ក្រុមអ្នកតាមដាន៖ «ជួប សម្លាប់ មិននៅក្នុងវីដេអូស្ដាម៉ាតទេ»
ជាវីដេអូ ដែលបានបង្កភាពសង្ស័យ សម្រាប់ក្រុមអ្នកតាមដានករណីឧក្រិដ្ឋកម្ម បាញ់សម្លាប់លោក កែម ឡី កាលពីខែកក្កដាកន្លងមក នៅក្នុងហាងលក់ទំនិញ ស្តាម៉ាត នៃស្ថានីយ៍ប្រេងឥន្ទនៈ កាល់តិច (សាខាបូកគោ) កណ្ដាលរាជធានីភ្នំពេញ។ អ្នកតាមដានខ្លះទៀត ដូចជាព្រះសង្ឃ ប៊ុត ប៊ុនតិញ ស្ថាបនិកបណ្ដាញព្រះសង្ឃឯករាជ្យ ថែមទាំងបានបរិហារថា ការបើកសវនាកាត់ក្ដី រួមទាំងការបង្ហាញវីដេអូនេះ គ្រាន់តែជាការសម្ដែងល្ខោន ដែលគ្មានវាំងនន បិតបាំងក្រោយឆាកប៉ុណ្ណោះ។
តែសម្រាប់ លោក លី សុផាណា អ្នកនាំពាក្យសាលាដំបូងរាជធានីវិញ បានការពារភស្ដុតាងជាវីដេអូនេះ ថាមានលក្ខណៈ «វិទ្យាសាស្ត្រពិត»។ អ្នកនាំពាក្យរូបនេះ បានអះអាងតាមប្រព័ន្ធតេឡេហ្គាម ប្រាប់ក្រុមអ្នកសារព័ត៌មានថា៖ «សវនាការបានបង្ហាញ ឲ្យឃើញរួចហើយ នូវសកម្មភាពរបស់ជនជាប់ចោទ ដែលត្រូវបានថត ដោយកាម៉េរ៉ាសុវត្ថិភាព របស់ស្ថានីយប្រេងកាល់តិច។ [...]
