែលផ្ដល់ឲ្យ ដោយប្រភពជាផ្លូវការ (រដ្ឋាភិបាល នគរបាល តុលាការ...) និងរាយការណ៍ ដោយអ្នកយកព័ត៌មានរបស់យើង ដែលមានវត្តមាននៅនឹងកន្លែងប៉ុណ្ណោះ។
ការបាញ់ប្រហារ បានធ្វើឡើង ចំនួន៥ចំណុច កណ្ដាលរដ្ឋធានីប៉ារីស
ភោជនីយដ្ឋាន និងហាងផឹកស៊ីជាច្រើន បានរងនូវការបាញ់រះ ពីខាងក្រៅ ដោយអាវុធស្វ័យប្រវត្ត ក្នុងនោះមានភោជនីយដ្ឋានម្ហូបខ្មែរមួយឈ្មោះ «Le Petit Cambodge» ផង។ ការបាញ់ប្រហារដ៏ខ្លាំងក្លា និងបានធ្វើឲ្យមនុស្សជាច្រើនស្លាប់នោះ គឺនៅក្នុងរោងល្ខោន បាតាក្លង់ (Bataclan) ដែលកំពុងមានការប្រគុំតន្ត្រីរ៉ុក របស់ក្រុមចម្រៀង [...]