ធី សុវណ្ណថា សុំចូលធ្វើនយោបាយជាមួយ CPP
លិខិតស្នើសុំ«ចូលរួមជីវភាពនយោបាយ» ជាមួយគណបក្សកាន់អំណាច បានធ្លាក់មកដល់ដៃអ្នកសារព័ត៌មាន នៅថ្ងៃនេះ តែត្រូវបានម្ចាស់លិខិត ផ្តិតមេដៃកាលពីម្សិលម៉ិញ។ តែបើមើលតាមពេលវេលា វាមិនមែនជារឿងចៃដន្យទេ ដែលលិខិតនេះបានធ្វើឡើង តែប៉ុន្មានថ្ងៃ មុនការបោះឆ្នោតជ្រើសរើសក្រុមប្រឹក្សា ឃុំ-សង្កាត់ នៅថ្ងៃអាទិត្យខាងមុខ ជាពិសេស តែមួយថ្ងៃមុន ការចេញឃោសនាបោះឆ្នោត ពីសំណាក់លោក ហ៊ុន សែន នាយករដ្ឋមន្ត្រី-ប្រធានគណបក្សប្រជាជនកម្ពុជា។
ក្រៅពីពាក្យពេជន៍ សរសើរពី«ស្ថានភាពពិត នៃប្រទេសកម្ពុជា មានសុខសន្ដិភាព កំណែទម្រង់ល្អ និងមានភាពរីកចម្រើន កាន់តែប្រសើរ ពិសេសគឺគណបក្សប្រជាជនកម្ពុជា ក្រោមការដឹកនាំ» របស់លោក ហ៊ុន សែន នោះ អតីតសកម្មជនរបស់គណបក្សសង្គ្រោះជាតិ កញ្ញា ធី សុវណ្ណថា នៅឆ្លៀតសរសេរលើកឡើង ថាខ្លួនធ្លាប់ទទួលបាន ការបណ្ដុះបណ្ដាលមនោគមវិជ្ជា ចងគំនុំហិង្សា ពីថ្នាក់ដឹកនាំគណបក្សសង្គ្រោះជាតិនោះថែមទៀត។
[...]
